Read chopi Ezekhiyele 8 Bible Online

Ezekhiyele 8 - chopi bible

Ezekhiyele 8

¹Ka dilembe da wutxhanu ni dimwedo, ka mtxima wa wutxhanu ni wumwewo, ka ditshiku da wutxhanu ka mtxima, ku to maheka taku, na ni di khalahatshile ha m'tini kwangu, madhota a ka Judha ma di khalahatshile masoni kwangu, dianza da MKOMA Txizimu di txi ta wa txitimwi kwangu.

²Se ni to wona, ni wona txo fana ni mndilo; kukhukhela ha txiwununi kuya hahatshi, i ti ti mndilo, se kukhukhela txiwununi kuya txitimwi, nga zumbelo ya kuphatima, ka mxowo wa kuphatima ka koporo.

³Se a to nawuluta txo fana ni dianza, a txi ñola misisi ya msungo wangu; Moya wu to ni guleta hagari ka mafu ni nzuma, wu txi ni tisa Jerusalema ngu txiwoniso txa Txizimu, kala ha txikeni ka mthanda wa mndani, txi nga rendekela wuphemba, ku nga ti vekilwe txifaniso txa txiluse, txi wusako kulusa ka Txizimu.

⁴ Wona taku, wudhundo wa Txizimu txa Israyeli, wu ti kona hale, kufana ni wudhundo wule ni nga ti wu woni mkovani.

⁵Txizimu txi to kha txona kwangu: Awe mwanana wa m'thu, konkuwa guleta maso ako, u wonetela ka nzila ya wuphemba. Se ni to guleta maso angu ni wonetela nzila ya wuphemba, se ngu didhawa da wuphemba, tshungameto ni ditimba da txiluvelo, txi ti ti ho txifananiso txiya txa txiluse, ngu ha txikeni.

⁶Se Txizimu txi to kha txona kwangu: Awe mwanana wa m'thu, Ina wa ti wona ti va mahako kani? Kunyenyeza ka hombe kumahwako ngu nyumba ya ka Israyeli hawa, kasi ku ni khukha ka wukhalo wangu wo sawuleka kani? Aniko u ngadi u txi na wona manyala a hombe kupinda awa.

⁷Se Moya wu to ni gula wu txi ni yisa ka ditimba da mtendelani; sekoko ni to wona ku ti ni ditshoko ha disetani, kambe ku ti ni ditimba.

⁸Se a to ni gela ku khene: Awe mwanana wa m'thu, dhoda ha disetani hale. Se ni to dhoda ha disetani, ni mana taku ku ni ditimba.

⁹Sekoko a to ni gela ku khene: Wulela u wona wubihi wa manyala ya va ma mahetelako hawa.

¹⁰Se ni to wulela ni wona, ni mana taku, totshe tixaka ta sindindandinda, sihari so nyenyeza, ni sotshe sithombe sa nyumba ya ka Israyeli, si di pendilwe ka otshe madhawa a diseta.

¹¹Kambe ku ti ni mtxhanu wa magumi ni magumi mambidi a vavamna, ka madhota a nyumba ya ka Israyeli, ni Jezaniya, mwana Safani, va nga ti ti hagari ka sona, va ti ti emile masoni ka sile so pendwa, kambe mmweyo ni mmweyo a ti ti ni dibaselo dakwe; se ku ti ti kwela wutshi wo thisa wa dibaselo.

¹²Sekoko a to ni gela ku khene: U ti woni, awe mwanana wa m'thu, a ti madhota a nyumba ya ka Israyeli ma mahetelako txidemani, mmweyo ni mmweyo nyumbani kwakwe ko pendetelwa sifananiso kani? Kambe vona va kha vona: MKOMA kha hi woni, MKOMA a lekile mafuni.

¹³Se a to ni gela ku khene: U na engeta u woma mamwani manyala a hombe, kupinda awa va ma mahako vava.

¹⁴Se a to ni yisa ha txikeni ha ditimbani ka Nyumba ya MKOMA, yi ku ngu didhawa da wuphemba, konaho ku ti ti ni vavasikati va ngadi khalahatshile va txi dila ka Tamuzi.

¹⁵Se a to ni gela ku khene: U ti woni awe mwanana wa m'thu kani? Kambe u na wona manyala a hombe o pinda awa.

¹⁶Se a to ni yisa ka mthanda wa mndani ka Nyumba ya MKOMA, wona taku ha txikeni ka Dithepele da MKOMA, hagari ka m'hubhe ni txiluvelo, ku ti ti ni mtengo wo dingana magumi mambidi a vavamna ni mtxhanu, va nga ti ti tshuralete Dithepele da MKOMA, tikhohe tawe ti txi rendekela wutxani; kambe va ti ti khozela ditambo va di rendekete wutxani.

¹⁷Sekoko a to ni gela ku khene: U ti woni, awe mwanana wa m'thu kani? Ku ni ti ti hehukelako nyumba ya ka Judha, kupinda manyala awa va ma mahetelako hawa kani? Va tatile ditiko ngu kulwisa, ve tshumela ve ni henyisa; se ndiva va tshuketisa ndonga tithonvuni kwawe.

¹⁸Ngu kumaha keto, nani ni na va henyela; diso dangu kha di na mbi va tsetsa, kambe kha ni na mbi va ni wumbilu; hambi va txo kwangula tinzeveni kwangu ngu dipswi da hombe, kha ni na mbi va engisa.