Read chopi Mitengo 21 Bible Online

Mitengo 21 - chopi bible

Mitengo 21

¹ Mfumeli wa Aradhi, mkanana, awu a nga ti akile ngu wulambwe, a di ti engisile taku Israyeli wa wulela ditikoni kwakwe ngu nzila ya Atarima, a to lwisa Israyeli, e ñola vamwani e va maha tikhumbi.

²Sekoko va ka Israyeli va to kombela ngu kuxambanya masoni ka MKOMA, va txi kha vona: Ava vathu, u txi va ningela manzani kwathu, hi na fuvisa madhoropa awe ma txi bhi!

³MKOMA a to engisa txikombelo txa va ka Israyeli, e ningela Vakanana manzani kwawe, ve dawelwa votshe va txi bhi! Va to thula wukhalowo ku i Horma.

⁴ Sekoko va to khukha mmangoni ka Hori, ngu nzila ya Linene lo Bhilivila, va txi rendeleka ditiko da Edhomi; kambe ngu kulapha ka mnava, vathu va to guma mtamo, ve rereka ngu nzala.

⁵Se vathu va to sola Txizimu ni Mosi, va txi kha vona: Ngu kutxani u nga hi humisa Egipta, kasi hi tafa txiwulani ko nga tiya kani? Nguko amuwa, kha ku na sakudya, hambi mati o sela, kambe athu hi karate, timbilu tathu ta swihala ngu sipawana sa kwa mbi vhuna txilo.

⁶Sekoko MKOMA a to rumela minyoka yo leva, ni wuxungu, yi ta lumetela vathu, eho kufite vanana va ka Israyeli.

⁷Ngu kumaha ka eto, vathu va to ya ka Mosi, va txi ya kha vona: Athu hi onhile ngutu, nguko hi sote MKOMA, ni nawe; ngu mhaka ya eto, awe hi kombelele ka MKOMA tito, a txi thavisa minyoka yiya hagari kwathu. Koneko Mosi a to kombelela vathu.

⁸Se MKOMA a to xamula, a txi khene ka Mosi: Maha mnyoka wo tura, u wu hayeka ha phandeni, ti to ngako m'thu a txi lumwa ngu mnyoka, e wonetela mnyoka wa msuku, kasi a na hanya.

⁹ Se Mosi a to maha mnyoka wa msuku a txi wu hayeka ha phandeni: Se toneto ti to maha taku ngako m'thu a txi lumwa ngu mnyoka e wonetela mnyoka wa msuku e hanya.

¹⁰Sekoko msana keto, vanana va ka Israyeli, va to khukha va txi ya gova Obhoti.

¹¹Va to khukha Obhoti va txiya gova Abharime, amu txiwulani, ko gwatama ni Mowabhi, ngu didhawa da wutxani.

¹²Va to khukha eho va txiya gova mkovani wa Zeredhi.

¹³Konaho va to khukha veya gova ngu mtxhatuko ka lidhonga la Arnoni, li khukhelako txiwulani, ditikoni ka Vaamori, nguko lidhonga la Arnoni li maha m'hingano hagari ka Mowabhi ni Vaamori.

¹⁴Ngu toneto, ku wombwako ngu tona amu ka dibhuku da Tiyimbi ta MKOMA, taku: “Vhahebhi ka Sufa, ni sinambwana sa Arinomi.

¹⁵Ni kurelela mkova wuyako ka didhawa da Ara, kala kuhoka ka m'hingano wa Mowabhi.”

¹⁶Se va to khukha eho va txi ya ka txisima txa Bheheri; ngu konaho MKOMA a nga gela Mosi ku khene: Tshanganisa vathu ni na va ninga mati.

¹⁷(Sekoko va ka Israyeli va to embelela ndando yiya: Mati ma na vhele, se anu ma embeleteni.

¹⁸Awe txisima u nga kelwa ngu vathangeli, a txi txi nga kelwa ngu tinganakana ta vathu, ngu tindonga tawe). Va to khukha txiwulani va txi ya Matani.

¹⁹Se msana keto, va to khukha Matani va txi ya Nahalileli, ve khukha ngu Nahalileli va txi ya Bhamoti.

²⁰Se ngu Bhamoti veya ka mkova wu wu humako ngu thembweni ka Mowabhi, ngu tindundumani ka Pisiga, ngu didhawa da txiwulani.

²¹Sekoko Israyeli a to rumela mitumi ka Sihoni, mfumeli wa Vaamori, kasi kuya womba tiya:

²²Ni leke ni pinda ngu ditikoni kwako, kha hi na mbi wulela tihembweni, hambi ka mivhinya, kha hi na mbi selela mati amu ka sisima hi na tsimbila ngu nzila ya digondo dwe, kala hi txi tshawunyeta ditikoni kwako.

²³Kambe Sihoni kha nga tumela ti to Israyeli e tshawunyeta mihingano yakwe; konaho Sihoni a to xomisa vathu vakwe, va txi tsula txiwulani ve hingeta Israyeli; va to hoka Johaza, va txi ya manana kona, velwa ni Israyeli.

²⁴Se Israyeli a to va tholetela ngu matxhari, e va khozisa, e teka ditiko dawe, kukhukhela Arnoni kala Jabhoki, kala ka vanana va ka Amoni; nguko m'hingano wa vanana va ka Amoni, wu ti ti ni mkhokhola wa hombe.

²⁵Ngu koneho, Israyeli a to honyola otshe madhoropa, e zumba ka ona a Vaamori, amu Hesibhoni ni otshe madhoropa ma nga ti hahatshi kwawe.

²⁶Nguko Hesibhoni i ti m'zinda wa Sihoni, mfumeli wa Vaamori, a nga ti lwile ni mfumeli wa Mowabhi a nga ti tiho ngu kale ka kona, a txi mtekela ditiko dotshe kala Arnoni.

²⁷Ngu koneho vanyamavingu va ku kha vona: “Ngonani Hesibhoni! Didhoropa da Sihoni, di na akwe di tsaniswa.

²⁸ Nguko mndilo wu tile ngu Hesibhoni, mxavingo wu khukhete didhoropani ka Sihoni; se wu lovisile Are, wa Vamowabhi, ni vahombe va mimangoni ka Arnoni.

²⁹Ddikhombo kwako awe Mowabhi! U timete awe ditiko da Kemosi! U ningete vanana vanu ve tutuma, ni mahorana anu ka wukhumbi wa Sihoni, mfumeli wa Vaamori.

³⁰Se athu hi va fuletete; kukhukhela Hesibhoni kala Dhibhoni, hi va xasete kala Nofa; mndilo wu hokile kala Medhebha.”

³¹Israyeli a to aka ditikoni ka Vaamori.

³²Msana keto, Mosi a to ruma mitumi ya kuya xola ditiko da Jazera, va to honyola yotshe mikhokhola yi nga ti hahatshi kwawe, ve tutumisa Vaamori va va nga ti akile koneyo.

³³Sekoko va to phinduka ve rendekela didhawa da Bhasani; se Oge, mfumeli wa Bhasani, ni vathu vakwe votshe, va to hingeta Israyeli kona Edreyi, va txi lava kulwa navo.

³⁴Se MKOMA a to khene ka Mosi: U nga thave, nguko ene ni mningete manzani kwako, ene ni vathu vakwe votshe, ni ditiko dakwe dotshe; u na maha kwakwe madingano ni ti u nga maha ka Sihoni, mfumeli wa Vaamori, awu a nga ti akile Hesibhoni.

³⁵Va to lwa nayo, va txi mkhozisa, ene, vanana vakwe, vathu vakwe, ku si huluki lambi ni wammweyo, ve teka ditiko dakwe.