Read chopi Dhaniyeli 10 Bible Online

Dhaniyeli 10 - chopi bible

Dhaniyeli 10

¹Ka dilembe da wuraru da kufuma ka Siro, mfumeli wa Persiya, dipswi di to ziviswa ka Dhaniyeli, awule a dhanwako ngu ditina daku i Bhelixazari; aniko dipswi ndinene, di kombisa yimbi ya hombe, se ene a to pfisisa dipswi diya, se e mana kupfisisisa txiwoniso.

²Ka ona masiku ale, ani Dhaniyeli, ni to karateka txipimo txa mavhiki mararu.

³Ni sidyi sakudya so dhundeka, nyama ni vhinya si si wuleli mkanani kwangu, kambe ni si toli mafura, kala kuza kuguma mavhiki mararu.

⁴Se ngu ditshiku da magumi mambidi ni mune ka mtxima wo khata, ni di mabambe ka mnambo wa hombe wa Tigre;

⁵se ni to gula maso angu ni wona, ni to wona wamwamna wule a nga ti ambate syambalo sa linyu, a di sungile txiwunu txakwe ngu libhande la nzalama ho hehuka ya Ufazi.

⁶Aniko mmidi wakwe wu ti fana ni turikeza, se khohe yakwe yi ti ti phatima kufana ni kukeluka, ni maso akwe ma ti ti fana ni sisase sa mndilo, se mawoko akwe ni mikondo yakwe si ti ti ni mxowo wo fana ni suku yo vatwa; ni dipswi da kuwombawomba kwakwe di ti fana ni dipswi da vathu votala ngutu.

⁷Se ngani Dhaniyeli nokha ni nga wona txiwoniso txile; vavamna vale ni nga ti ti navo kha va txi wona; va ti ñotwe ngu kuthava ka hombe, ve tutuma veya barama.

⁸Ni to sala nokha koko, ni wona txiwoniso txiya txa hombe, ni guma mtamo; ni kutshura kwangu ku to hunduka kumaha kutsivala, se kha na sala ni mtamo ni wa wudotho.

⁹Hambi keto, ni to pfa dipswi da timhaka takwe; se ni di pfite dipswi da timhaka takwe ni to wa hahatshi ngu khohe yangu ni tsivala.

¹⁰Wonani, dianza di to ni gwesa, di ni khizamisa ngu mazola angu di ni tsanisa ngu manza angu.

¹¹Se a to khene kwangu: Dhaniyeli, wamwamna wo dhundeka ngutu, pfisisa kha kwati mhaka yi ni kugelako. Khukha u txi ema, nguko nyamsi ni rumilwe kwako. Se a txi nga txi womba-womba ni nani mapswi awa, ani ni ti to dhudhumela.

¹²Sekoko a to khene kwangu: U nga thave, Dhaniyeli, nguko kukhukhela ditshiku do khata u nga tsanisa mbiluni kwako, kupfisisa ni kutiveka hahatshi masoni ka Txizimu txako, txi engisile kukombela kwako; se ani ni tile ngu mhaka ya mapswi ako.

¹³ Aniko mthangeli wa mfumo wa Persiya a to thangela masoni kwangu e ni vhalela magumi mambidi a masiku ni dimwedo, se Migeli mmweyo wa vathangeli va hombe a tile e ta ni vhuna, kambe ani ni to sala koneho ni vafumeli va Persiya.

¹⁴Konkuwa ni tile ku ta ku gela ti ti no humelela ka vathu vako masiku a matako, nguko txiwoniso nja masiku a matako.

¹⁵Se ene a txi nga txi womba-womba ni nani timhaka eto, ni to namisa khohe yangu ni malala ni txi dwe.

¹⁶Se tximwetxo txo fana ni vanana va vathu txi to gwesa txisofu txangu, sekoko ni to tula txisofu txangu ni womba-womba, ni txi khani ka wule a nga ti ti masoni kwangu: Nyamne wangu, ngu mhaka ya txiwoniso, ni pandisekile, ha koza ni guma ni mtamo.

¹⁷Ina txithumi txa nyamne wangu txi nga wombawombisa kutxani ni nyamne wangu kani? Nguko, i di ani, kukhukhela ka konkuwa ni gumile mtamo, kha ni sikoti ni kuhefemula.

¹⁸Se tximwetxo txo fana ni m'thu txi to ni gwesa txisofu da wumbidi, txi ni tsanisa.

¹⁹Txi txi kha txona: U nga thave, wamwamna wo dhundeka ngutu! Kudikha ku nave ni nawe! Tsana, ina, tsana! Se a txi ngadi e womba-womba ni nani, ni to tsana ni txi khani: Womba-womba nyamne wangu, nguko wu ni tsanisile.

²⁰Se a nje khene: Ina wa tiziva ti ni telako tona kwako kani? Ani ni na tshumela ni yalwa ni mthangeli wa Persiya, se ni txi na heta, a nata mthangeli wa Gresiya.

²¹Aniko ni na kugela ti ti nga bhalwa dibhukuni ka ditshuri; kha ku na wu a ni vhunako kulwa ni vale, hahanze ka Migeli mthangeli wanu.