Read chopi Dhaniyeli 9 Bible Online

Dhaniyeli 9 - chopi bible

Dhaniyeli 9

¹Ngu dilembe do khata da Dhariyo, mwana Asuwero, wa ditiko da Vamedhi, wule a nga ti mahilwe mfumeli txitimwi ka mfumo wa Vakaldheya.

²Ka dilembe do khata da kufuma kwakwe, ani Dhaniyeli, ni to pfisisa ngu mu ka mabhuku, ti taku mtengo wa malembe ale MKOMA a nga khene ka mprofeti Jeremiya, Jerusalema ku na xaselwa mndani ka mtxhanu wa magumi ni mambidi a malembe.

³Se ni to rendekelisa khohe yangu ka MKOMA Txizimu, kasiku ni txi mlava ngu mikombelo ni mikhongelo, ni ti tona sakudya, ni ambala nguwo ya disaka, ni ku ti theletela dikhuma.

⁴Se ni to khongela ka MKOMA, Txizimu txangu, ni ti tshanza, ni txi khani: Yowe! MKOMA! Txizimu txa hombe, txo thaviseka, awe u xayisako txitumelelano ni wumbilu, ka vale va kurandako, va xayisako sirumo sakwe;

⁵hi onhile, hi mahile to biha, hi tsimbite ngu kuonhetela, kambe hi eyisile, hi lekile sirumo sako, ni sileleto sako;

⁶aniko kha ha engisa sithumi sako, i ku vaprofeti, vale va nga womba-womba ngu ditina dako ka vafumeli vathu, ka vathangeli vathu, ka vatate vathu, ni ka votshe vathu va ditiko.

⁷Kulamula kulumba awe MKOMA, aniko kwathu ndingana ti wonekako nyamsi, tikhoheni kwathu; ka vavamna va ka Judha, ni vaaki va Jerusalema, ni dotshe ditiko da ka Israyeli; ka va hafuhi, ni ka va kule, ka otshe matiko ale u nga va hangalasa ka ona, ngu mhaka ya wuhambunyeti wawe, wule va nga kuhambunyeta ngu wona, ngu ku kuwukela.

⁸Awe MKOMA, athu, ni vafumeli vathu, ni vathangeli vathu, ni vatate vathu, hi lumbwa ngu tingana, nguko hi kuonhete.

⁹Wumbilu ni kudivalela si lumba MKOMA, Txizimu txathu; nguko hi mueyisile, hi m'wukete.

¹⁰Kambe kha ha engisa dipswi da MKOMA, Txizimu txathu, kuva hi tsimbila amu ka milayo yakwe, yile a nga hi ninga ngu manza a sithumi sakwe, i ku vaprofeti.

¹¹Ina, votshe va ka Israyeli va ndakile milayo yako, va hambukile, va si engisi dipswi dako; ngu kumaha keto, txiruko, ni txixambanyo si si nga bhalwa ka Mlayo wa Mosi, txithumi txa Txizimu, si tshakunutilwe txitimwi kwathu; nguko hi kuonhete.

¹²Se ene a to tsanisa dipswi dakwe, dile a ngadi womba kwathu, ni ka valamuli vathu vale va nga ti lamula, ngu kutisa dikhombo da hombe txitimwi kwathu; ngu kumaha keto, mhaka yile yi nga humelela Jerusalema, kha yi khali kumaheka hahatshi ka yotshe nzuma.

¹³Dotshe dikhombo dile di hi wete madingano ni tile ti nga bhalwa Mlayoni ka Mosi; hambi keto, kha ha dila masoni ka MKOMA, Txizimu txathu, ngu kuleka sionho sathu, ni ti to hi xayisa wunene wako.

¹⁴Ngu toneto, MKOMA a xayisile dikhombo diya, se e di tisa txitimwi kwathu; nguko MKOMA, Txizimu txathu a lulamile amu ka mithumo yakwe yotshe yi a nga yi maha, kambe kha hi engisi dipswi dakwe.

¹⁵Kha ditshuri, awe MKOMA, Txizimu txathu, u nga humisa vathu vako ditikoni ka Egipta ngu dianza dako da mtamo, aniko u mana ditina, i ku ti ti wonekako nyamsi, hi onhile; hi mahile kubiha.

¹⁶Awe MKOMA, mandingano ni wotshe wululamo wako, ku na khukhe kuhenya kwako ni txiviti txako txitimwi ka dihoropani dako Jerusalema, ka mmango wako wo sawuleka; se ngu mhaka ya sionho sathu, ni ngu mhaka ya sihambunyeto sa vatate vathu, Jerusalema ni votshe vathu vako va hundukile txisekiso ka votshe vale va ku mabambe kwathu.

¹⁷Se konkuwa koko, awe Txizimu txathu, engisa mkombelo wa txithumi txako, ni kudila ka txona; khohe yako yi na woninge txitimwi ka wukhalo wako wo sawuleka wule wu nga hoxotwa, ngu kuranda ka MKOMA.

¹⁸Awe Txizimu txangu, namisa tinzeve tako u engisa; tula maso ako u wona marumbi athu, ni didhoropa di di dhanwako ngu ditina dako, nguko kha hi ya tisa kudila kwathu masoni kwako, ngu kululama kwathu, kambe ngu mhaka ya wumbilu wako wo tala.

¹⁹Awe MKOMA, engisa! Awe MKOMA, divalela! Awe MKOMA, hi pfisise, maha u nga swele; ngu kuranda kwako, awe Txizimu txangu; nguko didhoropa dako ni vathu vako va dhanwa ngu ditina dako.

²⁰Ni txi ngadi ni womba-womba ni kukombela, ni titshanza sionho sangu, ni sionho sa vathu vangu va ka Israyeli, ni txi veka kudila kwangu masoni ka MKOMA, Txizimu txangu, ngu mhaka ya mmango wo sawuleka wa Txizimu txangu,

²¹ni txi ngadi ni womba-womba mkombeloni, wamwamna Gabriyele, awule ni nga mu wona amu ka txiwoniso txangu do khata, a tota a txi puruma ngu kukuluveta, e ta ni gwesa ngu mbimo ya mphaxo wa minova.

²²Se a to ni laya, e womba kwangu, a txi khene: Dhaniyeli, konkuwa ni tile ku ta kumaha upfisisa txiwoniso txako.

²³Kukhatani ka mikombelo yako, ku humile txileletelo txi ani ni telako ku ta ku gela, nguko wa randeka ngutu; ngu toneto, xiyisisa kha kwati dipswi, u pfisisa txiwoniso.

²⁴Mtxhanu wa magumi ni mambidi a mavhiki ma emisetwe txitimwi ka vathu vako ni txitimwi ka didhoropa dako do sawuleka, kasi kufuvisa wuhambunyeti ni kuheta sionho, ni kubasisa wubihi, ni kutisa kululama ko mbi na magwito, ni kutsanisa txiwoniso ni txiprofeto, ni kutota Msawuleki wa vasawuleki.

²⁵Tizive u pfisisa, kukhukhela kuhumani ka txileleto txa kutshumetela ni kuaketa Jerusalema kala ka Mesiya, Mthangeli, ku nava ni mtxhanu wa mavhiki ni mambidi, ni mtxhanu wa magumi ni dimwedo a mavhiki ni mavhiki mambidi, magondo ni madhoropa si na aketwa; kambe ngu mbimo ya xomulo.

²⁶Se msana ka mtxhanu wa magumi ni dimwedo a mavhiki ni mavhiki mambidi, Mesiya a na thaviswa, kha na mbi vaho kambe; se vathu va mthangeli wule a nota, va na haxula didhoropa ni wukhalo wo sawuleka, kambe magwito a sona ma na fana ni dambi, ku nava ni yimbi kala magwito; si emisetwe kuhoxotwa.

²⁷Aniko ene a na tsanisa txitumelelano ni votala ngu divhiki dimwedo; se ka hafu ya divhiki a na emisa miphaxo ni miningelo ya sakudya; muhoxoti a nata ngu tibhapini ka vanyenyeki, kambe eto ngu ha ku sigwitiko; ni sile si nga emiswa si na theketwa txitimwi ka muxaseli.