Read chopi Ezekhiyele 7 Bible Online

Ezekhiyele 7 - chopi bible

Ezekhiyele 7

¹Msana keto, dipswi da MKOMA di to ta kwangu di txi ta kha dona:

²Se awe mwanana wa m'thu, ka ditiko da ka Israyeli, MKOMA a khene: Mata magwito, magwito mata ka mune wa madhawa a ditiko.

³Konkuwa mata magwito txitimwi kwako, nguko ni na rumela txiviti txangu kwako, ni txi ta kulamula madingano ni tinzila tako, kambe ni na kukomba manyala ako otshe.

⁴Diso dangu kha di na mbi kutsetsa, kambe kha ni na mbi va ni wumbilu ni nawe, aniko ni na kutsayisa madingano ni dihanyo dako do biha, manyala ako ma nava hagari kwako; se mi na tiziva ti to ani ngani MKOMA.

⁵MKOMA a womba tiya: Dikhombo dimwedo, data dikhombo dimwedo.

⁶Mata magwito, magwito mata, ma wukete kulwa ni nawe; wona taku mata;

⁷kata kulamulwa kwako, kwako awe u zumbako ditikoni. Yata mbimo; di hokile ditshiku da pfilu-pfilu, na i si nga da litsako, txitimwi ka mimango.

⁸Konkuwa, ngu kukuluveta, ni na theketa txiviti txangu txitimwi kwako, txiviti txangu txi nata kwako, ni na kuwukela ngu txiviti txangu, ni kulamula madingano ni tinzila tako, kambe ni na tisa txitimwi kwako otshe manyala ako.

⁹Se diso dangu kha di na mbi kutsetsa, kambe kha ni na mbi va ni wumbilu; madingano ni tinzila tako, ngu kumaha keto, ni na kunemetisela, manyala ako ma nava txitimwi kwako; se mi na tiziva taku ani MKOMA na tsayisa.

¹⁰Ndide hawa ditshiku, ndide data; kutile kufuviswa kwako; ndonga yi thungile, ka nakana kutikulisa.

¹¹Kulwisa ku gulekile kumaha ndonga ya kwa mbi na wumbilu; kha ku na mbi sala txilo kwawe, hambi ka kutala kwawe, mwendo dirumbi dawe, kambe kha ku na mbi va ni ku dilwa kwawe.

¹²Yata mbimo, da hoka ditshiku; wule a xavako a nga tsake, ni wule a xavisako a nga henye; nguko txiviti txa tura txitimwi ka mtalo wawe.

¹³Nguko wule a xavisako, kha na mbi txi mana kambe txile a nga xavisa, hambi a txi ngadi e hanya; nguko ngu mtalo wawe kha va na mbi sikota kutshumela ve wona ta msana; kambe awalo a no tsanisa kuhanya kwakwe ngu to biha.

¹⁴Va vetile mpundu, kambe sotshe va lulamisete, aniko kha nga ho wu ayako kulwani, nguko txiviti txangu txa tura txitimwi kwawe, ngu mtalo wawe.

¹⁵Hahanze ku ni ditxhari, mndani ku ni mtungu ni nzala; awule a no maneka hahanze a na dawa ngu ditxhari, se awule a no maneka didhoropani, a na fuviswa ngu nzala ni mtungu.

¹⁶Kambe ku no huluka vonevo va no huluka, aniko va na va mimangoni, nga situvani sa mikovani, va txi dila, mmweyo ni mmweyo ngu mhaka ya wubihi wakwe.

¹⁷Otshe manza ma na guma mtamo, kambe otshe mazolo ma na jomba mati.

¹⁸Kambe va na phamba masaka, kudhudhumela ku na va fenengeta; ka totshe tikhohe tawe ku nava ni tingana, misungo yawe yotshe yi na va tigwayi.

¹⁹Silivhela yawe va na tshotshela tinzilani, ni nzalama yawe yi na nga nzambwa; hambi silivhela yawe mwendo nzalama yawe, kha si na mbi sikota ku va hulukisa ka ditshiku da kuhenya ka MKOMA; sona kha si na mbi khurisa mimoya yawe, hambi kukhurisa mirumbu yawe, nguko ngu sona si nga va humba ve wa kubihani.

²⁰Va ti kulisile ngu ku ti bombisa ngu silivhela ni nzalama; kambe va mahile ngu sona sifananiso sa manyala awe sa kwa mbi tumeleka; ngu toneto, ni si mahile si maneka i di nzambwa.

²¹Se si na ningelwa manzani ka vamatiko si txi va lumba, ni ka vaonhi va ditiko va txi si handa; kambe va na si nyenyezisa.

²²Khohe yangu kha yi na mbi va rendekela, se va na nyenyezisa wukhalo wangu wo sisala; nguko va na wulela ka wona vaxaseli va txi wu nyenyezisa.

²³Maha txhini, nguko mafu ma tate ngu wubihi wo theketa mnoha, kambe didhoropa di tate ngu kulwisana.

²⁴Se ni na tisa vathu va tshofu ngutu ngu ka mamwani matiko, va nata honyola tinyumba tawe; kambe ni na heta kutiguleta ka vale va mtamo, ni makhalo awe o sawuleka ma na nyenyeziswa.

²⁵Kata kukhundumusa; se vona va na lava kuthutha, aniko kuwalo ni kumweko.

²⁶Dikhombo di na londetwa ngu dikhombo, se huwa yi na dhana yimwani huwa; sekoko va na lava txiwoniso ngu ka mprofeti, kambe mlayo wa mphaxeli wu na lova, ni silayelo sa madhota.

²⁷Mfumeli a na ti dilela, se mthangeli a na ti ambeka kupandiseka, ni manza a vathu va ditiko ma na karala; ni na va tsayisa madingano ni dihanyo dawe da walo, kambe ni na va lamula ngu malamulelo awe, va na tiziva ti to ani ngani MKOMA.