Read chopi Ezekhiyele 48 Bible Online

Ezekhiyele 48 - chopi bible

Ezekhiyele 48

¹Se matina a tihunzu ta kona ngu awa: Kukhukhela didhawa da muhingano wa wulambwe, ngu didhawa da nzila ya Hetlomi, kuta Hamati, Hazeri-Enomi, muhingano wa Dhamasku, kuya wulambwe, hafuhi ni Hamati; va na va ni didhawa da wulambwe ni da mswa-ditambo; Dhani njikhwemu tximwetxo.

²Kambe hafuhi ni muhingano wa Dhani, kukhukhela ka didhawa da wutxani, kala mswa-ditambo, Aseri njikhwemu tximwetxo.

³Se hafuhi ni muhingano wa Aseri, kukhukhela ka didhawa da wutxani kala mswa-ditambo, Naftali njikhwemu tximwetxo.

⁴Se hafuni ni muhingano wa Naftali, kukhukhela ka didhawa da wutxani kala mswa-ditambo, Manasi njikhwemu tximwetxo.

⁵Se hafuhi ni muhingano wa Manasi, kukhukhela ka didhawa da wutxani kala mswa-ditambo, Efrayime njikhwemu tximwetxo.

⁶Se hafuhi ni muhingano wa Efrayime, kukhukhela ka didhawa da wutxani kala mswa-ditambo, Rubheni njikhwemu tximwetxo.

⁷Se hafuhi ni muhingano wa Rubheni, kukhukhela ka didhawa da wutxani kala mswa-ditambo, Judha, njikhwemu tximwetxo.

⁸Se hafuhi ni muhingano wa Judha, khukhela ka didhawa da wutxani kala mswa-ditambo, i nava mningelo wu mi no wu maha wa 25.000 wa tipimo ta kuanama, ni kulapha ko fana ni ka txikhwemu tximwetxo, kukhukhela didhawa da wutxani kala mswa-ditambo; kambe wukhalo wo sawuleka wu na va ngu hagari ka kona.

⁹Mningelo wu mi no wu maha ka MKOMA, i nave wa 25.000 wa tipimo kulapha, ni 10.000 wa tipimo kuanama.

¹⁰Se mningelo wo sawuleka wu na lumba vaphaxeli; ngu wulambwe i nava 25.000 wa tipimo kulapha, se wutxani 10.000 wa tipimo kuanama, ni kuya wuphemba 25.000 wa tipimo kulapha; kambe wukhalo wo sawuleka wa MKOMA wu na va ngu hagari ka kona.

¹¹Wukhalo wuwa wu na lumba vaphaxeli vale va nga sawulwa, hagari ka vanana va ka Zadhoki, avale va nga veketa mlayo wangu, va nga mbi timela, mbimo yile vanana va ka Israyeli va nga timela, kufana ni va ka Levhi vale va nga nga timela.

¹²Se wukhalo wule va nga ningwa, i nava wa Kusawuleka ka Kusawuleka, hafuhi ni muhingano wa va ka Levhi.

¹³Se va ka Levhi va na va ni wukhalo wa 25.000 wa tipimo kulapha, ni 10.000 wa tipimo kuanama; kulapha ka kona kotshe i nava ka 25.000 wa tipimo, se ni kuanama ka 10.000 wa tipimo.

¹⁴Kambe kha va na mbi xavisa txilo ka esso, hambi kutxitxisa, mwendo kuningela mihando yo khata ya mafu, nguko njo sawuleka sa MKOMA.

¹⁵Aniko 5.000 wa tipimo tile ti nga sala ka kuanama masoni ka 25.000 wa tipimo, ku na thumiswa ngu didhoropa, kasi kuzumba kona, ni kudyisa kona sifuyo; se didhoropa di na va ngu hagari ka kona.

¹⁶Tipimo ta kona i nava tiya: Didhawa da wulambwe 4.500 wa tipimo, didhawa da wuphemba 4.500 wa tipimo, didhawa da wutxani 4.500 wa tipimo, ni didhawa da mswa-ditambo 4.500 wa tipimo.

¹⁷Wudyiselo wa didhoropa, wulambwe 250 wa tipimo, wuphemba 250 wa tipimo, wutxani 250 wa tipimo, ni mswa-ditambo 250 wa tipimo.

¹⁸Se amu ku nga sala ka didhawa da kulapha, ko longoloka ni wukhalo wo sawuleka wa mningelo, i nava ka 10.000 wa tipimo ngu wutxani, 10.000 wa tipimo ngu mswa-ditambo; ku na dingana ni wukhalo wo sawuleka wa mningelo; se mihando ya kona yi na lumba vale va thumelako didhoropa.

¹⁹Se avale va thumelako didhoropa, va na di thumela ka totshe tihunzu ta ka Israyeli.

²⁰Otshe makhalo ma no ningelwa ma nava 25.000 wa titshava, ni 25.000 kambe ka mune wa makhona mi na ningela mningelo wo sawuleka, ni thomba ya didhoropa.

²¹Se amu ku no sala ku na lumba mthangeli; ka diya ni ka dile didhawa da wukhalo wo sawuleka wa mningelo, ni thomba ya didhoropa, masoni ka 25.000 wa titshava ta mningelo, ngu tshungameto ya m'hingano wa wutxani ni mswa-ditambo, masoni ka 25.000, ngu kukomba m'hinganoni ka mswa-ditambo, madingano ni sikhwemu, wu na lumba mthangeli; se txiningo txa mningelo wo sawuleka, ni wukhalo wo sawuleka, wa nyumba, si na va hagari ka kona.

²²Kambe kukhukhela ka thomba ya va ka Levhi, ni thomba ya didhoropani, hagari ka sile si no lumba mthangeli, ngu hagari ka muhingano wa ka Judha ni wa Bhenjamini, esso si na va sa mthangeli.

²³Se ngu ka tihunzu tile ti no sala, kukhukhela ka didhawa da wutxani kala mswa-ditambo, Bhenjamini txikhwemu tximwetxo.

²⁴Se hafuhi ni muhingano wa ka Bhenjamini, kukhukhela ka didhawa da wutxani kala ka didhawa da mswa-ditambo, Simiyoni njikhwemu tximwetxo.

²⁵Se hafuhi ni muhingano wa ka Simiyoni, kukhukhela ka didhawa da wutxani kala ka didhawa da mswa-ditambo, Isakari njikhwemu tximwetxo.

²⁶Se hafuhi ni muhingano wa ka Isakari, kukhukhela ka didhawa da witxani kala ka didhawa da mswa-ditambo, Zebhuloni njikhwemu tximwetxo.

²⁷Se hafuhi ni muhingano wa ka Zebhuloni, kukhukhela ka didhawa da wutxani kala ka didhawa da mswa-ditambo, Gadhi njikhwemu tximwetxo.

²⁸Se hafuhi ni muhingano wa ka Gadhi, kukhukhela ka didhawa da wuphemba, muhingano wu na khukhela ka Tamari kala matshanganoni ka mati a Kadhesi, kuya didhawa ka txinambwana kala ka Linene la Hombe.

²⁹Adiya ngu dona ditiko di mi no abanisela di maha thomba ya tihunzu ka Israyeli; se asiya ngu sona sikhwemu sa kona, kuwomba MKOMA Txizimu.

³⁰ Se sike so huma ngu sona didhoropani ngu siya, kukhukhela wulambwe: 4.500 wa tipimo.

³¹Se sike sa didhoropa si na va madingano ni matina a tihunzu ta va ka Israyeli: Sike siraru so rendekela wulambwe: Txike txa ka Rubheni njimwetxo, txike txa ka Judha njimwani, txike txa ka Levhi njimwani;

³²ka didhawa da wutxani 4.500 wa tipimo, ni sike siraru i ku siya: Txike txa ka Josefa njimwetxo, txike txa ka Bhenjamini njimwani, txike txa ka Dhani njimwani;

³³ngu didhawa da wuphemba 4.500 wa tipimo, ni sike siraru: Txike txa ka Simiyoni njimwetxo, txike txa ka Isakari njimwani, txike txa ka Zebhuloni njimwani;

³⁴ngu didhawa da mswa-ditambo 4.500 wa tipimo, ni sike sa kona sasiraru: Txike txa ka Gadhi njimwetxo, txike txa ka Aseri njimwani, txike txa ka Naftali njimwani.

³⁵Kuranganyetwa ngu 18.000 wa tipimo; kambe ditina da didhoropa kukhukhela ditshiku dile i nava: MKOMA Waho Hale.