Read chopi Mitengo 16 Bible Online

Mitengo 16 - chopi bible

Mitengo 16

¹Se Kora, mwana Izari, mwana Kohate, mwana Levhi, Dhatani ni Abhiramu, vanana va Eliyabhe, ni Oni, mwana Peleti, ava ngu wuraru wawe i ku vanana va Rubheni;

²va to bhongela Mosi kumweko ni 250 wa vavamna va ka Israyeli, ava i ku vahombe va msengeletano, i ku siro sa habanza, na i ti madhota a ndhuma.

³Se ve tshangana ni Mosi ni Aroni, va txi kha vona: Konkuwa, ta dingana nguko wotshe msengeletano wu sawulekile, ni MKOMA aho hagari ka wona! Ngu kutxani mi txi ti kulisa txitimwi ka msengeletano wa MKOMA kani?

⁴Mbimo yi Mosi a nga engisa mahungu awa, a towa hahatshi ngu khohe yakwe,

⁵a txi khene ka Kora ni vangana vakwe: Mangwana ni mixo, MKOMA a na mi komba va i ku vathu vakwe, ni va vo sawuleka, ti to ve tshuketa hafuhi kwawe.

⁶Awe Kora ni vathu vako votshe, mahani tiya, tekani nanu siya sa dibaselo;

⁷se mangwana mi na hala mndilo ka sona, mi thela dibaselo ngu txitimwi ka sona, masoni ka MKOMA, konaho awu MKOMA a no msawula, ngeneyo a nga sawuleka. Ta enela eto kwanu vanana va ka Levhi.

⁸Mosi a to engeta a txi khene ka Kora: Konakuwa, engisani anu vanana va ka Levhi:

⁹Ina Txizimu txa ka Israyeli, txi nga va txi di mi sawute ka msengeletano, txi mi tshuketisa hafuhi ka txona, kasi ku ta maha mthumo wa Nyumbani ka MKOMA, ni kuema masoni ka msengeletano, mi thumela vathu kani?

¹⁰Txizimu txi ku tshuketisile awe ni votshe vananu, i ku va ka Levhi, ni ku mi lavako wuphaxeli kambe kani?

¹¹Nguko awe ni wotshe msengeletano wako, mi tshanganile mi txi lwa ni MKOMA; se Aroni, i mani koza mi txi mngungurukela kani?

¹²Se Mosi a to rumela kuya dhana Dhatani ni Abhiramu, i ku vanana va Eliyabhe; vona va to ta angula va txi kha vona: Athu kha hi na mbi ta.

¹³Nguko awe wo yi maha mhaka yayidotho, aku u nga hi humisa ka ditiko do khulunga masi ni wulombe, u hi daya mu txiwulani, u tshumela u ti kulisa txitimwi kwathu kani?

¹⁴Txa wumbidi awe khwanzi na nga hi hokisa ka ditikodo do khulunga masi ni wulombe; kambe khwa hi ninga tithembwe ni mauvha, kuva si maha thomba yathu. Se awe u lava kudobola[6] maso a vathu vava kani? Athu kha hi na mbi ta.

¹⁵Sekoko Mosi a to henya ngutu, e gela MKOMA ku khene: Ava vathu, u nga amukele miningelo yawe! Ani lambi kha na nga teka ni mbongola yimweyo kwawe; lambi ni kudyelela ni wammweyo wawe.

¹⁶Mosi a to khene kambe ka Kora: Ngonani mangwana masoni ka MKOMA, awe ni wotshe msengeletano wako; Aroni a nata.

¹⁷Se mmwani ni mmwani a na teka siya, mi txi thela ka sona dibaselo, wuhi ni wuhi a na neha txiya txakwe masoni ka MKOMA, si na va 250 wa siya; awe ni Aroni mi na teka siya sanu ngu wumbidi wanu.

¹⁸Va to thela mndilo amu ka siya sawe, ve sanzeka dibaselo ka sona; se ve ema ha txikeni ka ditenda da msengeletano, kumweko ni Mosi ni Aroni.

¹⁹Se Kora a to tshanganisa msengeletano wa vathu vakwe votshe, ha txikeni ka ditenda da msengeletano, konaho kuphatima ka MKOMA ku to woneka masoni ka wotshe msengeletano.

²⁰Se MKOMA a to womba ka Mosi, a txi khene:

²¹Tshuketani kule ka msengeletano wuwa, ni na va lovisa ngu mbimwanyana.

²²Se vona va towa ngu tikhohe tawe, ve dila, va txi kha vona! Awe Txizimu! Txizimu txa mihefemulo ya nyama yotshe! Ina wa so henyela wotshe msengeletano, ngu mhaka ya txionho txa m'thu mmweyo kani?

²³Se MKOMA a to womba ka Mosi, a txi khene:

²⁴Womba ka wotshe msengeletano u txi khawe: Khukhani madhawani ka m'ti wa Kora ni Dhatani ni Abhirame va nga aka kona.

²⁵Sekoko Mosi a to wuka eya ka Dhatani ni ka Abhiramu, se madhota a ka Israyeli, ma to mlondetela.

²⁶Se Mosi a to womba ka msengeletano a txi khene: Humani amu matendani ka vathuvo va kubiha, mi nga gweseni txiya ni txa tximwetxo txawe, nguko mi nga loviswa ngu sionho sawe sotshe.

²⁷Va to khukha koko ngu madhawani ka nyumba ya Kora, ni ya Dhatani, ni Abhiramu. Se Dhatani ni Abhiramu va to huma, veya ema sikenini ka matenda awe, kumweko ni vasikati vawe, ni vanana vawe, ni timenzani tawe.

²⁸Sekoko Mosi a to khene: Konkuwa, mi na tiziva ti to MKOMA ngene a nga ni ruma kumaha totshe tiya, kambe totshe tiya kha ti humi ngu mbiluni kwangu.

²⁹Ngako vathu vava va txifa nga ti va fisako tona votshe vathu, ni kumanwa ngu phango yi yi humelako vamwani vathu, MKOMA kha ni ruma eto.

³⁰Aniko ngako MKOMA a txi rumela txilo txatxiphya, ni kungako mafu ma txi asama txisofu txa ona meva mita ni sotshe siya sawe, ve relela diyivani va txi hanya, mi na tiziva to ava vathu va henyisile MKOMA.

³¹Ku to maheka taku, mbimo yi Mosi a nga gwita kuwombawomba mahungu awa, mafu ale va nga ti emile ka ona, ma to tuleka.

³²Se mafu ma to asama txisofu txa ona, meva mita ni mimwaya yawe, ni vathu votshe va ka Kora ni tithomba tawe.

³³Vona ni sotshe si va nga ti naso, va to relela diyivani va txi hanya, mafu ma to va fenengeta, ve lova hagari ka msengeletano.

³⁴Se votshe va ka Israyeli ava va ngadi randete wukhalowo, va to tutuma va txi peka huwa, va txi kha vona: A hi tutumeni, mafu ma nga thuka me hi mita nanathu!

³⁵Sekoko MKOMA a to rumela mndilo wuta lovisa vathu va 250, va nga ti hungala ngu kuhisa dibaselo.

³⁶Se MKOMA a to womba ka Mosi a txi khene:

³⁷Gelani Eleyazari, mwanana wa mphaxeli Aroni, ti to e thavisa siya sa dibaselo hagari ka mndilo, nguko si sawulekile, u txi hangalisela mndilo wa kona kule.

³⁸Aniko siya so hisa ka sona dibaselo sa vale va nga onhela mihefemulo yawe. Si na simelwa aha ka timbanya si maha siphambati, so lema ngu sona ha magandeloni, kasi si txi ningelwa masoni ka MKOMA; nguko sona si sawulekile; si na maha txialakanyiso ka vanana va ka Israyeli.

³⁹Se mphaxeli Eleyazari, a to teka siya sile sa txikete, so hisa ka sona dibaselo, si nga ningelwa ngu vathu vale va nga hiswa, si maha so nameketelwa aha ka txiluvelo.

⁴⁰Si nava txialakanyiso ka vanana va ka Israyeli; kasi ti to ku si thuki ku txi va ni m'thu mmwani awu i singako wa lihunzu la ka Aroni, a no tshuketa e ningela dibaselo masoni ka MKOMA, a nga dhuka e fana ni Kora ni mtxawa wakwe, nga ti MKOMA a nga womba ngu txisofu txa Mosi.

⁴¹Aniko mangwanani ka kona, wotshe msengeletano wa vanana va ka Israyeli, wu to ngungurukela wu wukela Mosi ni Aroni, wu txi kha wona: “Anu mi date vathu va MKOMA.”

⁴²Se mbimo yi vathu va nga tshangana ve wukela Mosi ni Aroni, va to tutumela kuya ditendani ka msengeletano, konaho ku to woneka direfu di txi va fenengeta, ni wudhundo wa MKOMA wu to woneka.

⁴³Mosi ni Aroni koko va to tshuketa masoni ka ditenda da msengeletano.

⁴⁴Sekoko MKOMA a to womba ka Mosi a txi khene:

⁴⁵Khukhani hagari ka msengeletano wuwa, ni na wu lovisa ngu mbimwanyana; sekoko Mosi ni Aroni va to wa hahatshi ngu tikhohe tawe.

⁴⁶Se Mosi a to khene ka Aroni: Thavisa txiya txo hisela ka txona dibaselo, u hala mndilo wa ha ka txiluvelo, u txiya thela konemo dibaselo; u kuluveta u txiya ka msengeletano u ya maha mphaxo wo thavisa txionho, nguko MKOMA wata ni mtungu, a henyile ngutu, se wu khatile.

⁴⁷Se Aroni, a to teka txiya txo hisela ka txona dibaselo, nga ti a nga leletisa tona Mosi, e tutuma eya hagari ka msengeletano; se mtungu wu ti khatile hagari ka vathu; a to thela dibaselo ha mndiloni, e maha mphaxo wo tekisa vathu.

⁴⁸Se Aroni a to ema hagari ka va vo hanya ni va vofa; mtungu wu to ema kudayela vathu.

⁴⁹Ava va ngafa ngu mtunguwo i 14.700, kuleka va va ngafa ngu mhaka ya Kora.

⁵⁰Se Aroni a to tshumela a txi ya ka Mosi ha ditimbani ka ditenda da msengeletano; nguko mtungu wu ti ti gwitile.