Read chopi Dhaniyeli 6 Bible Online

Dhaniyeli 6 - chopi bible

Dhaniyeli 6

¹Dhariyo a ti woni i di tinene kuveka 120 wa vafumeli, txitimwi ka wotshe mfumo wakwe;

²se txitimwi kwawe a to veka vathangeli vararu, mmweyo wawe i ti ti Dhaniyeli, ati taku vafumeli va na yisa mibiko ka vona, kasiku mfumeli asi kanganyiswi ngu txilo.

³Sekoko Dhaniyeli wuwa a ti pinda vathangeli ni vafumeli, nguko kwakwe ku ti ti ni moya wa wunene; se mfumeli a to pimisa ku m'veka kuva mthangeli txitimwi ka wotshe mfumo.

⁴Sekoko vathangeli ni vafumeli, va to lava nzila yo wukela Dhaniyeli ngu mhaka ya mfumo; kambe kha va mana nzila hambi mnandu ni wawumwewo; nguko ene a ti thembekile, aniko kwakwe kha kwa maneka wubihi mwendo mnandu.

⁵Sekoko vavamna vava, va to kha vona: Kha hi na mbi mana mhaka ni ya yimweyo yo wukela Dhaniyeli, ngako hi si lavi ku mwukela ngu mlayo wa Txizimu txakwe.

⁶Sekoko vathangeli vava ni vafumeli, va to tsula votshe ka mfumeli, va txiya kha vona kwakwe: Awe mfumeli Dhariyo, hanya ngu ha ku sigwitiko!

⁷Votshe vathangeli va mfumo, vafumeli ni vafumeli va ditiko, vathangeli va yimbi, ni vafumeli va matiko a hombe, va to sunga txikungo, kasi kuveka txileleto txa wukoma ni kutsanisa mlayo wuwa, waku: Ni wuhi wuwa mndani ka magumi mararu a masiku a no maha txikombelo ka txizimu txokari mwendo ka m'thu wokari, na i si nga kwako, awe mfumeli, a na rinzwe diphalani ka tingonyamo.

⁸Konkuwa koko, awe mfumeli, tsanisa txileleto, u sayina mibhalo, kasiku txi si txitxwi, madingano ni mlayo wa Vamedhi ni wa Vapersa, wu si dinganiko kutxitxwa.

⁹Ngu mhaka yiya, mfumeli Dhariyo a to sayina mibhalo yiya ni txileleto.

¹⁰Se mbimo yi Dhaniyeli a nga ziva ti to mibhalo yi sayinilwe, a to wulela nyumbani kwakwe, (kambe ku ti ti ni mafasitela o rendekela didhawa da Jerusalema ma nga ti ti tutwe), e khizama kuraru ngu ditshiku, e kombela, a txi ninga kubonga masoni ka Txizimu txakwe, kufana ni tile a nga ti tolovela kumaha.

¹¹Sekoko vavamna vale va to tsula votshe, veya mana Dhaniyeli a txi kombela, ni kudila, masoni ka Txizimu txakwe.

¹²Sekoko va to ya ti kombekisa ka mfumeli, va txi kha vona: Madingano ni mlayo wa wukoma, ina khwa sayina txileleto txaku, ni wuhi wule a no maha txikombelo ka txizimu txokari, mwendo ka m'thu wokari, mndani ka magumi mararu a masiku, na i si nga kwako, awe mfumeli, a na rinzwa diphalani ka tingonyamo kani? Mfumeli a to xamula, a txi khene: Mhaka yiya yi tsani, madingano ni mlayo wa Vamedhi ni Vapersa, wu si dinganiko kutxitxwa.

¹³Sekoko va to xamula masoni ka mfumeli, va txi kha vona: Dhaniyeli i ku mmweyo wa vale va nga tiswa ngu ditikoni ka Judha, kha kuengisi, awe mfumeli, hambi txileleto txi u nga sayina; ati mahela mikombelo yakwe kuraru ngu ditshiku.

¹⁴Ngako mfumeli a di pfite mhakeyo, a to pandiseka ngutu mbiluni kwakwe, a to thuma kuza ditambo diswa, a txi lava wutxhari wo hulukisa ngu wona Dhaniyeli.

¹⁵Se vavamna vale va to tsula votshe ka mfumeli, va txiya kha vona: Tizive awe mfumeli taku, mlayo wa Vamedhi ni Vapersa, ngu ti to ni txa tximwetxo txileleto mwendo txirumo txi tsaniswako ngu mfumeli, kha txi dingani kutxitxwa.

¹⁶Sekoko mfumeli a to leleta ti taku kutiswa Dhaniyeli, e rinzwa diphalani ka tingonyamo. Se mfumeli a to womba ka Dhaniyeli, a txi khene: “Txizimu txako, a txi u txi thumelako mbimo yotshe txi na kuhulukisa!”

¹⁷Ku to rindilitwa dirigwi di vhala txike txa diphala; se mfumeli e di vhala ngu txitambu txa ringi yakwe ni ya vahombe vakwe, kasiku ku si txitxwi txilo madingano ni timhaka ta Dhaniyeli.

¹⁸Sekoko mfumeli a to khukha eya nyumbani kwakwe ka wukoma, e ti tona wusiku wotshe, kambe kha tumela taku ve mu tisela sivetaveta sa wuembeleli; ni wukohe wu to hangalaka.

¹⁹Se mfumeli a to wuka ni mixo ngu kukuluveta, eya diphalani ka tingonyamo.

²⁰A di hokile diphalani, a to dhana Dhaniyeli ngu dipswi da kuxaniseka, a txi khene: Dhaniyeli, awe txithumi txa Txizimu txi txi hanyako! Ina Txizimu txako txi u txi thumelako masiku otshe, txi sikoti ku kuhulukisa ka tingonyamo, kani?

²¹Sekoko Dhaniyeli a to khene ka mfumeli: Awe mfumeli, hanya ngu ha ku sigwitiko!

²²Txizimu txangu txi rumete Ngelozi ya txona yi ta vhala sisofu sa tingonyamo, kasiku ti si ni mahi txilo, nguko ni manekile ni si na mnandu masoni ka Txizimu; hambi masoni kwako, awe mfumeli, kha ni khali kumaha wubihi ni wawumwewo.

²³Sekoko mfumeli a to tsaka ngutu, e rumisa ti taku Dhaniyeli e humiswa diphalani ka tingonyamo; ngu kumaha keto, Dhaniyeli a to humiswa diphalani, se ve mana ti taku kha dawiswa ni ka kudhoto, nguko a ti khotwe ka Txizimu txakwe.

²⁴Se mfumeli a to rumisa taku kunehwa vavamna vale va nga lumbeta Dhaniyeli, se vona ni vanana vawe, ni vasikati vawe, va to rinzwa diphalani ka tingonyamo, se tingonyamo ti va khamukela, na va sanzi kuhoka hahatshi ka diphala, ti va phatulela marambu otshe.

²⁵Sekoko mfumeli Dhariyo a to bhalela vathu va tixaka totshe, matiko ni vathu va tidimi to hambanelana, va zumbako kotshe ha mafuni, a txi khene: “Kudikha ku na ande hagari kwanu!”

²⁶Ni leleta ti to ka madhawa otshe a mfumo wangu, vathu ve na dhudhumele ni kuthava masoni ka Txizimu txa Dhaniyeli; nguko txona nji Txizimu txi hanyako, txi zumbako kala kupinduka, kambe mfumo wa txona kha wu na khundumuswa; ni kufuma ka txona kha ku na mbi va ni magwito.

²⁷Txizimu txa hanyisa ni kuhulukisa, txa maha sikombiso ni si xamaliso nzumani ni ha mafuni; Ngu txona txi nga hulukisa Dhaniyeli ka mtamo wa tingonyamo.

²⁸Dhaniyeli wuwa, koko, a to humelela ka mbimo ya kufuma ka Dhariyo ni ya kufuma ka Siro, Mupersa.