Read chopi Dhaniyeli 1 Bible Online

Dhaniyeli 1 - chopi bible

Dhaniyeli 1

¹ Ka dilembe da wuraru da kufuma ka Jehoyakimi, mfumeli wa Judha, Nebhukodhonosori mfumeli wa Bhabhilona, a toya randela Jerusalema.

²Se MKOMA a to ningela Jehoyakimi, mfumeli wa Judha, manzani ka Nebhukodhonosori, e ningela kambe ni siya sokari sa Nyumbani ka Txizimu. Se Nebhukodhonosori a to si teka e tsula naso ditikoni ka Sinari eya si wuletisa nyumbani ka txizimu txakwe, e si veka kumweko nyumbani ka thomba ya txizimu txakwe.

³Se mfumeli Nebhukodhonosori a to gela Aspenazi, mthangeli wa mithenwa yakwe, taku e tisa vokari va vanana va ka Israyeli, va lixaka la vafumeli, ni va tinganakana,

⁴mazambi a kwa mbi na wulima ni wawumwewo, a tikhohe totshura, o tala ngu wutxhari, o txhariha amu ko gonda, va mapimo amu ka wuzivi, a ma sikotako kumaha mithumo ya nyumbani ka mfumeli, ve gondiswa kubhala ni kuwombawomba lidimi la Vakaldheya.

⁵Se mfumeli a to leleta to ditshiku dimwani ni dimwani va fanela kuningwa sakudya sile ene a dyako sona, ni vhinya yi a selako yona, ve wunjiswa toneto ngu txipimo txa malembe mararu, kasi ku msana ka ona veya maneka masoni ka mfumeli.

⁶Se hagari kwawe ku ti maneka, ka vanana va ka Judha, Dhaniyeli, Hananiya, Misayeli ni Azariya.

⁷Se mthangeli wa mithenwa a to va raya matina mamwani, i ku awa: Dhaniyeli a to mraya ditina daku i Bheltexazari, Hananiya e mraya ditina daku i Xadrake, Misayeli e mraya ditina daku i Mixake, se Azariya a to mraya ditina daku i Abhedhi-Nego.

⁸Se Dhaniyeli a to xambanya mbiluni kwakwe ti to kha na mbi thuka e ti nyenyezisa ngu kudya sakudya sa mfumeli, hambi kusela vhinya yakwe; ngu kumaha keto, a to kombela kuvhunwa ngu mthangeli wa mithenwa ku asi ti nyenyezisi.

⁹Txizimu txi to maha ti to Dhaniyeli e mana dithomo ni wumbilu masoni ka mthangeli wa mithenwa.

¹⁰Se mthangeli wa mithenwa a to khene ka Dhaniyeli: Ni thava mfumeli, nyamne wangu, a nga leleta kudya kwanu ni kusela kwanu; a ndi na wonela txani tikhohe tanu ti di wunile, kupinda ta mazambi kuloni kani? Ngu kumaha keto, mi na beta msungo wangu ka mfumeli.

¹¹Sekoko Dhaniyeli a to gela muwoneleli wa sakudya, awule a nga ti sawutwe ngu mthangeli wa mithenwa kasiku a txi xayisa Dhaniyeli, ni Hananiya, ni Misayeli, ni Azariya, a txi khene:

¹²Na ku kombela, duka sithumi sako mndani ka digumi da masiku, u hi ninga matawa hidya, ni mati hi sela.

¹³Sekoko ti na woneka tikhohe tathu masoni kwako ni tikhohe ta mazambi ale ma dyako sakudya sa mfumeli, u na maha ka sithumi sako madingano ni ti u no ti wonisa tona.

¹⁴Se ene a to amukela txikombelo txawe, e va duka digumi da masiku.

¹⁵Ngako ku dipindile digumi da masiku, tikhohe tawe ti to woneka ti di tshurile ngutu, vona va ti enile ngutu kupala otshe mazambi ale ma nga ti tidya sakudya sa mfumeli.

¹⁶Ngu kumaha keto, muwoneleli a to thavisa sakudya sile va nga ti dingana kudya ni vhinya ya kona, e va ninga matawa dwe.

¹⁷Txizimu txi to ninga mazambi awa a mune wuzivi ni mapimo wo ziva yotshe mibhalo ya wutxhari; kambe Dhaniyeli txi to mninga mapimo o txhamusela sotshe siwoniso ni miloro.

¹⁸Se msana ka masiku ale mfumeli a nga ti wombile taku ve yiswa kwakwe, mthangeli wa mithenwa a to va yisa masoni ka Nebhukodhonosori.

¹⁹Se mfumeli a to womba-womba navo, hagari kwawe votshe kha kwa maneka vamwani vo fana ni Dhaniyeli, Hananiya, Misayeli ni Azariya; ngu kumaha keto, va to ningwa kuthumela mfumeli.

²⁰Ka timhaka totshe ta wutxhari ni mapimo ka tile mfumeli a nga va wotisa, a to mana ti taku va pinda ngu ka digumi, totshe tiñanga ni titxhari tile ti nga titiho ka mfumo wakwe wotshe.

²¹Se Dhaniyeli a to manekisa eto an'ze ka dilembe do khata da mfumeli Siro.