Read chopi Ezekhiyele 9 Bible Online

Ezekhiyele 9 - chopi bible

Ezekhiyele 9

¹Sekoko MKOMA a to kwangula ngu dipswi da hombe tinzeveni kwangu, a txi khene: Tisani vatsayisi va didhoropa, mmweyo ni mmweyo ni matxhari akwe manzani, o khundumusa ngu ona.

²Wona taku ku ti ti ta mtxhanu wa vavamna ni mmweyo ngu nzila ya ditimba do guleka, do rendekela wuphemba, mmweyo ni mmweyo ni matxhari akwe manzani, o khundumusa ngu ona, se hagari kwawe ku ti ti ni wamwamna a nga ti ambate sa linyu, ni txiya txi nga ti ti ni so bhala ngu sona; se va to wulela veya maneka hafuhi ni txiluvelo txa koporo.

³Se wudhundo wa Txizimu txa Israyeli, wu to khukha ngu ka dikerubhima dile wu nga ti ti ka dona, kala txikenini ka nyumba; wu to kwangula ka wule a nga ti ti ambate sa linyu, a nga ti ti ni txiya txa so bhala ngu sona, txiwununi.

⁴Se MKOMA a to khene kwakwe: Tsimbila ngu hagari ka didhoropa, ngu hagari ka Jerusalema, u veka sikombiso ka timbanza ta vavamna vale va ku ni mahika, va dilako, ngu mhaka ya otshe manyala ale ma mahekako hagari ka didhoropa.

⁵Se MKOMA a wombile ka vamwani, na ni txi tipfa nani: Mlondeteleni ngu msana didhoropani muwa, mi txi va xasela; wonisisani kha kwati, kambe mi nga va maheleni wumbilu.

⁶Dayelani sikosana ni vavaphya, ni timbiri, ni sifanyana, ni vavasikati, kala ku va fuvisa; aniko votshe vavamna vale va ku ni txikombiso, mi nga va gweseni; kambe khatelani wukhaloni kwangu ko sawuleka. Se va to khata ngu vavamna vale va sikosana, va nga ti ti masoni ka nyumba.

⁷Se a to va gela ku khene: Nyenyezisani nyumba, mi tata mithanda ngu sirumbi, se mi huma. Se va to huma ve xasela didhoropa.

⁸Ku to maheka koko taku, na va di va dayete, se ni sala ani nokha, ni to wa ngu khohe, ni dila, ni txi khani: Yowe! MKOMA Txizimu! U ni mhaka yo lava kufuvisa Vaisrayeli vale va nga sala, ngu kutheketa kuhenya kwako, txitimwi ka Jerusalema kani?

⁹Sekoko a to ni gela ku khene: Wubihi wa nyumba ya Israyeli ni ya ka Judha mbwa hombe ngutu, ditiko di tate ngu mnoha, ni didhoropa di tate ngu wukanganyisi; vona va kha vona: MKOMA a lekile ditiko. MKOMA kha woni.

¹⁰Kwangu koko, ngu dangu didhawa, diso dangu kha di na mbi tsetsa, kambe kha ni na mbi maha wumbilu; mithumo yawe yo biha yi na wa txitimwi ka misungo yawe.

¹¹Se wona taku wamwamna wule a nga ti ti ambate sa linyu, eyo libhandi la kona li nga ti ti ni txiya txa so bhala ngu sona, a to tshumela ni xamulo yo khene: Ni mahisile tona ti u nga ni rumisa tona.