Read chopi Hoseya 2 Bible Online

Hoseya 2 - chopi bible

Hoseya 2

¹“Gelani vananu mi txi khanu: Ami; ni tindiyanu mi txi khanu: Ruwama.”

²Khongotelani mame wanu, mkhongoteleni, nguko ene hi nga msikati wangu, se ani kha ni nga mwamna wakwe; a na hambane ni wugelegele khoheni kwakwe, ni wungango wakwe titshumbuni kwakwe.

³Kasiku ani ni si mleki a sa ambala txilo, ni m'veka kufana ni ditshiku dile a nga velekwa ngu dona, ni mmaha e fana ni txiwula, ni m'veka kufana ni ditiko da txihaha, ni m'daya ngu ditora,

⁴ni si pfeli wumbilu vanana vakwe, nguko vanana va wugelegele.

⁵Nguko mame wawe a mahile wugelegele, awule a nga va veleka a mahile mhaka ya tingana, nguko a khene: Na londetela singango sangu, sile si ni ningako sakudya sangu, ni mati angu, matoya a tinvuta ni linyu yangu, mafura angu ni sa kusela sangu.

⁶Ngu kumaha keto, wona taku ni na tsiva nzila yako ngu mipa, kambe ni na guleta diguma da makhukhu, kasiku asi mani tisoko takwe.

⁷Se a na londeta sigango sakwe, aniko kha na mbi si manela; a na si lava aniko kha na mbi si mana. Sekoko a na khene: “Ni na tsula, ni tshumelela ka mwamna wangu wo khata, nguko kona ni ti tshuko kupinda kuwa.”

⁸Ene koko, kha tizivi ti to ani ni mnigile sakudya, ni dosi, ni mafura, kambe ni muengetete silivhela ni nzalama, sile va nga maha ngu sona txithombe txa Bhahali.

⁹Ngu toneto, ni na mtekela mafaka angu, ngu mbimo yo funyela, ni vhinya yangu, ngu mbimo ya kona; ni na m'honyola matoya angu ni linyu yangu, sile a nga ti fenengeta ngu sona wumbwiri wakwe.

¹⁰Se konkuwa, ni na vhunungula wumbwiri wakwe masoni ka sigango sakwe, kambe kha ku na wu a no mtxhatxhisa manzani kwangu.

¹¹Se na heta kutsaka kwakwe kotshe, ni mibuso yakwe, ni kumeka ka mitxima yakwe, ni Masabbata akwe, ni yotshe mibuso yakwe.

¹²Se ni na onhetela mivhinya yakwe, ni mikuwu yakwe, yile a wombako ngu yona, a txi khene: Ayiya i hakhelo yi ni nga ningwa ngu sigango sangu; ani koko, ni na si hundula si maha txitinga, se si na dyiwa ngu sihari sa tshofu sa txitinga.

¹³Na mtsayisa ngu mhaka ya masiku a Bhahali, ale a nga m'hisela ngu ona dibaselo, a txi ti bombisa ngu singeda sakwe ni wusekenya mkoloni kwakwe, ni kulondetela sigango sakwe, aniko ani a ni divate, kuwomba MKOMA.

¹⁴Wonani taku, ani ni na mndinda, ni m'yisa txiwulani, ni ya womba-womba mbiluni kwakwe.

¹⁵“Ni na mninga mivhinya yakwe koneyo, ni mkova wa Akori, si maha txike txa kuthemba; se koneyo a na embelela kufana ni masiku a wuhorana wakwe, ni ku nga ditshiku dile a nga huma ngu ditikoni ka Egipta.”

¹⁶Se ku na maheka ka dona ditshiku dile, kuwomba MKOMA, ti to u ni dhana, ku khawe: “Mkatangu, kambe khu na mbi ni dhana kambe ku khawe: Bhahali wangu.”

¹⁷Ni na thavisa matina a va ka bhahali txisofuni kwako, ni matina awe kha ma na mbi khumbukwa kambe.

¹⁸Se ka ditshiku dile ni na maha ngu vona txitumelelano, ni sihari sa tshofu sa txitinga, ni sinyana sa nzumani, ni sihari so tsimbila ngu mrumbu sa ha mafuni; kambe ni na thavisa wulaho ni ditxhari, ni gumisa ni yimbi ditikoni, ni va maha ve zumba ngu kutsana.

¹⁹Se ni na kuteka u va msikati wangu ngu ha ku si gwitiko; na kuteka ngu kululama, ni wulamuli, ni wumbilu, ni wunene.

²⁰Se ni na kuteka ngu kuthembeka, kambe u na ziva MKOMA.

²¹Se ku na maheka ka dona ditshiku dile ani ni no xamula, kuwomba MKOMA, ani ni na xamula nzuma, kambe yona yi na xamula mafu.

²²Se mafu ma na xamula ka fulaho, ni ka dosi, ni ka mafura; sona si na xamula ka Jezireyeli.

²³ Ni na tiphayela ene ha mafuni, ni pfela wumbilu Lo-Ruwama; se ka Lo-Ami ni na khani: Awe u ditiko dangu! Se ene a na khene: Awe u Txizimu txangu!