Read chopi Mitengo 19 Bible Online

Mitengo 19 - chopi bible

Mitengo 19

¹MKOMA a to womba kambe ka Mosi ni ka Aroni a txi khene:

²Asiya, nzileleto sa mlayo awu MKOMA a leletako tito: Gela vanana va ka Israyeli ve kutisela dirole da makati do bhilivila, da kwa mbi soleka, na di si nga ni txibawa, di nga mbi sanzekwa dikange.

³Mi di ningela ka mphaxeli Eleyazari, ve huma nado hahanze ka wugovelo, va txi ya di daya, masoni kwakwe.

⁴Se mphaxeli Eleyazari, ngu msana, a na beta litiho lakwe mndani ka homu, e teka mnoha wa kona e xwayela ngu wona mtxhanu wa makhati ni mambidi, madhawani ka ditimba da ditenda da msengeletano.

⁵Sekoko msana keto, va na hisa homu masoni kwakwe, ve hisa ni didhowo da kona, ni nyama ya kona, ni mnoha, kumweko ni mxwanyi.

⁶Se mphaxeli a na teka dipulango da ndonga ya mkedhari ni hisope, ni nguwo yo bhilivila, e si rinza ha mndiloni hale ku hiswako homu.

⁷Sekoko mphaxeli a di gwitile, a na kuwula syambalo sakwe, e samba mmidi wakwe amu ka mati; se e wulela wugoveloni, a na zumba a txi yila, kala ni minova.

⁸Ni ene ni wule a nga hisa homu, nene a na kuwula syambalo sakwe, e samba mmidi ngu mati, ngu msana a na zumba a txi yila kala ni minova.

⁹ Se m'thu wu aku ha wukhaloni ko sawuleka, a na ola dikhuma da homu, atxi ya di vhunga hahandze ka wugovelo, ka wukhalo wo sawuleka, ku mahela ti to va na wu thumisa vanana va ka Israyeli, kumaha mati o basisa, wu maha mphaxo wo kuwula kuonha.

¹⁰Awule a nga ola dikhuma da homu, a na kuwula syambalo sakwe e zumba a txi yila kala ni minova. Atxiya, njileleto txo pinduka hagari ka vanana va ka Israyeli, ni ka mluveli wu a ku hagari kwawe.

¹¹Awu a gwesako txirumbi, a na va a sa sawuleka, txipimo txa mtxhanu wa masiku ni mambidi.

¹²Ngu ditshiku da wuraru, a na ti basisa ngu mati, se ngu ditshiku da wutxhanu ni mambidi, a na va a di basile; aniko a txi dhuka asi ti basisi ka masiku awa a mararu, a na va a sa basa ka ditshiku da wutxhanu ni mambidi.

¹³Awule a gwesako m'thu wa kufa, asi ti sawulekisi, a nyenyezisile Nyumba ya MKOMA. Eyo m'thu a na tutumiswa hagari ka va ka Israyeli, nguko kha nga xwanyelwa ngu mati o sawuleka; a nga txi yila; kunyenyeza kwakwe ku nga diho hammidini kwakwe.

¹⁴Se mlayo wa kufela ditendani ngu wuwa: Votshe va va manekako ditendani, kha ku na mbi fa m'thu, va fanete kuyila, nguko kha va sawuleka; kala mtxhanu wa masiku ni mambidi.

¹⁵Kambe sotshe siya si si nga mbi fenengetwa, si kuwalo sifenengeto so sungelelwa, kha sa sawuleka.

¹⁶Awule a no gwesa m'thu wo dawa ngu ditxhari txitingani, hambi wa kufa ngu mafelo akwe, mwendo marambu a vathu hambi dithitha; eyo m'thu a na va a sa sawuleka mtxhanu wa masiku ni mambidi.

¹⁷Ka m'thu wu a nga mbi sawuleka, va wela dikhuma da mphaxo wa kuonha amu ka txiya, ve thela mati mnamboni txitimwi ka dikhuma, amu ka txiya.

¹⁸Ngu msana, m'thu awu a nga basa ngene a no teka hisope e yi beta amu ka mati e xwanyela ditenda ni siya sotshe, ni vathu votshe ava va kuho, ni wu a nga gwesa marambu, mwendo awu a nga dawa, ni dithitha ni sirumbi.

¹⁹Se m'thu wu a nga basa, a na xwayela ka wu a nga mbi basa ngu ditshiku da wuraru, ni ditshiku da wutxhanu ni mambidi a txi msawulekisa; kambe a na kuwula syambalo sakwe, e samba amu ka mati, ni minova ya kona e ti basile.

²⁰Awu asi ti sawulekisako, a na tutumiswa hagari ka msengeletano, nguko a nyenyezisile wukhalo wo sawuleka wa MKOMA; ni mati o basisa ngu ona kha ma nga xwayelwa txitimwi kwakwe, ngu konaho, ka sawuleka.

²¹Awuwa wu na va mlayo wo mbi gwita kwawe. Awu a no xwayela mati o sawuleka, a txi gwita a na kuwula syambalo sakwe; ni wu a no gwesa mati o sawulekisa ngu ona, a na va a sa sawuleka nene, kala ni minova

²²Ni sotshe si si nga gweswa ngu m'thu wo mbi sawuleka, si na va si sa sawuleka, ni wu a no gwesa wu m'thu, nene kha sawuleka kala ni minova.