Read chopi Hoseya 4 Bible Online

Hoseya 4 - chopi bible

Hoseya 4

¹Engisani dipswi da MKOMA, anu vanana va ka Israyeli, nguko MKOMA a ni kuhenyisana ni vaaki va ditiko, nguko kha ku na ditshuri, hambi wunene, mwendo kuziva Txizimu ha mafuni.

²Kova ni kuxambanya makuhu dwe, ni kuhemba, ni kudaya, ni wukhamba, ni wugango, va thuma kutheketa mnoha txitimwi ka minoha.

³Ngu kumaha keto, ditiko di na dila, ni wuhi wule a zumbako ka dona a na guma mtamo, ni sihari sa txitinga ni sinyana sa nzumani; hambi sihaka sa linene si na loviswa.

⁴Ngu kumaha keto, ku nga ni wo kaneta, mwendo kukawuka; nguko vathu vako va fana ni vale va kanetisanako ni mphaxeli.

⁵Ngu konaho, u nawa ni mitshikari, ni mprofeti a nawa ni wusiku kumweko ni nawe; kambe ni na lovisa mame wako.

⁶Vathu vangu va lovisilwe, ngu kule va nga pwata wuzivi; nguko awe u lambile wuzivi, se nani na kulamba, kasiku u si mahi mphaxeli masoni kwangu; akule u nga divala mlayo wa Txizimu txako, nanani ni na divala vanana vako.

⁷Nga ha vona va nga anda, ni ku ni onhela kwakwe nga kungi; ani ni na maha kudhundeka kwawe kuva tingana.

⁸Vadya sionho sa vathu vangu, kambe va navela ngutu wubihi wawe.

⁹Ngu toneto, nga ti vaku ngu tona vathu vangu, mphaxeli nene a nga toneto; ni na va tsayisa ngu mhaka ya mahanyelo awe, ni ku vaninga hakela ya mithumo yawe.

¹⁰Va nadya aniko kha va na mbi khura; va na geleza aniko kha va na mbi anda; nguko va lekile kurendekela MKOMA.

¹¹Kha mbi ti ñola, ni vhinya, ni wusuke si thavisa mapimo.

¹²Vathu vangu va wotisa ka tiphande tawe, se ndonga yawe yi va xamula, nguko moya wa wugelegele wa va kanganyisa, se vona va timela, va si ti veki hahatshi ka Txizimu txawe.

¹³Va phaxela titshokani ka mimango, ve hisa dibaselo txitimwi ka simangwana, hahatshi ka mikusu, ni ka mindonga yo tala ngu matshokoro a mitsudi yo tshamba; ngu toneto, mahorana anu ma geleza, ni va mamanyani vanu va maha wugango.

¹⁴Ani kha ni na mbi tsayisa vanana vanu vamahorana, vale va gelezako, hambi vamamanyani vanu, va txi maha wugango; nguko vavamna va kona ngu vona va ti pengisako ni magelegele, va phaxa kumweko ni vavasikati vo biha, se vathu vale va pwatako mapimo va na loviswa.

¹⁵Se awe Israyeli, u txi lava ku ti mwalata, Judha a nga ti ninge mnandu; mi nga teni Giligali, kambe mi nga kweleleni mi ya Bheti-Avheni, ni ku mi nga xambanyeni mi txi khanu: “MKOMA a hanyako.”

¹⁶Nguko va ka Israyeli va ni kanu kufana ni homu ya makati ya kanu; konkuwa MKOMA a na va dyisa kufana ni txinvutana ka wukhalo wo anama.

¹⁷Efrayime a ningetwe ka sithombe; mlekeni.

¹⁸Sa kusela sakwe si gumile, vona vaya masoni ngu ku timwalata; ngu ditshuri vathangeli vawe va randa tingana.

¹⁹Txihuhuri txi va fenengetile ngu tibhapi ta txona, kambe va nawa tingana ngu mhaka ya miphaxo yawe.