Read chopi Ezekhiyele 5 Bible Online

Ezekhiyele 5 - chopi bible

Ezekhiyele 5

¹Se awe mwanana wa m'thu, teka mesa yo lotwa; nga limo ya kuyola ngu yona, u na yola misisi ni maletu ako; sekoko u na teka txikalo u pimela kuraru misisi ngu txona.

²U na hisa lipimo limwelo la wuraru la misisi ngu mndilo, hagari ka didhoropa, ngako ma di gumile masiku a kurandela; sekoko u na teka limwani lipimo, u txi li wilela ngu ditxhari u txi horoloka didhoropa; se lipimo la wuraru lo gwitisa, u na li xwaya; nguko ni na li tutumisa ngu ditxhari.

³Se u na teka mtengo wa wudotho wa misisi, u sungelela ka titshulu ta txyambalo txako.

⁴Ngu ka mtengo wuwa, u na teka yimwani misisi u txi yi rinza ha mndiloni; se kukhukhela kona hale, ku na huma mndilo wu hisa yotshe nyumba ya ka Israyeli.

⁵MKOMA Txizimu a khene: Awuwa i Jerusalema; ni m'vekile hagari ka matiko.

⁶Ene koko, valamuli vangu a va onhisile ngutu kupinda matiko, ni sileleto sangu kupinda matiko ale ma nga mrandela; nguko va lambile wulamuli wangu, kambe kha va londisa silayelo sangu.

⁷Ngu kumaha keto, MKOMA Txizimu a womba tiya: Ngu mhaka ya kule mi nga engetela wubihi wanu kupinda matiko ale ma nga mi randela, kha ma tsimbila ngu sileleto sangu, kambe kha ma londisa silayelo sangu, hambi kutsimbila ngu silayelo sa matiko ale ma nga mi randela;

⁸ngu mhaka yeto, MKOMA Txizimu a khene: Wonani taku ani, ina, ani nipune, na kusola; ni na kutsayisa ma txi kuwona matiko.

⁹Ni na maha kwako ati ni si ziviko kumaha, kambe ni no mbi ngadi ni ti maha, ngu mhaka ya manyala ako.

¹⁰ Ngu kumaha keto, vatate va na dya vanana vawe hagari kwanu, ni vanana va na dya vatate vawe; se ni na maha wulamuli wangu kwako, votshe vale va no sala, ni na va hangalasa ka otshe madhawa.

¹¹Ngu kumaha keto, ni xambanya ngu kuhanya kwangu, kuwomba MKOMA Txizimu, nguko u nyenyezisile wukhalo wangu wo sawuleka, ngu totshe ta kwa mbi tumeleka, ni otshe manyala ako, kambe ni na kuhungula, diso dangu kha di na mbi kudivalela, hambi ni ku kupfela.

¹²Ka mitengo yiraru ya vathu vako, wo khata wu na fa ngu mitungu, ni kuhetwa ngu nzala; se mtengo wa wumbidi wu na dawa ngu ditxhari madhawani kwako; se wumwani mtengo ni na wu hangalasa ka otshe madhawa, na ni txi vatutumisa ngu ditxhari.

¹³Ngu kumaha keto kuhenya kwangu ku na maheka, ni na boxela kwawe txiviti txangu ni txi ti thavelela; kambe va na tiziva ti to ngani ani, MKOMA, ni nga womba ngu kuvihata, mbimo yi ni no va vitikela.

¹⁴Kambe ni na kumaha txiwula ni txisekiso hagari ka matiko ale ma nga kurandela, na va txi kuwona votshe vale va pindako.

¹⁵Se awule wa txisekiso ni wa txibwebwe, va na va vagondisi ni txixamaliso ka matiko ale ma nga kurandela, mbimo yile ni no kulamula ngu kuhenya ni txiviti, ngu sitsayiso sa txiviti.

¹⁶Mbimo yi ni no va rumela miseve ya nzala yo thisa, ni va lwisa kasi ku va fuvisa, ayi ni no yi rumela kasi ku mi fuvisa, sekoko ni na engetela nzala txitimwi kwanu, kambe ni na mi keleta dipawu.

¹⁷ Se ni na rumela nzala kwanu, ni sibanda si si nota daya vanana vako; mitungu ni kuthekela ka mnoha, si na pinda ngu kwako; ni na tisa ditxhari txitimwi kwako. Ani MKOMA ni wombile.