Read chopi Ezekhiyele 6 Bible Online

Ezekhiyele 6 - chopi bible

Ezekhiyele 6

¹Se di tile kwangu dipswi da MKOMA, di txi ta kha dona:

²Awe mwanana wa m'thu, rendekela mimangoni ka Israyeli, profeta u txi yi sola.

³Se u na khawe: Anu mimango ya Israyeli, engisani dipswi da MKOMA Txizimu: MKOMA Txizimu a khene ka mimango, ka simangwana, ka sinambwana ni ka mikova: Wonani taku ani, ina, ani nipune, ni na tisa ditxhari txitimwi kwanu, ni nata khundumusa makhalo anu o guleka.

⁴Se siluvelo sanu si na xaselwa, kambe ku na fayetelwa sifananiso sanu sa ditambo; ni na wisetela sirumbi sanu masoni ka sithombe sanu.

⁵Se ni na veketela sirumbi sa vanana va ka Israyeli masoni ka sithombe sawe, kambe ni na hangalasela marambu anu masoni ka siluvelo sanu.

⁶Ni otshe makhalo anu o zumba ka ona, madhoropa otshe ma na khundumuselwa, makhalo o guleka ma na xaselwa; kasi ku siluvelo sanu si khundumuselwa si fuviswa, ni sithombe sanu si txi fayekela si guma, ni sifananiso sanu sa ditambo si wilelwa, kambe yi txi onhetelwa mithumo yanu.

⁷Se sirumbi si na wetetela hagari kwanu, kasi ku mi tiziva taku ani ngani MKOMA.

⁸Hambi keto ni na leka vokari ve huluka ditxhari hagari ka matiko, mbimo yile mi no hangalaswa ka matiko.

⁹Sekoko va na ni alakanya avale hagari kwanu va no huluka, matikoni mule va no yiswa wukhumbini ka ona; nguko ni henyisilwe ngu timbilu tawe to biha, ti nga hambana ni nani, ngu mhaka ya maso awe ma nga xengwa, ve londetela sithombe sawe; va na ti laya vapune, ngu mhaka ya wubihi wu va nga wu maha, ka otshe manyala awe.

¹⁰Se va na tiziva taku, ani MKOMA, kha na womba walo taku ni na va mahela wubihi wuwa.

¹¹MKOMA Txizimu a womba tiya: Bhwabhwata manza, u ginga ngu mkondo, u txi khawe: Yowe! Ngu mhaka ya otshe manyala a wubihi wa nyumba ya ka Israyeli! Nguko va na dawa ngu ditxhari, ni nzala, ni mtungu.

¹²Awule a no va a di kule a na dawa ngu mtungu; kambe awule a ku hafuhi a na dawa ngu ditxhari; se awule a no sala a di randetwe ngu valala, a na dawa ngu nzala; se ni na va wukela ngu txiviti.

¹³Sekoko mi na tiziva taku ani ngani MKOMA, mbimo yile sirumbi sawe si no maneka hagari ka sithombe sawe, madhawani ka siluvelo sawe, ni ka sotshe simangwana so guleka, kotshe titshokani ka mimango, ni hahatshi ka yotshe mindonga yo nakana, ni hahatshi ka mikusu, ka wukhalo wule va nga ti ti ningela mafura o bhumula, ka sotshe sithombe sawe.

¹⁴Se ni na guleta dianza dangu txitimwi kwawe, ni savalisa mafu awe, ma txi maha txisapa ngutu kupinda txiwula txa didhawa da Ribhila, kotshe mu va zumbako kona; se va na tiziva ti to ani ngani MKOMA.