Read chopi Joyeli 1 Bible Online

Joyeli 1 - chopi bible

Joyeli 1

¹Dipswi da MKOMA, di nga rumelwa ka Joyeli, mwana Petuwele.

²Engisani tiya anu madhota, kambe pfisisani motshenu vaaki va ditiko: Ina ti humelete tiya ka masiku anu kani? Mwendo kambe ka masiku a vatate vanu kani?

³Xawutelani matimu awa ka vanana vanu, se vanana vanu ka vanana vawe, ni vanana vava ka limwani liveleko.

⁴Asi si nga siwa ngu mpungu, si dyitwe ngu humbi, se asi si nga siwa ngu humbi, si dyitwe ngu sitoto, ni si si nga siwa ngu sitoto, si dyitwe ngu titxhowani.

⁵Vhumukani anu madevi, mi dila; pekani huwa motshenu mi selako vhinya, ngu mhaka ya vhinya ya yiphya nguko ya thaviswa mkanani kwanu.

⁶ Nguko ditiko dimwani di kwelete ka ditiko dangu, da mtamo kambe da kwa mbi balwa; makwasa a dona, makwasa a ngonyamo, di ni titshaya to fana ni ta ngonyamo ya makati yo kumba.

⁷Di mahile m'vhinya wangu wu fuviswa, se di kwamute mabanzi a mkuwu wangu, se di kwamulete otshe, di txi ma tshotsha hahatshi; madhavi a wona di ma kwalalisile.

⁸Dila nga m'horana wotuma wo ambekwa masaka, ngu mwamna wa wuphya wakwe.

⁹Ku wilisilwe mningelo wa sakudya, ni sa kusela Nyumbani ka MKOMA; vaphaxeli, i ku sithumi sa MKOMA, va pandisekile.

¹⁰Thembwe yi fuvisilwe, se mafu ma ha kupandisekani; nguko fulaho yi fuvisilwe, vhinya ya yiphya yi omile, ni mafura ma pwateka.

¹¹Vadimi va ti thela tingana, vaphayi va vhinya va kuma ngu mhaka ya fulaho ni sevhadha; nguko kuelula ka thembweni ku gumile.

¹²M'vhinya wu omile, mkuwu wu wunile; mromani ni wona, ni mtxhese ni m'hapula; yotshe mindonga ya txitinga yi omile, hambi litsako li omile ka vanana va vathu.

¹³Ti khutareleni mi ti dilela anu vaphaxeli; kumani anu vathumeli va txiluvelo; wulelani mi pinda mi di ambate masaka, ni wusiku anu, vathumeli va Txizimu txangu; nguko miningelo ya sakudya ni sa kusela si nga wilwa, nza nyumbani ka Txizimu txanu.

¹⁴Ti sawuleleni kutitona, nuwelani ditshiku da kutsimbisela, sengeletani madhota ni votshe zumbako ditikoni muwa, Nyumbani ka MKOMA, Txizimu txanu, se mi txi dila ka MKOMA.

¹⁵ Yowe! Ditshiku dile! Nguko ditshiku da MKOMA di hafuhi, di nata kufana ni kufuvisa ka wu wa Mtamo-wotshe.

¹⁶Ina sakudya kha sa wilwa hi txi si wona kani? Kutsaka ni kuembelela, nyumbani ka Txizimu txathu kani?

¹⁷Mbewu yi sinete hahatshi, sisangala si haxutwe, mathala ma wisilwe, nguko fulaho yi omile.

¹⁸Eto si dilisako tona sifuyo! Mitxhambi ya tihomu ta vamakati ya kanganyiseka, nguko kha yi nga ni ko dya kona; ni yona mitxhambi ya tinvuta ya hetwa.

¹⁹Na dila kwako awe MKOMA, nguko mndilo wu hisile wudyiselo wa txiwulani, se dituro di tshokomisile yotshe mindonga ya txitinga.

²⁰Ni sotshe sihari sa txitinga sa dila kwako; nguko minambo yi omile, se mndilo wu hisile wudyiselo wa txiwulani.