Read chopi Mitengo 10 Bible Online

Mitengo 10 - chopi bible

Mitengo 10

¹MKOMA a to womba kambe ka Mosi, a txi khene:

²“Maha mipundu yimbidi ya silivhela; u yi maha ngu silivhela yo tshulwa; u na ramba ngu yona msengeletano, kasi kumaha txiziviso txo khukha ha wugoveloni.

³Sekoko mbimo yile yi no vetwa ngu wumbidi wa yona, wotshe msengeletano wu na tshangana hafuhi kwako, ha txikeni ka ditenda da msengeletano.

⁴Se ngako ku txi vetwa mpundu wumwewo dwe, va na sengeletana kwako vathangeli, i ku misungo ya va magumi a mazana, a va ka Israyeli.

⁵Sekoko ngako mipundu yi txi vetwa ngu mtamo, ava va ku ka magovelo a wutxani, ngu vona va no khukha kukhata.

⁶Se mi txi veta da wumbidi, ava va nga gova didhawa da wulambwe, va na khukha ni vona; ngako mi txi veta ngu mtamo, magovelo ma na khukha.

⁷Kambe i ti kuveta ko dhana msengeletano dwe, mavetelo ma nava o hambana.

⁸Se vaphaxeli vale i ku vanana va Aroni, ngu vona va no veta mipundu; atxiya, txi na va txileleto txanu, ni ka tiveleko tanu, wu na va mlayo wanu ka yotshe mbimo.

⁹Se ngako ditikoni kwanu mlala e lava ku mi lwisa, mi na veta mipundu yo mi xomisa, mi na alakanywa masoni ka MKOMA, Txizimu txanu, a na mi hulukisa manzani ka valala vanu.

¹⁰Atiya, ti maheni hambi ka masiku a mibuso yanu ya kutsaka, kukhatani ka mtxima mi na veta mipundu, mbimo yi mi ningelako miphaxo yanu ya kuhiswa ni ya kubonga, kasi ku Txizimu txi mi alakanya. Nguko ngani MKOMA, Txizimu txanu.”

¹¹Se ka dilembe da wumbidi, ka mtxima wa wumbidi, ngu ditshiku da magumi mambidi, ku to maheka ti to direfu di khukha txitimwi ka nyumba ya msengeletano.

¹²Se vanana va ka Israyeli va to khukha kona Sinayi, madingano ni mipfhuka yawe ya txiwulani, se direfu di to va thangela, di txi ya ema txiwulani ka Parani.

¹³Ngu kumaha keto, va to khata dipfhumba dawe ngu kulaya ka MKOMA, ngako a nga leleta ka Mosi.

¹⁴Nguko kukhata ku to khukha m'jeke wa dizumbo da vanana va ka Judha, madingano ni mabutho awe a tiyimbi; se ka dibutho dawe da yimbi, ku ti ti ni Nasoni, mwana Aminadhabhe.

¹⁵Ngu masoni ka dibutho da yimbi ya vanana va ka Isakari, ku ti ti ni Nathaniyele, mwana Zuwari.

¹⁶Se ka dibutho da yimbi ya lihunzu la vanana va ka Zebhuloni, ku ti ti ni Eliyabhe, mwana Heloni.

¹⁷Sekoko nyumba yi to tshungunulwa, se vanana va ka Gerisoni ni vanana va ka Merari, ve kukha va ti rwate nyumba.

¹⁸Msana keto, ku to khukha m'jeke ngu wugoveloni ka va ka Rubheni, ngu mabutho awe a tiyimbi; se txitimwi ka dibutho dawe da yimbi, ku ti ti ni Elizuri, mwana Sedhewuri.

¹⁹Se ka dibutho da yimbi ya lihunzu la vanana va ka Simiyoni, ku ti ti ni Salumiyeli, mwana Zurisadhayi.

²⁰Se ka dibutho da yimbi ya lihunzu la vanana va ka Gadhi, ku ti ti ni Eliyasafe, mwana Dheweli.

²¹Sekoko va ka Kohati va to khukha, va di rwate nyumba yo sawuleka; se vamwani va to gula nyumba, vona va txi ngadi va txita.

²²Msana keto, ku to khukha m'jeke ngu wugoveloni ka vanana va ka Efrayime, madingano ni mabutho awe a tiyimbi; se ka dibutho dawe da yimbi, ku ti ti ni Elisama, mwana Amiyudhe.

²³Se ka dibutho da yimbi ya lihunzu la vanana va ka Manasi, ku ti ti ni Gamaliyeli, mwana Pedhazuri.

²⁴Se ka dibutho da yimbi ya lihunzu la vanana va ka Bhenjamini, ku ti ti ni Abhidhani, mwana Gidhiyoni.

²⁵Sekoko ku to khukha m'jeke ngu wugoveloni ka vanana va ka Dhani, madingano ni mabutho awe a yimbi; se ka dibutho dawe da yimbi, ku ti ti ni Ayezeri, mwana Amixadhayi.

²⁶Se ka dibutho da yimbi ya lihunzu la vanana va ka Aseri, ku ti ti ni Pagiyeli, mwana Okrani.

²⁷Se ka dibutho da yimbi ya lihunzu la vanana va ka Naftali, ku ti ti ni Ayira, mwana Enani.

²⁸Ayiya ngu yona milayo ya matsimbilelo a vanana va ka Israyeli, madingano ni mabutho awe a tiyimbi, mbimo yile va nga khukha.

²⁹Sekoko Mosi a to khene ka Hobhabhe, mwana Reweli, mmidhiyani, tate wa Mosi ngu ka msikati wakwe: “Athu hiya ka wukhalo wule MKOMA a nga khene: Ni na mi ninga; a hi tsule hotshe, athu hi na kuxayisa kha kwati; nguko MKOMA a thembisile kumaha wunene ka Israyeli.”

³⁰ Kambe Hobhabhe a to khene kwakwe: “Kha ni na mbi tsula; aniko, ni na tsula ka maxaka angu, ditikoni kwathu.”

³¹Se Mosi a to khene: Awe u nga hi leke; nguko wa tiziva taku hi zumbile txiwulani; awe u na va maso athu.

³²Se ngako awe u txi tsula ni nathu, ati ta tinene MKOMA a no ti maha kwathu, nanathu hi na ku mahela.

³³Ngu kumaha keto, va to khukha ngu mmangoni ka MKOMA, ve tsimbila masiku mararu; se dibhokiso da txitumelelano txa MKOMA, di to thangela masoni kwawe masiku mararu, kasi ku va lavela wukhalo wo humula ka wona.

³⁴Direfu da MKOMA di ti ti txitimwi kwawe ni mitsikari, kukhukhani kwawe ngu wugoveloni.

³⁵ Mbimo yi koko dibhokiso di nga ti khukha, Mosi a ti ti khene: “Wuka MKOMA, valala vako va na hangalaswe, ni va va ku vengako, va na thave masoni kwako.”

³⁶Ni mbimo yi dibhokiso di nga rulwa, Mosi a ti ti khene: “Wuya MKOMA, ka magumi a mazana amangi, a ka Israyeli.”