Read chopi Mitengo 17 Bible Online

Mitengo 17 - chopi bible

Mitengo 17

¹Sekoko MKOMA a to womba-womba ka Mosi, a txi khene:

²Gela vanana va ka Israyeli va txi ku nehela tindonga, ngu nyumba yimwani ni yimwani, tiza ti tshangana digumi da tindonga ni timbidi, a ti ti no huma ngu ka votshe vathangeli, madingano ni tinyumba ta vatate vawe; u na bhala ditina da m'thu ni m'thu ka ndonga yakwe.

³Kambe u na bhala ditina da Aroni ka ndonga ya ka Levhi, nguko mthangeli wa nyumba ni nyumba ya vatate a na va ni ndonga yimweyo.

⁴U na ti veka amu ditendani ka msengeletano masoni ka txitumelelano, aha ni tshanganako kona ni nanu.

⁵Se ku na maheka taku, ndonga ya wamwamna wule ni no va ni di yi sawute, yi na thunga; ngu toneto, ni na heta kungungurukela ka vanana va ka Israyeli kwangu, a kule va nga mi ngungurukelela ngu kona.

⁶Mosi koko a to xawutela ka vanana va ka Israyeli; se votshe vahombe vawe va to mninga ndonga, ni wihi wa hombe ndonga yimweyo, madingano ni tinyumba ta vatate vawe; ku to tshangana digumi da tindonga ni timbidi, ndonga ya Aroni yi di hagari ka tona.

⁷Se Mosi a to veka tindonga masoni ka MKOMA, amu ditendani ka txitumelelano.

⁸ Mosi a to wulela ditendani ka txitumelelano, ngu ditshiku do gameta, a to ya wona ndonga ya Aroni yi di thungile yi tshumela yi humisa ni siluva, i ku nyumba ya ka Levhi, yi di velekile ni mihando yo vitwa.

⁹Ngu msana keto, Mosi a to teka totshe tindonga masoni ka MKOMA, e ti neha ka vanana va ka Israyeli; ngako va di ti woni votshe, mmwani ni mmwani a to teka ndonga yakwe.

¹⁰Sekoko MKOMA a to khene ka Mosi: Tshumeta ndonga ya Aroni masoni ka txitumelelano, yi na xayiswa kona, ti to yi na maha txialakanyiso ka vanana va vo kaneta; kasi kufuvisa sisolo hagari kwawe ngu kuhetiseka ti to va siswi vefa.

¹¹Se Mosi a to maha madingano ni kuleleta ka MKOMA.

¹²Vanana va ka Israyeli va to gela Mosi va txi kha vona: Athu hi fite hi txi lova, hotshethu hi na lova!

¹³Awu ni wu a tshuketako Nyumbani ka MKOMA, ofa. Ina kha hi na mbi guma hotshethu ngu kufa kani?