Read chopi Amosi 8 Bible Online

Amosi 8 - chopi bible

Amosi 8

¹MKOMA Txizimu a to ni kombisa tiya: Ndiye thavangu ya mihando ya malanga.

²Se MKOMA a to khene: U wona txani awe Amosi kani? Se ani ni txi khani: I thavangu ya mihando ya malanga. Sekoko, MKOMA a to nigela, a txi khene: Kuhokile magwito ka vathu vangu va ka Israyeli: Kukhukhela kuwa kala kupinduka, na mbi ngadi ni pinda ngu kwawe.

³Kambe ditshiku diya wu embeleli wa mathepele u na engiswa, kuwomba MKOMA Txizimu. Sirumbi si na tala ngutu, si na tshotshwa va di malate ka otshe makhalo.

⁴Engisani tiya, anu mi navelako kuxanisa vo pwata, mi hoxota sisiwana sa ha mafuni,

⁵Mi txi khanu: U na pinda ditshiku muni m'buso wa kumeka ka mtxima, kasi ku hi txi na mana kuxavisa timbewu kani? Ni Sabbata ku hi na tula sizenda sathu sa fulaho, hi hungula efa, hi engetela mtengo wa mxavo, hi thumisa ngu kunemela sikalo so kanganyisa.

⁶Hi xava sisiwana ngu male, ni va vo mbi na txilo, hi va xava ngu mpatwa wa tikathula kani? M'sana keto, hi na xavisa makamba ya fulaho.

⁷A xambanyile MKOMA ngu wudhumo wa Jakobe a khene: Kha ni na mbi yi divala yotshe mithumo yakwe, ngu ha ku si gwitiko.

⁸Ditiko di na mbi zinginika ngu kona ha ka tiya kani? Kha va na mbi dila votshe va va hanyako ka dona kani? Kha ditshuri dotshe ditiko di na guleka ku nga mnambo wa hombe, di na ginyalatwa, di na nyuvela ku nga mnambo wa Egipta.

⁹Ku na maheka taku, ka ditshiku dileya, kuwomba MKOMA; na maha ta ku ditambo diva hagari se mafu ma maha mtema ngu mbimo ya mitshikari.

¹⁰Na phindula mibuso yanu yi maha txidilo, kotshe kuembelela kwanu ku na maha kutitsetsa, kuhumelela masaka ka makata anu ni ligwayi ha misungo kwanu, ni maha ti to a siya si txi nga mizila ya mwanana mmweyo wa dizambi, se magwitelo akwe ma na nga ditshiku da kupandiseka.

¹¹Wonani taku mata masiku, kuwomba MKOMA Txizimu, ni no rumela nzala ha mafuni, i si nga nzala ya sakudya mwendo ditora da mati, kambe do pfa dipswi da MKOMA.

¹²Ku na ya vo tsimbila-tsimbila ka linene limwani kala ka limwani, se ngu Wuphemba kala Wutxani: Va na tutuma kala ka otshe makhalo va txi lava dipswi da MKOMA, kambe va na mbi di mana.

¹³Ditshiku dileya, mahorana ni mazambi o tutuma ma na tsivala ngu ditora.

¹⁴Ava va xambanyako ngu wubihi wa Samariya va txi kha vona: Ndinene ngutu kuhanya ka txizimu txako awe Dhani; kambe ndinene ngutu kuhanya ka nzila ya Bherisebha; vonavo va nawa, kha va na mbi khukha kambe.