Read chopi Jona 4 Bible Online

Jona 4 - chopi bible

Jona 4

¹Se Jona a to swireka ngutu ngu mhaka eyo, se e maneka a di henyile ngutu.

² Se a to kombela ka MKOMA, a txi khene: Yowe! MKOMA! Ina hi nga tona tiya ni nga womba, ni di ngadi ditikoni kwangu kani? Ngu mhaka yeto, ni ti vhikete, ni tutumela kuya Tarxixi, ngu kuziva taku, u Txizimu txo pfela, ni wumbilu, txo timisela, ni kutala ngu wunene, ni ti taku wa hunduluka ka to biha.

³Na ku kombela koko, awe MKOMA thavisa wutomi wangu, nguko i tshuko kwangu kufa kupinda kuhanya.

⁴Se MKOMA a to khene: Ina nga kunene kupandisekeko kwako kani?

⁵Sekoko, Jona a to huma didhoropani, eya zumba wutxani ka didhoropa, se koneho a to aka m'dhuti, e zumba ha mtsudini ka wona, kasiku e wona ati ti no humelela didhoropani.

⁶Se Txizimu txi to maha ti to ku txi mila thanga, yi kwela ngu txitimwi ka Jona, kuva yi maha mtsudi ha msungo kwakwe, kasi kuthavisa kuxaniseka kwakwe; se Jona a to tsaka ngutu ngu mhaka ya thanga yile.

⁷Aniko, Txizimu txi to rumela mpungu, ngu kugwimba ka wuronga mangwanani ka kona, wu txi ya daya thanga, se yi txi oma.

⁸Se ku to maheka taku, kuhumani ka ditambo, Txizimu txi rumela moya wo hisa wa wutxani, se ditambo di peka msungo wa Jona, se a to tsivala; e navela ngu wotshe moya wakwe kufa, a txi khene: “I txhuko kwangu kufa kupinda kuhanya.”

⁹Sekoko, Txizimu txi to kha txona ka Jona: Ina u nga za u pandiseka ngu mhaka ya thanga kani? Se ene a to xamula a txi khene: Ndinene ni pandiseka ni za ni navela kufa.

¹⁰Se MKOMA a to khene: U tsetsa thanga yile u nga mbi phaya, hambi ku yi maha yi kula; yi nga mila ngu wusiku wumwewo, ni kufa ngu wusiku wumwani;

¹¹se ani na mbi va ni ku di pfela Didhoropa da Hombe da Ninivha, a di di ku ni kupinda 120.000 wa vathu, ava va si ziviko kuhambanisa diwoko dawe da txinene, ni diwoko dawe da txibhabha, ni sihari sasingi kani?