Read chopi Mitengo 20 Bible Online

Mitengo 20 - chopi bible

Mitengo 20

¹Wotshe msengeletano wa vanana va ka Israyeli, wu to hoka ka txiwula txa Zimi, ngu mtxima wo khata; se vathu ve gova ka wukhalo wa Kadhesi. Miriyamu a to fa ka wukhalowo, e tshotshwa konaho.

²Se ka wukhalowo ku si nga ni mati o vathu ve sela. Ngu konaho, va to tshangana vathu ve sola Mosi ni Aroni, ni ku va bhongela.

³Vathu va to henyela Mosi, va txi kha vona: I ti txhuko kuva hi di fite ni vanathu, ava va nga fa masoni ka MKOMA!

⁴Se ngu kutxani mi nga neha msengeletano wa MKOMA amu txiwulani, kasi ku ta fela muwa, nguko athu ni sifuyo sathu kha hi nga ni mati kani?

⁵Se njani mi nga hi humisa Egipta mi hi tisa ka ditiko da txisapa nga tiya, adi di si miliko timbewu, kha di na mikuwu mwendo mivhinya, ni miromani, hambi ni mati o sela kani?

⁶Sekoko Mosi ni Aroni va to khukha ka msengeletano ve tsula txihunjani, ha ditimbani ka ditenda da msengeletano, va txi yawa hahatshi ngu tikhohe tawe. Se kuphatima ka MKOMA ku to woneka kwawe.

⁷MKOMA a to gela Mosi a txi khene:

⁸Teka ndonga, u dhana msengeletano, awe ni mnanda wako Aroni, mi txi randela dirigwi diya, mi txi womba-womba ka vathu; dirigwi di na humisa mati a dona. Se awe u na va ninga mati a mu ka dirigwi; u txi ninga msengeletano wu sela, kumweko ni sifuyo sa wona.

⁹Sekoko Mosi a to teka ndonga masoni ka MKOMA, madingano ni ti a nga mleletisa tona.

¹⁰Se Mosi ni Aroni va to dhana msengeletano masoni ka dirigwi, Mosi a txi khene: Engisani konkuwa anu va kukholwa ka kudotho! Athu hi na humisa mati ha dirigwini hawa kani?

¹¹Sekoko Mosi a to gula diandza dakwe e peka dirigwi sikhati simbidi ngu ndonga yakwe, mati ma to pfhuruka, kuhuma mati o tala. Msengeletano wu to sela kumweko ni sifuyo sa wona.

¹²Se MKOMA a to khene ka Mosi ni ka Aroni: Ta woneka ti to kha mi kholwi kwangu; kha mi ni sawulekisi ta tinene ka vanana va ka Israyeli. Lambi, anu kha mi na mbi wu hokisa awu msengeletano ka ditiko di ni nga va ninga dona.

¹³ Aawa mati nga Meribha, ahawa vanana va ka Israyeli, va nga ya ni MKOMA. Ngu konaho kambe a nga va komba kusawuleka kwakwe.

¹⁴Mbimo si va ngadi Kadhesi, Mosi a to ruma mitumi ka mfumeli wa Edhomi, a txi khene: Mwananu Israyeli a khene: Awe wa ziva sotshe sikarato si hi nga humelwa ngu sona.

¹⁵Vatate vathu i ti valuveli kona Egipta, na athu hi di zumbile malembe o tala Egipta; va to hi xanisa athu ni vatate vathu.

¹⁶Athu hi to dila ka MKOMA, se ene a to engisa mapswi athu, e rumela mtumi wakwe wuta hi humisa Egipta. Se konkuwa hiho aha Kadhesi, ka m'ti wuwa wu kuho ha m'hinganoni ni ditiko dako.

¹⁷Hi leke koko hi tshawunyeta ngu ditikoni kwako; lambi kha hi na mbi tshawunyeta ngu tithembweni kwako ka mivhinya; kambe kha hi na mbi sela mati a sisimani kwako; athu hi na tsimbila ngu mabhudhula; lambi kha hi na mbi hambuka ngu didhawa da txinene mwendo da txibhabha, hiza hi tshawunyeta ditiko dako.

¹⁸Kambe Edhomi a ti khene kwakwe: “Khu na mbi pinda ngu ditikoni kwangu, nguko u txo singita u maha eto, ani ni na ku xomela matxhari, ni kuhingeta.”

¹⁹Vanana va Israyeli va to engeta va txi kha vona: Athu hi na tsimbila ngu nzila ya digondo; hi txi dhuka hi txi sela mati ako, athu ni sifuyo sathu, hi na kudihela ngu mtengo wa wunene; hi leke hi pinda ngu mikondo dwe.

²⁰“Kambe Edhomi a ti khene kwakwe: Lambi khu na mbi pinda!” Se Edhomi a to khukha a txi m'hingeta, a di ni vathu va mtamo ngutu.

²¹Nga ha Edhomi a nga lambela va ka Israyeli kupinda ngu ditikoni kwakwe, Israyeli a to jika ngu yimwani nzila.

²²Sekoko va to khukha Kadhesi, votshe vanana va ka Israyeli va to hoka mmangoni ka Hori

²³Se MKOMA a to womba ka Mosi ni ka Aroni kona mmangoni ka Hori, mihinganoni ka ditiko da Edhomi, a txi khene:

²⁴Kukhukhela kuwa, Aroni a na ya ti tshanganisa ni va ka kwawe, nguko ene kha na mbi sikota kuya wulela ka ditiko di ni nga ningela ka vanana va ka Israyeli; nguko mi kanetile dipswi dangu, a ni ka mati ka Meribha.

²⁵Teka Aroni ni mwanakwe Eleyazari, u va maha ve kwela mmangoni ka Hori.

²⁶Se u na thavisa syambalo sa Aroni, u ambeka mwanana wa kona Eleyazari; se ene Aroni a na ya ti tshanganisa ni va ka kwawe, nguko ngu koneyo a no fela kona.

²⁷Mosi a to maha madingano ni ti MKOMA a nga mleleta tona; nguko va to kwela mmangoni ka Hori, va txi wonwa ngu msengeletano.

²⁸ Se Mosi a to thavisa syambalo sa Aroni, a txi ambeka Eleyazari. Aroni a to fela konaho txitimwi ka mmango. Se Mosi ni Eleyazari va to txhika hahatshi.

²⁹Mbimo si msengeletano wu nga wona ti to Aroni a fite, wu to maha txidilo txo dila Aroni, magumi mararu a masiku.