Read chopi Joyeli 3 Bible Online

Joyeli 3 - chopi bible

Joyeli 3

¹Wona taku, ka oneyo masiku, ni ka mbimo yoneyo, ni no thavisa wukhumbi ka Judha ni ka Jerusalema,

²Ni na tshanganisa otshe matiko, ni txi ma releta mkovani ka Josafati, ni wulela nawo kulamulani, ngu mhaka ya vathu vangu ni thomba yangu Israyeli, awu vona va nga mu hangalasa hagari ka matiko, va txi ambanisa ditiko dangu.

³Va xaxuvile tixolo ka vathu vangu, ve ningela mfana ka digelegele, va xavisile dihorana ngu vhinya ve sela.

⁴Kambe mi ni mhaka muni ni nani awe Tiro ni Sidhoni, ni otshe madhawa a Fenikiya kani? Ngu yona hakhelo yi mi ni ningako kani? Nguko mi txi ni hakelisa tiya, ngu txikuluveta, ni na tisa hakhelo txitimwi ka misungo yanu.

⁵Mi tekile silivhela ni nzalama yangu, ni siya sangu so naveleka, ni kutshura mi txi si wuleta mathepelani kwanu.

⁶Mi xavisile vanana va ka Judha ni va Jerusalema ka vanana va Vagriki, kasi ku va yisa kule ni mihingano yawe.

⁷Wonani ti to ni na va thavisa ka wukhalo wu mi nga ya va xavisa ka wona, se ni na wisa hakhelo yanu txitimwi ka misungo yanu.

⁸Kambe ni na xavisa vanana vanu va mazambi ni vamahorana ngu manza a vanana va ka Judha, va no ya va xavisela ka va Sebha, ditiko da kwa mbi alakaywa, nguko MKOMA a wombile.

⁹Huwelelani eto ka matiko sawulekisani yimbi yokari; humisani tindena; kwelani mi tshuketelana, anu motshenu vavamna va yimbi.

¹⁰Mahani matxhari ngu mikwati yanu; ni mipaxwa ngu masikela anu; wa kwa mbi na mtamo a ne khene: Ni ni mtamo.

¹¹Patanani mi txi ta motshenu anu matiko a madhawani sengeletanani (MKOMA txhikisa tindena tako koneho);

¹²ma na khukhe ma txi ema matiko ma naye mkovani ka Josafati; nguko ni na khalahatsha koneyo ni lamula otshe matiko a madhawani

¹³Rinzani disikela nguko timbewu ti vitilwe; ngonani, relelani, nguko dipipa di tate ni mapipa ma thekelela; nguko wubihi wawe mbwa hombe.

¹⁴Mabutho, ni mabutho, mkovani ko Tsanisa! Nguko ditshiku da MKOMA di hafuhi, mkovani ko Tsanisa.

¹⁵Ditambo ni mtxima si na maha sa mtima ni tinyeleti ti na thavisa kuwonekela ka tona.

¹⁶ Se MKOMA a na bhonga a di Siyoni. Dipswi dakwe di na pfala Jerusalema, se nzuma ni mafu si na dhudhumela; aniko MKOMA a na va wuthavelo wa vathu vakwe ni mkhokhola wa vanana va ka Israyeli.

¹⁷Se anu mi na tiziva ti to ani ngani MKOMA, Txizimu txanu, ni zumbako Siyoni, mmangoni kwangu ko sawuleka; kambe Jerusalema a na va msawuleki; vamatiko kha va na mbiswa ve pinda ngu ka kona.

¹⁸Se ku na maheka taku ka ditshiku dile, mimango yi na vhelisa vhinya ya yiphya, simangwanani ku na khulunga masi, yotshe minambo ya ka Judha yi na va yi di tate ngu mati; se ku na huma txisima ngu Nyumbani ka MKOMA txi theletela mkovani ka Sitime.

¹⁹Egipta a na tshumela e va txisapa, se Edhomi a na va txiwula txa txiwunda, ngu kule va nga lwisa vanana va ka Judha ve theketa mnoha ka matiko a kona.

²⁰Aniko Judha ku na zumbwa ngu vathu yotshe mbimo, ni Jerusalema, ka liveleko ni liveleko.

²¹Se ni na sawulekisa mnoha wa va ni nga sa va sawulekisa: Nguko MKOMA a na zumba Siyoni.