Read chopi Hoseya 5 Bible Online

Hoseya 5 - chopi bible

Hoseya 5

¹Engisani tiya anu vaphaxeli, engisani anu va nyumba ya ka Israyeli, engisani anu va nyumba ya mfumeli, nguko kulamula kuwa kulumba anu, wonani taku mi mahile mlawu ka Misipa, ni likoka lo gwimbwa txitimwi ka Tabhori.

²Sindaka-milayo sa relela siya hahatshi ngutu, amu ka kudaya; aniko ani na va mlayi wa vona votshe.

³Ani na m'ziva Efrayime, ni Israyeli kha sisali masoni kwangu; nguko konkuwa, awe Efrayime, u mahile wugelegele, se u ningetile Israyeli.

⁴Kha va lavi kululameta mithumo yawe, kasiku ve tshumelela ka Txizimu txawe; nguko moya wa wugelegele wu hagari kwakwe, kambe kha va zivi MKOMA.

⁵Kutikulisa ka va ka Israyeli ku na tikomba koko khoheni kwakwe; Kambe Israyeli ni Efrayime va nawa ngu mhaka ya kwa mbi lulama kwawe, se Judha a nawa kumweko navo.

⁶Vona va na tsula ni tinvuta tawe ni mathokazi awe a tihomu, kasi kuya lava MKOMA, aniko kha va na mbi mmana: Ene a khukhile kwawe.

⁷Ngu wubihi va ti hambukisile ka MKOMA, nguko va velekile vanana va wugango; se konkuwa, mtxima wo ngadi kumeka, u na va lovisa ni tithembwe tawe.

⁸Vetani dikhombela kona Gibheya, ni mpundu kona Rama; kwangulani ngutu kona Bheti-Avheni; Ti wonele msana kwako awe Bhenjamini.

⁹Efrayime a na xaselwa ngu ditshiku da kutsayiswa; Hagari ka tihunzu ta ka Israyeli, ni kombisile a ti ti nga lulama.

¹⁰Vathangeli va ka Judha, va fana ni va va ndakako mihingano; ni na tshakunuta koko, kuhenya kwangu txitimwi kwawe, nga mati.

¹¹Efrayime a ha kuxanisekani, ni kukarala ka mialakanyo, nguko a lavile kutsimbila ngu nzila yo biha.

¹²Ngu konaho, ka Efrayime ni na fana ni sumba, se ka nyumba ya ka Judha ni na fana ni kusina.

¹³Ngako Efrayime a di woni malwati akwe ni Judha txilonda txakwe, Efrayime a to kweletela eya Asiriya, se e rumela mtumi ka mfumeli Jerebhi; Kambe ene kha na mbi sikota ku mi kalamukisa ni kuholisa silonda sanu.

¹⁴Nguko ka Efrayime, ni na fana ni ngonyamo ni ku nga txingonyamwana ka nyumba ya ka Judha; Ani, ani ni na va phatulela ni tshumela ni tsula; ni na va rwala, kupwateka ni wo lamulela.

¹⁵Ni na tsula, ni tshumela ni wuya ka wukhalo wangu, kala kuza ve tipfa mnandu, ve lava khohe yangu; ngako vona va di kupandisekani, va na ni lava ngu mabimbi-kutxa.