Read chopi Hoseya 7 Bible Online

Hoseya 7 - chopi bible

Hoseya 7

¹Mbimo yile ani ni nga kalamukisa Israyeli, se ku tumbutwe wubihi wa Efrayime, kufana ni wubihi wa Samariya, nguko va mahile ta makuhu, se dikhamba di wulela, kambe mtxawa wa sigevenga wu txipa kheno hahanze.

²Kambe kha va wombi timbiluni kwawe ti to ani na alakanya wotshe wubihi wawe; konkuwa koko, va randelwa ngu mithumo yawe; ya woneka masoni kwangu.

³Va tsakisa mfumeli ngu wubihi wawe, ni ngu makuhu awe va tsakisa vathangeli.

⁴Vona votshe mba wugango: Va fana ni txikho txi txi nga dhivelwa ngu m'yoki wa mapawu, a emako kuonzetela mndilo, kukhukhela ka kuvhuwa ka mpupu, kala ku kukumuka.

⁵Se ngu ditshiku da mfumeli wathu, vathangeli va to lwala ngu kuthumiswa ngu vhinya; Ene a to gwimba dianza dakwe ni vatseketseli.

⁶Nguko va thumisa timbilu tawe kufana ni txikho, va txi tiriyela; wotshe wusiku m'yoki wa mapawu wa otela, aniko ni mixo a tura ku nga mndilo wa m'dhikila.

⁷Votshe va hisa kufana ni txikho, kambe va heta valamuli vawe; votshe vafumeli wawe va wite, kha ku na ni wammweyo hagari kwawe a ni dhanako.

⁸Efrayime a ti pata ni vathu vamwani; Efrayime tximbwanda txa kwa mbi phinduketwa.

⁹Vamatiko va mu haxulete ngu mtamo, kambe ene kha ti zivi; ni wunvi u mite txitimwi kwakwe, aniko ene kha ti zivi.

¹⁰Se kutikulisa ka Israyeli mbu fakazi masoni kwakwe; hambi keto, kha va na mbi tshumelela ka MKOMA, Txizimu txawe, hambi ku mlava ka totshe tiya.

¹¹Nguko Efrayime a fana ni txituvani txo divala, txa kwa mbi na mapimo; va dhana Vaegipta, veya Asiriya.

¹²Mbimo yile va no tsula, ni na gwimba likoka langu txitimwi kwawe, se ni va txhikisa ngu lona kufana ni sinyana sa nzumani; ni na va tsayisa, madingano ni ti va tolovelako ku tipfa ka msengeletano wawe.

¹³Dikhombo kwawe, nguko va ni tutumile; va na loviswi, nguko va ni lekile, ani ni va tirute kambe va hembile makuhu ngu ngani.

¹⁴Se kha va dila kwangu ngu timbilu tawe, kambe va txi keta va di hamatahoni kwawe; va tshanganete fulaho ni vhinya, aniko ani va ni tshuralete.

¹⁵Ani ni va gondisile, ni va tsanisa mawoko, kambe va pimisa kubiha ngu ngani.

¹⁶Vona va wuya, kambe kha va wuyeli Nyatxitimwi. Va ti mahile kufana ni wulaho wo kanganyisa; vathangeli vawe va dawa ngu ditxhari, ngu mhaka ya wulala wa lidimi lawe; atiya ti nava txisekiso ditikoni ka Egipta.