Read chopi Hoseya 1 Bible Online

Hoseya 1 - chopi bible

Hoseya 1

¹ Dipswi da MKOMA di nga wombwa ka Hoseya, mwana Bheyeri, ka masiku a Uziya, Jothamu, Akazi, ni Ezekhiya, vafumeli va ka Judha, ni ka masiku a Jerobhowamu, mwana Jowasi, mfumeli wa ka Israyeli.

²Makhato a dipswi da MKOMA ngu ka Hoseya; MKOMA a to khene koko ka Hoseya: Tsula uya teka wamsikati wa wugelegele ni vanana va wugelegele; nguko ditiko di mahile wugelegele, ngu kutshuralela MKOMA.

³Se a to tsula eya teka Gomeri, mwanana wa dihorana wa Diblayimi, kambe ene a to khura txirumbu e m'velekela mwanana wa mfana.

⁴ Se MKOMA a to m'gela ku khene: “Mraye ditina daku i Jezireyeli; nguko mndani ka mbimonyana ni na photela mnoha wa Jezireyeli, txitimwi ka nyumba ya ka Jewu, ni lovisa mfumo wa nyumba ya ka Israyeli.

⁵Se ku na maheka taku, ka ditshiku donedo, ni funya wulaho wa Israyeli mkovani ka Jezireyeli.”

⁶Se a to tshumela e mana txirumbu e veleka mwanana wa dihorana; se MKOMA a to khene: “Mraye ditina daku i Lo-Ruwama; nguko ani kha ni na mbi tshumela kambe ni pfela wumbilu va nyumba ya ka Israyeli, aniko ni na va tekela sotshe.”

⁷Kambe na pfela wumbilu va nyumba ya ka Judha, aniko ni na va hulukisa ani MKOMA, Txizimu txawe; nguko kha ni na mbi va hulukisa ngu wulaho, hambi ngu ditxhari, mwendo ngu yimbi, ni mahantxhi kumbe ngu vagadhi va mahantxhi.

⁸Se msana ka kuva a di lumute Lo-Ruwama, a to khura txirumbu e veleka mwanana wa mfana.

⁹Se MKOMA a to khene: Mraye ditina daku i Lo-Ami, nguko anu kha mi nga vathu vangu, nani kha ni na mbi va Txizimu txanu.

¹⁰ Ngu kumaha keto, mtengo wa vanana va ka Israyeli u na nga mtxhefa wa lineneni, awule wu si pimwiko mwendo kubalwa; se ku na maheka tito, ka wukhalo wu va nga gelwa ku kha vona: Anu kha mi nga vathu vangu, va na kha vona: Anu mi vanana va Txizimu txi txi hanyako.

¹¹Se vanana va ka Judha ni vanana va ka Israyeli votshe va na sengeletana, ve ti emisela mthangeli mmweyo dwe, ve huma ditikoni; nguko di na va da hombe ditshiku da Jezireyeli.