Read chopi Dhaniyeli 11 Bible Online

Dhaniyeli 11 - chopi bible

Dhaniyeli 11

¹Ani koko, ngu dilembe do khata da Dhariyo, Mmedhi, ni to khukha kasiku ni txi mtsanisa ni ku mninga mtamo.

²Se konkuwa, ni lava ku kugela ditshuri: Wona taku ku na maneka vafumeli vararu kona Persiya, aniko wa wumune a na va wa thomba yayingi kupinda votshe; kambe ngu mhaka ya tithomba takwe, a na kuzetela votshe kuve wukela mfumo wa Gresiya.

³Ngu msana, ku na humelela mfumeli wa ndena, wu a no fumela ngu mtamo wa hombe, na a txi maha kuranda kwakwe.

⁴Aniko ngako ene a di ngadi emile, mfumo wakwe wu na hoxotwa wu abaniswa ngu mune wa mimoya ya nzumani; kambe kha wu na mbi ningelwa ka liveleko lakwe, hambi mtamo wa kona kha wu na mbi fana ni wakwe, nguko mfumo wakwe wu na honyolwa wu ningela ka vamwani.

⁵Se mfumeli wa wulambwe a na tsana, ni mmweyo wa vathangeli vakwe; se awuwa a na tsana ngutu kupinda ene, kambe a na fuma, ni mfumo wakwe i nava i di wa hombe.

⁶Aniko msana ka malembe okari, mfumeli wa Egipta ni mfumeli wa Siriya va na maha txitumelelano, se mwanana wa dihorana da mfumeli wa Wulambwe a nata ka mfumeli wa Wuphemba, kasiku ve maha txitumelelano; kambe kha na mbi xayisa mtamo wa diwoko dakwe; hambi ene kha na mbi tsana, hambi diwoko dakwe; nguko ene a na ningelwa, kumweko ni vale va nga mneha, ni tate wakwe, ni wule a nga mtsanisa ka timbimo tile.

⁷Kambe kuthunga ka mitwi yakwe, ku na wuswa mmweyo ka wukhalo wakwe, se a nata ni dibutho, e ta wulela mikhokholani ka mfumeli wa Wuphemba, e lwa navo, a txi va xula.

⁸Se sizimu sawe, ni sithombe sawe sasingi, ni siya sawe sa lisima, sa silivhela ni sa nzalama, a na si teka e si yisa Egipta; se ngu malembe okari, ene kha na mbi tsana kuwukela mfumeli wa Wuphemba.

⁹Se a na wulela ka ditiko da mfumeli wa Wulambwe, aniko e tshumela e tsula ditikoni kwakwe.

¹⁰Aniko vanana vakwe va na lwa, va na sengeleta mtengo wa hombe wa mabutho; se mmweyo wawe a nata ngu kukuluveta e ta fenengeta e pinda; se a txi wuya a na teka yimbi kala mkhokholani kwakwe.

¹¹Sekoko mfumeli wa Wulambwe a na henya, e huma ku yalwa ni mfumeli wa Wuphemba; ene a na tshanganisa dibutho da hombe, se vathu vale va na ningelwa manzani kwakwe.

¹²Se di txi kula dibutho, mbilu yakwe yi na ti kukumukisa; aniko, hambi ku ku no dawelwa mazana-zana a vathu, kha na mbi xula.

¹³Nguko mfumeli wa Wulambwe a na tshumela e sengeleta dibutho da hombe kupinda dile do khata; se msana ka mbimo i ku malembe okari, a nata ngu kukuluveta ni dibutho da hombe da yimbi ni thundu yayingi.

¹⁴Se ka tona timbimo tile, vathu vavangi va na wukela mfumeli wa Wulambwe; ni vanana vo karata va vathu vako va na khukha kasiku ta tsanisa txiwoniso, aniko vona va nawa.

¹⁵Se mfumeli wa Wuphemba a nata, e ta aka libhiyo lo guleka, se e teka Didhoropa da Hombe; kambe mitamo ya Wulambwe kha yi na mbi timisela, hambi tindena ta vathu vakwe kha ti na mbi va ni mtamo wo timisela.

¹⁶Sekoko awule a nota ku ta mu wukela a na maha madingano ni kuranda kwakwe, kha ku na wu a no ema masoni kwakwe; se a na maneka ka ditiko do dhundeka, a na lovisa ngu dianza dakwe.

¹⁷Se a na ti emisela ku yalwa ngu mtamo wa mfumo wakwe wotshe, kambe ene ni vo lulama, a na maha ti a no ti lava; a na mninga mwanana wakwe wa m'horana kuva msikati wakwe, kasiku mulovisa; aniko ene kha na mbi timisela, kambe kha na mbi mlumba.

¹⁸Msana keto, a na hundulukela sitondoloni, e teka so tala sa kona; kambe mthangeli wokari a na heta txiruko txakwe, a na tshumeta txiruko txitimwi kwakwe.

¹⁹Sekoko a na hundulukela makhokholani ya ditiko dakwe apune, kambe a na gutwa, e wa, asi manwi kambe.

²⁰Se ka wukhalo wakwe, ku na vekwa mmwani wu a no tsimbitisa msengisi ngu wudhundo wa mfumo; aniko mndani ka masiku amadotho a na loviswa, kambe keto ku si ngani txiviti, ku si na kulwa.

²¹Msana keto, ku na emiswa ka wukhalo wakwe wamwamna wo soleka, wa kuva a nga mbi ningwa madingano a wukoma; se a na humelela a di malate, e ta teka mfumo ngu wurindi.

²²Se ngu mawoko amangi, va na thaviswa masoni kwakwe; kambe va na fuviswa kufana ni mthangeli wa txitumelelano.

²³Se msana ka txitumelelano nayo, a na thumisa wurindi; kambe a na kwelela e tsaniswa ngu vathu vavadotho.

²⁴A nata kambe ku di malate ka makhalo o nona ngutu a ditiko, e ta maha ti ti sikhaliko kumahwa ngu vatate vakwe, hambi vakokwani vakwe; a na abanisela txuma, ni si si nga handwa, ni thomba, kambe a na maha mithumo yo wukela mikhokhola, aniko ngu mbimo yokari.

²⁵Se a na wusa mtamo wakwe ni mbilu yo wukela mfumeli wa Wulambwe, ngu dibutho da hombe, se mfumeli wa Wulambwe a na lwa yimbi ni dibutho da hombe ta mtamo ngutu; aniko kha na mbi timisela, nguko va na maha makungo o muwukela.

²⁶Se vale vadyako sakudya sakwe va na mlovisa; se dibutho dakwe da yimbi di na hangalaka, kambe ku na dawa votala.

²⁷Kambe vafumelivo vavambidi va na va ni mbilu yo maha kubiha, ni kuwomba makuhu; ene koko kha na mbi kula, nguko magwito ma na zivaneka ngu mbimo ya kona.

²⁸Sekoko a na tshumelela ditikoni kwakwe ni thomba yayingi, se mbilu yakwe yi na wukela txitumelelano txo sawuleka; kambe a na maha ti a no ti lava, aniko e tshumelela ditikoni kwakwe.

²⁹Ka mbimo ya kona, a na tshumela e ta wukela va Wulambwe; kambe txikhati txiya kha txi na mbi fana ni txo khata.

³⁰Nguko ku nata sitimela sa Kitimi, si txi ta muwusela kupandiseka; se a na tshumela e henya e wukela txitumelelano txo sawuleka, kambe a na maha ti ti mtsakisako; ni ku a na tshumela e xayisa avale va nova va di lekile txitumelelano txo sawuleka.

³¹Se ku na huma mitamo yokari yi txiya kwakwe, yi txiya nyenyezisa wukhalo wo sawuleka ni mikhokhola, kambe yi na fuvisa miphaxo ya ditshiku ni ditshiku, yi na veka tximaha txa kudhukisela ka hombe.

³²Se ka va wukeli va txitumelelano ene, ngu wukanganyisi wakwe a na va xenga, aniko vathu va vazivako Txizimu txawe va na tsana, ve lwa naso.

³³Se titxhari hagari ka vathu ti na gondisa votala; hambi keto, va na wiswa ngu ditxhari, ni mndilo, ni wukhumbi, ni kupa, mndani ka masiku o tala.

³⁴Se ngako va txi wa va na mana kuvhunwa ka kudotho, aniko votala va na patana navo ngu wukanganyisi.

³⁵Vokari ka titxhari va na wa ve dukwa, ni kusawulekiswa, ve basa, kala magwito ka mbimo, nguko i nava i di ngadi mbimo ya kona.

³⁶Se mfumeli wuwa a na maha madingano ni kuranda kwakwe, a na tiguleta, e tikulisa txitimwi ka sotshe sizimu; a na womba-womba wubihi ngu Txizimu txa sizimu, kambe a na humelela an'ze magwito ka kuhenya; nguko ti ti nga vekiswa ti na maheka.

³⁷Kha na mbi thava sizimu sa vatate vakwe, hambi kuxonipha lirando la vavasikati, mwendo ka txizimu txokari, nguko a na tikulisa txitimwi ka sotshe.

³⁸Aniko ka wukhalo wa txona a na khozela txizimu txa mikhokhola, a na khozela ngu nzalama txizimu txi txi nga mbi ziwa ngu vatate vakwe, ni silivhela, ni marigwi a lisima, ni siya sa lisima.

³⁹A na lwela mikhokhola yakwe ngu kuvhunetwa ngu vathu vale va khozelako txizimu txa vamatiko; ka vale va ti ningetetelako kwakwe, a na va engetela wudhundo, e va fumisa txitimwi ka votala, ni ku va abanisela ditiko ngu male.

⁴⁰Se ngu magwito ka mbimo, mfumeli wa Wulambwe a na lwa nayo, kambe mfumeli wa Wuphemba a na mtutumisa ngu sikotxikani, ni vagadhi va mahantxhi, ni sitimela so tala; se a na wulela ka matiko a txi ma fenengeta e pinda.

⁴¹Se a na wulela kambe ka ditiko do tshura, aniko matiko amangi ma na xaselwa, kambe Edhomi, ni Mowabhi, ni vahombe va vanana va ka Amoni va na huluka manzani kwakwe.

⁴²A na nawuluta dianza dakwe ka matiko, hambi ditiko da Egipta kha di na mbi huluka.

⁴³Se a na honyola tithomba ta nzalama ni ta silivhela, ni sotshe siya sa lisima sa Egipta; se Valibhiya ni Vaetiyopiya va na mlondisa.

⁴⁴Aniko mhaka yi yi no huma ngu Wutxani ni Wuphemba yi na mu karata; se a na huma a di henyile ngutu, kuya xasela ni kudayela votala.

⁴⁵A na gwimba matenda akwe a wukoma hagari ka Linene la hombe, ka mmango wo sawuleka wo tshura ngutu, kambe a naya gwitelwa, kupwateka ni wo m'vhuna.