Read chopi Dhaniyeli 2 Bible Online

Dhaniyeli 2 - chopi bible

Dhaniyeli 2

¹Ka dilembe da wumbidi da kufuma ka Nebhukodhonosori, Nebhukodhonosori a to lora miloro yokari, se moya wakwe wu to karateka, kuza kuhangalaka ni wukohe wakwe.

² Se mfumeli a to dhana titxhari, ni vahuti, ni vanyatixolwe, ni va Vakaldheya kasiku ve ta txhamusela mfumeli, mloro wakwe; se vona va to ta tikombisa masoni ka mfumeli.

³Se mfumeli a to khene kwawe: “Ni lorile, se moya wangu wa xaniseka ngu kulava kuziva txhamuselo ya mloro wuwa.”

⁴Se Vakaldheya va to kha vona ka mfumeli ngu txisiriya: Awe mfumeli, hanya kala kupinduka! Hi gela mloro athu sithumi sako, hi na wutxhamusela.

⁵Se mfumeli a to xamula Vakaldheya a txi khene: A ti ninga lora ti mwalate! Kambe, ngako mi txi tandeka ku ni gela mloro ni txhamuselo ya wona, mi na phatulelwa, ni tinyumba tanu ti na mahwa matala.

⁶Kambe ngako mi txo ni gela mloro wangu, ni txhamuselo ya kona, ni na mi ninga siningo, ni sibongelo, ni wudhumo wa hombe; ngu kumaha keto, ni geleni mloro wangu, ni txhamuselo ya kona.

⁷Va to xamula da wumbidi va txi kha vona: Awe mfumeli, hi gele mloro athu sithumi sako, hi na kugela txhamuselo ya kona.

⁸Mfumeli a to xamula, a txi khene: Na tiziva to mi lava ku ni tekela mbimo, nguko ma ti wona ti to a ti ni nga lora, ti ni mwalalete.

⁹Ngako mi txo tandeka kutxhamusela mloro wangu, ni na milamula ngu kumweko; nguko anu mi lavile mapswi a makuhu, o biha kasiku ta ma womba masoni kwangu, yi za mbimo yi guma; se ni geleni mloro, kasiku na ti pima taku mi na nininga txhamuselo ya kona.

¹⁰Vakaldheya va to xamula masoni ka mfumeli, va txi kha vona: Kha ngaho ni wammweyo ha mafuni, a nga sikotako kutxhamusela timhaka ta mfumeli; nguko kha ku ngani mfumeli ni wammweyo, nyamne mwendo mkhozisi, wolava to nga eto ka txhari yokari, tiñanga mwendo Vakaldheya.

¹¹Nguko a ti mfumeli a ti lavako ta karata, kambe kha ngaho ni wammweyo a sikotako kuwomba ka mfumeli, hahanze ka sizimu sile si si zumbiko hagari ka vathu.

¹²Sekoko mfumeli a to henya ngutu e pandiseka; e leletela ti to kudawa totshe titxhari ta Bhabhilona.

¹³Se ku to huma mthetho waku titxhari totshe ti fanela kudawa; se va to lava Dhaniyeli ni vangana vakwe, kasiku veya dawa.

¹⁴Sekoko Dhaniyeli a to womba-womba ngu wudhota ni wutxhari ka Ariyoki, mthangeli wa vawoneleli va mfumeli, awule a nga ti humile kuya daya titxhari ta Bhabhilona.

¹⁵A to xamula a txi khene ka Ariyoki, nduna ya mfumeli: Wu kuluvetisa kutxani mthetho wo ta ngu ka mfumeli kani? Sekoko Ariyoki a to txhamusela mhaka ka Dhaniyeli.

¹⁶Se Dhaniyeli a to wulela e kombela ka mfumeli ku e mninga mbimo yo ta mtxhamusela mloro.

¹⁷Sekoko Dhaniyeli a toya nyumbani kwakwe eya zivisa mhaka ka vangana vakwe Hananiya, ni Misayeli, ni Azariya,

¹⁸kasiku ve kombela wumbilu ka Txizimu txa nzumani, madingano ni txihunja txiya, ti to Dhaniyeli ni vangana vakwe va si loviswi kumweko ni titxhari ta Bhabhilona.

¹⁹Sekoko txihunja txi to wonekiswa ka Dhaniyeli, amu ka mloro, ni wusiku; se Dhaniyeli a to dhumisa Txizimu txa nzumani.

²⁰Dhaniyeli a to womba, a txi khene: “Di na dhumiswe ditina da Txizimu ngu ha ku si gwitiko” nguko wuzivi ni mtamo, nza Txizimu;

²¹Ngu txona txi hundulusako timbimo ni sikhati; txa thavisa ni kuveka vafumeli ha situluni kwawe; ngu txona txi ningako wuzivi ka sizivi ni wutxhari ka titxhari.

²²Txi wonekisa timhaka totshe ti ti ku kusisalani, txi ziva totshe ti ku txidemani, ni liwoningo li zumba ni Txizimu.

²³Awe Txizimu txa vatate vangu, na kudhumisa ni ku kubonga, nguko u ni ningile wutxhari ni mtamo; kambe konkuwa, u ni zivisile a ti hi nga kukombelo, ngu ku hi maha hi ziva mhaka yiya ya mfumeli.

²⁴Ngu mhaka yeto, Dhaniyeli a toya ka Ariyoki, awule mfumeli a nga ti msawute ti to e dayela titxhari ta Bhabhilona, a to wulela a txi m'gela ku khene: U nga thuke u daya titxhari ta Bhabhilona, aniko ni yise masoni ka mfumeli, kasiku ni txiya mninga txhamusela ya mloro.

²⁵Sekoko Ariyoki a to kuluveta e yisa Dhaniyeli masoni ka mfumeli a txi khene kwakwe: Ni mani mmweyo hagari ka vanana va tikhumbi ta ka Judha, awu a no txhamusela mloro wa mfumeli.

²⁶Mfumeli a to wotisa Dhaniyeli (awule ditina dakwe i nga ti ti Bheltexazari) a txi khene: “Ina awe u nga sikota ku ni zivisa mloro wangu, ni txhamuselo ya wona kani?”

²⁷Dhaniyeli a to xamula masoni ka mfumeli, a txi khene: Txihunja txi mfumeli a txi lavako, kha ku na titxhari, mwendo vahuti, hambi tiñanga, va nga sikotako kutxhamusela ka mfumeli.

²⁸Aniko ku ni Txizimu tximwetxo nzumani, txi txi zivisako sihunja; ngu txona txi nga zivisa mfumeli Nebhukodhonosori ti ti no humelela ka masiku a matako. Mloro wako ni siwoniso si u nga si wona ha m'bhedhuni kwako ngu siya:

²⁹Awe mfumeli u di ha m'bhedhuni kwako, u to telwa ngu mialakonyo ya timhaka ti ti no humelela ka masiku matako. Awule a zivisako sihunja, a kuzivisile ti ti no maheka.

³⁰Se ani ni wonisilwe txihunja txiya, na i si nga ngu ku ani no va ni wutxhari wa hombe kupinda votshe vathu, aniko kasiku txhamuselo ya kona yi hoka ka mfumeli, ni ti to u pfisisa maalakanyo a mbilu yako.

³¹Awe mfumeli, u to wona txithombe txa hombe; txithombe etxo, i nga ti ti txa hombe, ni kuphatima ngutu, txi di emile masoni kwako. Txithombe txa kona i ti txo thisa ngutu.

³²Msungo wa txithombe txile i ti ti wa nzalama yo hehuka; khana ni mawoko a txona nza silivhela; mrumbu ni tinyonga ta txona i ti sa koporo;

³³minenge ya kona i ti ti ya sikete, ni mikondo ya txona i ti ya txikete txo patwa ni dibumba.

³⁴U ti ti wona eto mbimo yile ku nga wilwa dirigwi, ku si woneki dianza di di nga khundumusa txithombe ka mikondo ya sikete ni ya dibumba, txi txi koyolela.

³⁵Sekoko txi to koyolelwa kumweko ni txikete, ni dibumba, koporo, silivhela ni nzalama, asi si nga maneka nga mtungu wa timbimo ta kuoma, se moya wu si huhisa, kambe kha wa maneka wukhalo ni wawumwewo wo si lumba; aniko dirigwi di di nga khundumusa txithombe mmumbu wa hombe, di tata otshe mafu.

³⁶Se mloro wa kona ngu wuwa; ni txhamuselo ya kona hi na yi womba masoni ka mfumeli.

³⁷Awe mfumeli, u mfumeli wa vafumeli, awu Txizimu txa nzumani txi nga mninga mfumo, ni wuhombe, ni mtamo, ni wudhumo.

³⁸Se ni hani ha kuzumbako kona vanana va vathu, sihari sa txitinga ni sinyana sa nzuma, Txizimu txi si ningete manzani kwako, txi kumaha u fuma txitimwi ka sona sotshe; awe u msungo wa silivhela.

³⁹Se msana kwako, ku na wuka wumwani mfumo, wa wudotho ka wako, se mfumo wa wuraru mbwa simbi, awu wu no fumo txitimwi ka otshe mafu.

⁴⁰Se mfumo wa wumune wu na va wa mtamo kufana ni simbi, wu na khundumusela ni kufayetela sotshe, kufana ni simbi yi yi khundumusako ni kufayetela sotshe.

⁴¹Se ka sile u nga si wona, mikondo ni titiho, didhawa da dibumba da muwumbi, ni didhawa dimwani da simbi, ewo i nava mfumo wo abaniswa; hambi keto, ku nava ni txokari txo tsana txa simbi, nguko u woni simbi yo patwa ni dibumba da ndope.

⁴²Se ngako titiho ta didhawa i nga ti ti ta simbi, dimwani didhawa i di ta dibumba, ngu kumaha keto didhawa da mfumo wu na va wo tsana, se dimwani didhawa wu na va wu sa tsana.

⁴³Se ka sile u nga si wona sa simbi yo patwa ni dibumba da ndope, va na patana ngu kutekana, aniko kha va na mbi pfana, nga kule simbi yi si pataniko ni dibumba.

⁴⁴Aniko ka masiku a vafumeli vale, Txizimu txa nzumani txi na wusa mfumo wu wu no mbi dhuka wu khundumuswa; se mfumo ewo kha wu na mbi pinda wuya ka vamwani vathu, wu na balisela ni kuheta yotshe mifumo eyo, kambe wu na zumba ngu ha ku sigwitiko.

⁴⁵Nga tile u nga wonisa tona taku ngu mmangoni ku witwe dirigwi, na ku si woneki dianza, ni ku dona di balisete simbi, koporo, dibumba, silivhela ni nzalama, Txizimu txa hombe txi zivisile ka mfumeli a ti ti no maheka msana keto; se mloro wuwa wu tsani, ni txhamuselo ya wona yi thembekile.

⁴⁶Sekoko mfumeli Nebhukodhonosori a to wa ngu mbanza yakwe, e khozela Dhaniyeli, e leleta ti to Dhaniyeli e mahelwa mningelo wa sakudya, ni kuhiselwa dibaselo.

⁴⁷Mfumeli a to xamula ka Dhaniyeli, a txi khene: Ngu ditshuri, Txizimu txanu, Njizimu txa sizimu, kambe MKOMA wa vafumeli, ngene m'zivisi wa sihunja, nguko u sikoti kuwonekisa txihunja txiya.

⁴⁸Sekoko mfumeli a to kulisa Dhaniyeli, e mninga siningo sasingi sa hombe, e m'veka kuva mfumeli wa ditiko dotshe da Bhabhilona, ni kuva mfumeli wa hombe wa totshe titxhari ta Bhabhilona.

⁴⁹Se Dhaniyeli a to kombela ka mfumeli ku e veka Xadreke, Mixake ni Abhedhi-Nego kuva vathangeli va mabhindu a ditiko da Bhabhilona, aniko Dhaniyeli a to zumba ka sike sa mfumeli.