Read chopi Mitengo 24 Bible Online

Mitengo 24 - chopi bible

Mitengo 24

¹Ngako Bhalahamu a di woni ti to MKOMA a ti wona i di tinene masoni kwakwe, kukatekisa Israyeli, kha ngava ni mipimiso yo maha ngu kuhutetela, ku nga simwani sikhati; konaho a to tshembereka e wonetela txiwulani.

²Se Bhalahamu a to gula maso e wona Vaisrayeli, va di zumbile ka matenda awe, ngu tinyumba tawe, se Moya wa Txizimu wu tota txitimwi kwakwe.

³Se a to embelela ndando yakwe, a txi khene: “Kuhuta ka Bhalahamu, mwana Bheyori; ngu dona dipswi da m'thu wu a nga tulwa maso;

⁴kuwomba wule a nga pfa dipswi da Txizimu, awu a wonako siwoniso sa wa Mtamo-wotshe, awu mbimo yi awako, maso akwe ma tulekako.

⁵Eto ma nga tshurisa tona matenda ako awe Jakobe! Eto di nga tshurisa tona dizumbo dako awe Israyeli!

⁶Ngu nga sinambwana ma nga nava, yi txi nga mweto ha tikasani ka lidhonga, kufana ni mbhangani yo phawa ngu MKOMA, yi txi nga mikedhari yi ku hafuhi ni mati!

⁷Mati ma na khulunga ngu mabhaketi akwe, mbewu yakwe yi na nakaniswa ngu mati amangi. Mfumeli wakwe a na va wa hombe kupinda Agage. Mfumo wakwe wu na va ni mtamo.

⁸Txizimu txi mthavisile Egipta; mtamo wakwe wu fana ni wa nyari; a na heta matiko a valala vakwe, kambe a na funya marambu awe, a txi va thola ngu miseve yakwe.

⁹ A bukhwamile e baramela kufana ni ngonyamo ya matune, a txi nga ngonyamo ya mkati; i mani a no mkhukhisa kani? Va na kateka ava va ku katekisako. Se va na ruketelwe ava va mi ruketelako.”

¹⁰Sekoko konaho, Bhalake a to henyela Bhalahamu, kambe a pekile manza akwe; se Bhalake a to khene ka Bhalahamu: “Ni ku dhanete ku ta ruka valala vangu; aniko awe konkuwa se u va katekisile kuraru do gwita!

¹¹Se konkuwa thava u tsula ka wukhalo wako; ani ni ti ti khani ni na kudhunda ngutu; aniko wona taku, MKOMA a ku tsivete wudhumo wuwa.

¹²Sekoko Bhalahamu a to khene ka Bhalake: Ina kha na gela mitumi yako yi u nga yi ruma, ni txi khani:

¹³Hambi i diku Bhalake o ni ninga nyumba yakwe yi di tate ngu silivhela ni nzalama, kha ni na kuhambunyeta Mlayo wa MKOMA, ni ti mahela mbiluni kwangu ta tinene mwendo to biha; ati MKOMA a no ni gela, ngu tona eto ni no womba tona.

¹⁴Konkuwa koko, ani na tsula ka vakakwathu, ngono ni ta kuzivisa ati vathu vava va no maha, ka vathu vako ka masiku o gwitisa.”

¹⁵Sekoko a to thula ndando yakwe, a txi khene: Womba-womba Bhalahamu, mwana Bheyori, kambe womba-womba mthuwe u nga tulwa maso;

¹⁶kuwombawomba wu a nga pfa dipswi da Txizimu; awu a nga wona txiwoniso txa wule wa Mtamo-wotshe awu mbimo yi awako, maso akwe ma tulekako.

¹⁷Ni na mmona, aniko na i si nga konkuwa; Ani ni na mmona aniko i si nga hafuhi; nyeleti yokari yi nata ngu ka Jakobe, ni ndonga yi na huma ngu ka Israyeli, kambe yi peka mihingano ya Vamowabhi, yi txi khundumusa votshe[7] vanana va Sete.

¹⁸Se Edhomi a na va i di thomba, Seyiri nene a na va thomba yo salela valala vakwe; koko Israyeli a na kombisa mtamo wakwe.

¹⁹Se ngu ka nyumba ya Jakobe, ku na huma mfumeli. A na lovisa votshe va va no sala mitini.

²⁰Se mbimo yile Bhalahamu a nga wona Vaamaleki, a to thula ndando yakwe a txi khene: Amaleki ngene wo khata ka yotshe mifumo. Kambe ngu magwito ka kona, ngene a nga loviswa.

²¹Se mbimo yile Bhalahamu a nga wona Vakeni, a to thula yimwani ndando a txi khene: Nyumba yako yi tsani awe Keni, ni txisaka txako txi akilwe ha dirigwini.

²²Hambi keto, Mkeni a na hasamulwa, kala Asuri, e kuyisa kule, u di khumbi.

²³Se Bhalahamu a to thula kambe ndando yakwe, a txi khene: Dikhombo ka wule a no sala, mbimosi Txizimu txi no maha kuranda ka txona.

²⁴Se sitimela sa mabambe ka mati a Kitime, si na xanisa Asuri; kambe si na xupha Vahebheri; kuve nene a naya kulovani.

²⁵Sekoko Bhalahamu a to khukha e tsula, e tshumelela ka wukhalo kwakwe, Bhalake nene a to teka yakwe nzila.