Read chopi Joyeli 2 Bible Online

Joyeli 2 - chopi bible

Joyeli 2

¹Vetani mpundu aniya Siyoni mi dila ngu dipswi do guleka mmangoni kwangu ko sawuleka; va na dhudhumele votshe vaaki va ha mafuni, nguko ditshiku da MKOMA data, di hafuhi;

²ditshiku da txidema ni kupandiseka, da marefu ni txidema txo hangalaka; ku nga wuronga wo hangalaka txitimwi ka mimango, mbathu va hombe va mtamo ngutu, ava kukhukhela ka kale, kha va khali ku nga vaho, hambi msana kwawe kha va na mbi vaho ka malembe matako, ka liveleko ni liveleko.

³Masoni kwawe mndilo wa tshokomisa; se msana kwawe dituro da hisa; ditiko masoni kwakwe di fana ni thembwe ya Edheni, kambe msana kwakwe njiwula txo thisa; ina, kha ku na mbi huluka txilo.

⁴Zumbelo yakwe yi fana ni zumbelo ya mahantxhi; va na tutuma nga vagadhi va mahantxhi.

⁵Ku nga diguwa da sikotxikani titshokani ka mimango, va na ndaka-ndaka; nga diguwa da kutura ka mndilo, wu wu txhokomisako txihya va fana ni vathu va mtamo ngutu, va nga lulamiselwa kuya kulwani.

⁶Masoni kwakwe vathu va na thava, totshe tikhohe ti nga mtima wa khadi

⁷Va na tutuma nga tindena, nga vavamna va yimbi, va na kwela maguma; se mmweyo ni mmweyo a na tsula ngu nzila yakwe, kambe kha va na mbi hambuka ka litxhatxha lawe.

⁸Ni wammweyo kha na mbi kama mwanawe; mmweyo ni mmweyo a tsimbila ngu nzila yakwe; va na pinda ngu txitimwi ka ditxhari, aniko kha va na mbi dayiswa.

⁹Va na lwisa didhoropa, ve ndaka maguma, va na kwela ngu mafasitela tinyumbani, ve wulela nga makhamba.

¹⁰Masoni kwakwe, mafu ma na dhudhumela, nzuma yi na dekadeka; ditambo ni mtxima si na maha sa mtima, ni tinyeleti ti na thavisa kuphatima ka tona.

¹¹Se MKOMA wa guleta dipswi dakwe masoni ka masotxhwa akwe; nguko magovelo a kona nga mangi ngutu; nguko a ni mtamo, wu a mahako ti di nga womba dipswi da MKOMA; nguko ditshiku da MKOMA nda hombe kambe da thisa, se i mani waku a ngadi xanisa kani?

¹²Hambi keto, konkuwa, kuwomba MKOMA: Hundulukelani kwangu ngu mbilu yanu yotshe; totshe eto, ngu kutitona, ni kudila, ni huwa.

¹³Kambe vharulani timbilu tanu, i si nga syambalo sanu, se hundulukelani ka MKOMA, Txizimu txanu; nguko ene a ni wumbilu, ni kupfela, wa swela kuhenya, mbwa hombe ngu wumbilu, kambe wa tilaya ka wubihi.

¹⁴I mani a ti zivako taku Txizimu mwendo txi nga tshumela txi tilaya, ngu msana e mi ninga makatekwa, mi maha miningelo ya sakudya ni sa kusela, ka MKOMA, Txizimu txanu kani?

¹⁵Vetani mpundu kona Siyoni, sawulekisani kutitona, huwelelani ditshiku da kuyila.

¹⁶Sengeletani vathu, sawulekisani msengeletano, patani madhota, sengeletani timenzani ni vale va mamako; a na hume mteki ngu ndangani kwakwe ni mtekiwa ngu phanzekelani kwakwe.

¹⁷Va na dile vaphaxeli, va thumelako MKOMA, hagari ka m'hubhe ni txiluvelo, va ne kha vona: Tsetsa vathu vako, awe MKOMA, kambe u nga ningele thomba yako tinganani, kasi ku matiko ma txi yi xakela: Nguko kutxani va no kha vona ka vathu: Txi hayi Txizimu txawe, kani?

¹⁸Sekoko MKOMA a na pfela ditiko dakwe, kambe a na va ni wumbilu ka vathu vakwe.

¹⁹Se MKOMA a na xamula ka vathu vakwe, a txi khene: Wonani taku ni na rumela fulaho, ni vhinya yo lombela, ni mafura, mi na khura ngu sona, kha ni na mbi mi ningela kambe tinganani, hagari ka matiko.

²⁰Se awule i ku wa Wuphemba, ni na m'yisa kule ni nanu, ni na mtshotsha ka ditiko da kuoma, da txiwula; va masoni ni na va rinza ka Linene la wutxani, ni va msana kwakwe ka Linene la mswa-ditambo; kununga ni kusina kwawe ku na guleka; nguko a mi onhete ka hombe.

²¹U nga thave, awe mafu; tsaka ngutu u tsakisisa; nguko MKOMA a mahile silo sa hombe.

²²Mi nga thaveni anu sihari sa txitinga, nguko wudyiselo wa txiwulani wu na va mkungu, nguko mindonga yi na ninga mihando ya yona, vhinya ni mkuwu si na ninga mtamo wa sona.

²³Se anu vanana va Siyoni tsakani ngutu, mi tsaka ka MKOMA, Txizimu txanu, nguko ene a na mi ninga m'gondisi wa wululamo, kambe a na txhikisa mati a nzuma, mati a kukhata ka mtxima, ni o gwitisa.

²⁴Kambe tingula ti na tala ngu fulaho, se ku na thekelela vhinya ni mafura ngu mikawuni.

²⁵Ni na mi tshumetela malembe ale mi nga xaselwa ngu humbi, ni sitoto, ni mipungu, i ku dibutho dangu da hombe ni ngadi rumela kwanu.

²⁶Se mi na dya mi txi khura ngutu, mi dhumisa ditina da MKOMA, Txizimu txanu, a nga mi mahela sixamaliso; vathu vangu kha va na mbi ngadi ve thelwa tingana.

²⁷Se anu mi na tiziva ti to ani niho hagari ka Israyeli, ni ti to ani ngani MKOMA, Txizimu txanu, kha ku na mmwani kambe; ni vathu vangu kha va na mbi theleka tingana yotshe mbimo.

²⁸Se ku na maheka taku, ni tshakunuta Moya wangu txitimwi ka nyama yotshe, se vanana vanu va majaha ni vamahorana va na phorofeta, sikosana sanu si na va ni miloro, vavaphya vanu va na va ni siwoniso.

²⁹Hambi txitimwi ka sithumi sa txiwamna ni sa txisikati, ka ona masiku ale, ni na tshakunuta Moya wangu.

³⁰Kambe ni na kombisa sixamaliso nzumani ni ha mafuni, mnoha ni mndilo, ni tiphande ta wutshi.

³¹ Ditambo di na hinduka di maha txidema, se mtxima wu na maha mnoha, na di si se ta ditshiku da hombe da MKOMA.

³²Se ku na maheka taku, votshe vale va no khumbuka ditina da MKOMA, va na hanyiswa; nguko mmangoni ka Siyoni ni Jerusalema ku na veho kuthuseka, madingano ni ti a khalako kuwomba MKOMA, ni ka vamwani ava MKOMA a no va dhana.