Read chopi Jona 1 Bible Online

Jona 1 - chopi bible

Jona 1

¹Se dipswi da MKOMA di to ta ka Jona, mwana Amitayi, di txi kha dona:

²Khukha, tsula ka Didhoropa da Hombe da Ninivha, u txi ya di kawuka, nguko wubihi wa dona wukwete, uza wuhoka kwangu.

³Se Jona a to khukha e tutuma, a txi ya Tarxixi, kule ni khohe ya MKOMA, se mbimo yile a nga relela eya Jope, a to ya mana txitimela txa mati txi nga ti ti ya Tarxixi, sekoko a to xava dithikithi dakwe, e wulela mndani ka txona, kasi ku a txi tsula navo Tarxixi, kule ni khohe ya MKOMA.

⁴Aniko MKOMA a to rumela moya wa hombe lineneni, se ku to maheka txihuhuri txa hombe lineneni, se txitimela txi txi nga txo lava ni kubhandeka.

⁵Sekoko vatsimbitisi va txitimela va to thava, mmwani ni mmwani a to dila ka txizimu txakwe, va txi rinzetela matini totshe tithomba ti ti nga ti ti txitimelani, kasi kuhungula kunemela ka txona; konaho, Jona a to relela hahatshi, ka wukhalo wo zumba simaha, a txi ya otela e mana wukohe wo tshima ngutu.

⁶Se mthangeli wa txitimela a to tshuketela kwakwe a txi m'gela tiya: Wo va ni txani u otelako kani? Wuka, khukha u dhana Txizimu txako; kutilava ngu kumaha keto, Txizimu txi nga hi alakanya, kasiku hi si lovi.

⁷Se mmweyo ni mmweyo a ti ti khene ka mmwani: Ngonani hi ta xaxuva tixolo, kasiku hi na ziva tito, nji txani txi hi mahako hi humelelwa ngu phango yiya. Va to xaxuva tixolo, se xolo yi ya wela Jona.

⁸Sekoko va to m'gela ku kha vona: Hi nga hi gela awe konkuwa, a txi txi hi mahako hi telwa ngu dikhombo diya. Ngu wuhi mthumo wako kani? Niku uta ngu hayi kani? Ngu dihi ditiko dako kani? Kona u wa lixaka muni awe kani?

⁹Se ene a to va gela a txi khene: Ani ni Muhebheru, ni thava MKOMA, Txizimu txa nzumani, awu a nga maha linene ni mafu a kuoma.

¹⁰Sekoko vavamna va to tala ngu kuthava ka hombe, va txi m'gela ku kha vona: U mahete txani awe toneto kani? Nguko va txi tiziva vavamna vale taku, a ti ko tutuma eya kule ni khohe ya MKOMA, nguko ene se a ti ti va gete.

¹¹Se va to mu wotisa va txi kha vona: Hi na kumaha txani athu, kasiku linene li zenga kani? Nguko linene li ti ko guleka ni kuhenya ngutu.

¹²Se Jona a to va gela a txi khene: Ni guleni, mi txi ni rinza lineneni, se linene li na zenga, nguko ani na tiziva tito, ngu mhaka yangu, mi tetwe ngu txihuhuri txiya txa hombe.

¹³Hambi keto, vavamna va ti ti txungela, va txi zama kumanela mafu, aniko va ti si sikoti, nguko linene li ti tiya masoni ngu kuhenya ngutu.

¹⁴Sekoko va to dila ka MKOMA va txi kha vona: Yowe! MKOMA! Athu ha kukhongotela! Hi nga love ngu mhaka ya wutomi wa wamwamna wuwa, ni ku u nga thele txitimwi kwathu mnoha wa kwa mbi na mnandu; nguko awe MKOMA u mahile ti u nga ti lavisa tona.

¹⁵Se va to gula Jona ve mrinza lineneni, se linene li ema kuhenya ka lona.

¹⁶Se vavamna vava, va to khata kuthava Txizimu, ngu txithavo txa hombe, ve ningela miphaxo ka MKOMA, ni sixambanyo sawe.

¹⁷MKOMA a to rumela txihaka txa hombe, kasiku txi mita Jona; se Jona a to zumba mndani ka txihaka masiku mararu ni wusiku wa kona.