Read chopi Mitengo 2 Bible Online

Mitengo 2 - chopi bible

Mitengo 2

¹Se MKOMA a to womba ka Mosi ni ka Aroni, a txi khene:

²“Vanana va ka Israyeli va na zumba mmwani ni mmwani hafuhi ka m'jeke wakwe, hahatshi ka sikombiso sa tinyumba ta vatate vawe. Va na zumba ngu kurandela Dithepele da Msengeletano, ka mpfhuka wu wu no tsaniswa.

³Avava, ngu vona va no zumba ngu wutxani: Ngu didhawa da wutxani ku na zumba mabutho a ka Judha ni m'jeke wawe. Mthangeli ku nava Nasoni, mwana Aminadhabhe.

⁴Se dibutho dakwe da yimbi, ni va va nga balwa kwawe: I ti ti 74.600.

⁵Hafuhi kwakwe ku na zumba vanana va ka Israyeli, mthangeli wawe i nava Nathaniyele, mwana Zuwari.

⁶Se dibutho dakwe da yimbi: I ti ti 54.400, va nga balwa.

⁷Msana keto, lihunzu la Zebhuloni; ni Eliabhe, mwana Eloni.

⁸Se dibutho dakwe da yimbi, ni votshe va va nga balwa: I ti ti 57.400, va nga balwa.

⁹Avale va nga balwa va dizumbo da ka Judha, ngu mabutho awe a yimbi, votshe mtengo wa 108.400, evo ngu vona va dizumbo di di no khata kukhukha.

¹⁰Wulambwe, va na va va di hahatshi ka m'jeke wa dizumbo da ka Rubheni, ngu mabutho a yimbi, mthangeli wa vanana va ka Rubheni: Elizuri, mwana Sedhewuri.

¹¹Se dibutho dakwe da yimbi ni vale va nga balwa: I ti ti 46.500, va nga balwa.

¹²Hafuhi kwakwe ku na zumba lihunzu la Simiyoni, mthangeli wa kona i ku Salamiyeli, mwana Surisadhayi.

¹³Se dibutho dakwe da yimbi ni vale va nga balwa: I ti ti 59.300.

¹⁴Ngu msana, lihunzu la Gadhi ni Eliyazafi, mwana Dheweli, a na va mthangeli wa vanana va Ghadi.

¹⁵Dibutho dakwe da yimbi: 45.650, va nga balwa.

¹⁶Avale va nga balwa va dizumbo da ka Rubheni ngu mabutho a yimbi, mtengo wawe 151.450, evo ngu vona va no khukha ngu dikhati da wumbidi.

¹⁷Sekoko, ngako Ditenda da Msengeletano di txi khukha, dizumbo da va ka Levhi di na va di di hagari ka mamwani mazumbo. Ati va nga zumbisa tona va na tsimbilisa toneto, dibutho ni dibutho ni m'jeke wa dona.

¹⁸M'jeke wa dizumbo da ka Efrayime, wu na va wu ti mswa-ditambo, ngu mabutho awe. Mthangeli wawe i Elisama, mwana Amiyudhe.

¹⁹Mabutho a mtengo wa vavamna va yimbi yakwe ni va va nga balwa i 40.500, va nga balwa.

²⁰Hafuhi ka lihunzu la ka Manasi, mthangeli wa lihunzu la vanana va ka Manasi i Gamaliyeli.

²¹Dibutho dakwe da yimbi, 32.200, ava va nga balwa.

²²Ngu didhawa ka Efrayime ku na zumba mabutho ya Benjamin, mthangeli i Abhidhani, mwana Gidhiyoni.

²³Dibutho dakwe da yimbi, 35.400, va nga balwa.

²⁴Avale va nga balwa, va dizumbo da Efrayime ngu mabutho awe mba mtengo wa 108.100, da va va nga balwa. Evo ngu vale va no khukha dizumboni ngu dikhati da wuraru.

²⁵Ngu didhawa da wuphemba ku na zumba mabutho a ka Dhani ni m'jeke wawe. Mthangeli wawe i Ayezeri, mwana Amixadhayi.

²⁶Dibutho dakwe da yimbi ni vale va nga balwa 62.700.

²⁷Didhawani kwakwe ku na zumba matenda a Aseri, mthangeli wawe i Pajiyeli, mwana Okrani.

²⁸Dibutho dakwe da yimbi 45.500, va nga balwa.

²⁹Ngu didhawa da lihunzu la ka Naftali i Ahira, mwana Enani, a no va mthangeli wawe.

³⁰Dibutho dakwe da yimbi, 53.400, va nga balwa.

³¹Avale va nga balwa va dizumbo da ka Dhani, votshe mba mtengo wa 157.600. Evo va na khukha dizumboni ngu ka dikhati do gwitisa va txi londetela m'jeke wawe.”

³²Kupata votshe vanana va ka Israyeli, ava va nga balelwa ngu tinyumba tawe ni mabutho awe a tiyimbi, mba mtengo wa 603.550.

³³Ngu mhaka yeto, Valevhi kha va balwa hambi kubhalelwa kumweko ni vamwani vanana va ka Israyeli, nga ti MKOMA a nga leletisa tona ka Mosi.

³⁴Vanana va ka Israyeli va mahile totshe ti MKOMA a nga leletisa tona ka Mosi. Nguko mhaka eto, va zumbile ngu kulondetela mijeke yawe, ni kukhukha madingano ni tihunzu ta vatate vawe.