Read chopi Dhaniyeli 3 Bible Online

Dhaniyeli 3 - chopi bible

Dhaniyeli 3

¹Mfumeli Nebhukodhonosori a to maha txithombe txa nzalama, txi txi ku ni kulapha ka mtxhanu wa magumi ni dimwedo a mikono, ni kuanama ka mtxhanu wa mikono ni wumweyo, eya txi emisa thembweni ka Dhura; ditikoni ka Bhabhilona.

²Mfumeli Nebhukodhonosori a to sengeleta tinganakana, ni va vafumeli ni vathangeli, ni valamuli, ni vaxayisi va timale, ni madhota, ni vathangeli va mabutho a yimbi, ni votshe vafumeli va matiko a hombe, kasiku ve ta tsakela txithombe, txi mfumeli Nebhukodhonosori a nga ti txi emisile.

³Sekoko ku to sengeletana tinganakana, vafumeli, ni vathangeli, valamuli, vaxayise va timale, madhota, vathangeli va mabutho a yimbi, ni votshe vafumeli va matiko a hombe, ku ta tsakela txithombe txile mfumeli Nebhukodhonosori a nga ti txi emisile, se va ti emile masoni ka txitxhombe txile Nebhukodhonosori a nga ti txi emisile.

⁴Se m'zivisi wa timhaka a to kwangula ngu dipswi do guleka, a txi khene: Kugelwa anu mifumo, ni nanu matiko, ni vathu va totshe tidimi:

⁵Ngako mi txipfa diguwa da mpundu, ni da msengele, ni da dikhombela, ni da ngoma, ni da fineti, ni da tshodi, ni da totshe tixaka ta sivetaveta, mi na khizama mi khozela txithombe txa nzalama, txile mfumeli Nebhukodhonosori a nga txi emisa.

⁶Se ni wuhi a no lamba kukhizama e txi khozela, ka mbimo yoneyo a na rinzwa mndani ka txikho txa mndilo wu wu turako ngutu.

⁷Ngu kumaha keto, ngako otshe matiko, ni mifumo, ni vathu va totshe tidimi va di pfite mpfumawulo wa mipundu, ni wa sitende, ni wa makhombela, ni wa tingoma, ni wa totshe tixaka ta sivetaveta va to khizama ve khozela txithombe txa nzalama txile mfumeli Nebhukodhonosori a nga ti txi emisile.

⁸Se ka mbimo yoneyo, ku to tshuketa vavamna vokari va Vakaldheya ve ta mangalela Vajudha.

⁹Se va to womba va txi kha vona ka mfumeli Nebhukodhonosori: Awe mfumeli, hanya kala kupinduka!

¹⁰Awe mfumeli u humisile mthetho waku votshe vathu vale va no pfa diguwa da mpundu, ni da txitende, ni da dikhombela, ni da ngoma, ni da totshe tixaka ta sivetaveta, va na khizame ve khozela txithombe txa nzalama;

¹¹se ni wuhi a no mbi khizama e txi khozela, a na rinzwa mndani ka txikho txa mndilo wu wu turako ngutu.

¹²Ku ni vavamna vokari va Vajudha, avale u nga va veka ku ve thangela mabhindu a didhoropa da Bhabhilona: Xadreke, Mixake ni Abhedhi-Nego; vavamna vava, awe mfumeli, kha va kuxoniphi, kha va thumeli sizimu sako, hambi txithombe txa nzalama txile u nga txi emisa, kha va txi khozeli.

¹³Sekoko Nebhukodhonosori, ngu kuhenya ni txiviti, a to rumela kuya dhana Xadrake, ni Mixake, ni Abhedhi-Nego. Se vavamna vava va to tiswa masoni ka mfumeli.

¹⁴Nebhukodhonosori a to va wotisa, a txi khene: Ni geleni awe Xadreke, ni Mixake, ni Abhedhi-Nego, i na mo maha khakwenye kulamba kuthumela sizimu sangu, ni kukhozela txithombe txa nzalama, txile ni nga txi emisa, kani?

¹⁵Se konkuwa koko, mi txi lava kuhuluka, mbimo yi mi no pfa diguwa da mpundu, ni sitende ni tingoma ni makhombela ni titshodi, ni wa totshe tixaka ta sivetaveta, khizamani mi khozela txithombe txile ni nga txi maha, mi na va mi txi maha kwati; aniko ngako mi si txi khozeli, mi na rinzwa ka mbimo yoneyo, mndani ka txikho txa mndilo wu wu turako ngutu; se ngu txihi Txizimu txi nga sikotako ku mi txhatxhisa manzani kwangu kani?

¹⁶Xadreke, Mixake ni Abhedhi-Nego va to xamula mfumeli Nebhukodhonosori, va txi kha vona: Kha hi naveli kuxamula txilo txitimwi ka mhaka yiya.

¹⁷Wona taku Txizimu txathu, a txi athu hi txi thumelako, ngu txona txi no hi hulukisa; txona txi na hi hulukisa txikhoni ka mndilo wu wu turako ngutu, ni manzani kwako, awe mfumeli.

¹⁸Se hambi txi si hi hulukisi, tizive awe mfumeli, ti to athu kha hi na mbi thumela sizimu sako, hambi kukhozela txithombe txa nzalama txile u nga txi emisa.

¹⁹Sekoko Nebhukodhonosori a to tala ngu kuhenya, se khohe yakwe yi to thuvika yi wukela Xadreke, Mixake, ni Abhedhi-Nego; a to rumisa ti to txikho txi onzetelwa kupinda mtxhanu wa sikhati ni simbidi sa tolovelo.

²⁰Se a to ruma vavamna vokari va mtamo ngutu va dibutho dakwe da yimbi, kuya sunga Xadreke, ni Mixake, ni Abhedhi-Nego, ve va rinza amu ka txikho txa mndilo wu wu turako ngutu.

²¹Se vavamna vale va to sungwa ni majasi awe, ni sibhulukwana sawe, ni sigoko sawe, ni syambalo sawe, veya rinzwa hagari ka txikho txa mndilo wo tura ngutu.

²²Se ngako dipswi da mfumeli di nga ti nemete, ni txikho txi ti hisa ngutu, vavamna vale va nga rinza Xadreke, ni Mixake, ni Abhedhi-Nego va to dawa ngu m'dhikila wa mndilo.

²³Se vavamna vava va vararu, Xadreke, ni Mixake, ni Abhedhi-Nego, va to wa va di sungilwe amu ka txikho txa mndilo wo tura ngutu.

²⁴Sekoko mfumeli Nebhukodhonosori a to dhuka e khukha ngu kukuluveta; a txi khene ka vathangeli va yimbi yakwe: Ina athu kha ha rinza vavamna vararu va di sungilwe hagari ka mndilo kani? Va to xamula va txi kha vona ka mfumeli: U womba ditshuri mfumeli.

²⁵Mfumeli a to xamula, a txi khene: Ani koko, ni wona mune wa vavamna va di txhatxhilwe, va txi tsimbila-tsimbila mndani ka mndilo, kambe kha ku woneki ni ka kudotho va nga dawiswa; se txiemo txa wa wumune txi fanana ni txa mwanana wa sizimu.

²⁶Sekoko Nebhukodhonosori a to tshuketa haditimbani ka txikho txa mndilo wo tura ngutu; e kwangula a txi khene: “Xadreke, Mixake, Abhedhi-Nego, anu sithumi sa Txizimu Nyatxitimwi, humani, ngonani kheno!” Sekoko Xadreke, Mixake ni Abhedhi-Nego va to huma ngu hagari ka mndilo.

²⁷Se tinganakana, ni tinduna, ni vafumeli, ni vathangeli va yimbi ya mfumeli, va to sengeletana ve wonetela vavamna vava, se va to wona taku mndilo kha wa mana mtamo txitimwi ka mimidi yawe; aha ko hambi msisi ni wawumwewo wa ha msungo kwawe wu sahya, hambi majasi awe kha ma txitxa, hambi kununga ka mndilo ku si pfali kwawe.

²⁸Se Nebhukodhonosori a to womba, a txi khene: Ku na bongwe Txizimu txa Xadreke, ni Mixake, ni Abhedhi-Nego, txile txi nga rumela Ngelozi ya txona ku ta hulukisa sithumi sa txona, sile si nga themba ka txona, nguko kha va lava kulondisa dipswi da mfumeli, ve tumela kuningela mmidi yawe, kasiku va si thumeli hambi kukhozela tximwani txizimu txokari, hahanze ka Txizimu txawe.

²⁹Ani koko na veka mthetho, awu votshe vathu, matiko, tidimi, va no womba wubihi ngu Txizimu txa Xadreke, ni Mixake, ni Abhedhi-Nego, va na gangelwe, ni tinyumba takwe ti na mahwe matala; nguko kha ku na tximwani txizimu txi sikotako kuhulukisa kufana ni txiya.

³⁰Sekoko mfumeli a to kulisa Xadreke, ni Mixake, ni Abhedhi-Nego, ka ditiko da hombe da Bhabhilona.