Read chopi Mitengo 25 Bible Online

Mitengo 25 - chopi bible

Mitengo 25

¹Se mbimo yile Israyeli a nga zumba Sitime, vathu va to khata kumaha wugango ni vanana vamahorana a Vamowabhi.

²Vona va to ramba vathu kuya phaxela sizimu sawe; vathu va to dya, ve khizamela sizimu sawe.

³Israyeli koko a to ti tshanganisa ni Bhahali-Peyori, kuhenya ka MKOMA ku to tura masoni ka Israyeli.

⁴MKOMA a to khene ka Mosi: Teka votshe vathangeli va vathu, u ta va aneka ha lisanini, nguko va hambukile, MKOMA a henyile; mwendo MKOMA a na boxa txiviti a ku natxo ngu va ka Israyeli.

⁵Sekoko Mosi a to khene ka valamuli va ka Israyeli: Va na dawe votshe ava va nga ti tshanganisa ni Bhahali-Peyori.

⁶Wona taku kutota wamwamna wokari ngu ka vanana va ka Israyeli, a txi neha wamsikati wa Mumedhiyani ka vanawe, hafuhi ka Mosi ni msengeletano wotshe wa va ka Israyeli, konaho msengeletano wu nga ti dila, ha txikeni ka Ditenda da Msengeletano.

⁷Se aha a nga wona tiya Finiyasi, mwana Eleyazari, wa Aroni mphaxeli, a to khukha hagari ka msengeletano, a di ni ditxhari manzani.

⁸Mamoyo a to londeta wamwamna wule wa Muisrayeli ditendani, a txi ya va thola votshe vavambidi, wamwamna wule wa Muisrayeli ni wamsikati wule, ngu ha ka mirumbu, sekoko mtungu wu to ema ka vanana va ka Israyeli.

⁹Se ava va nga dawa ngu mtungu wule, i 24.000.

¹⁰Sekoko MKOMA a to womba ka Mosi a txi khene:

¹¹Finiyasi, mwana Eleyazari, mwana mphaxeli Aroni, a vayilelisile dikhulo dangu txitimwi ka vanana va ka Israyeli, nguko a to ti ningela hagari kwawe. Se kha na nga va lovisa vanana va ka Israyeli, ngu kuhenya kwangu.

¹²Ngu toneto, i nda khawe: Ni na mninga txitumelelano txa kudikha.

¹³Ku nava kwakwe ni ka liveleko lakwe, msana kwakwe ku nava ni txitumelelano txa wuphaxeli wa kala kupinduka, nguko a khutate ka Txizimu txakwe, e mahela vanana va ka Israyeli, mphaxo wo va tekisa.

¹⁴Se ditina da Muisrayeli wu a nga dawa ni wamsikati wa mmidhiyani, i ti ti Ziniri, mwana Salu, wa hombe wa nyumba ya vatate va ka Simiyoni.

¹⁵Kasi ditina da wamsikati wa Mumedhiyani a nga dawa i Kozibhi, mwana Zuri, i nga ti mthangeli wa nyumba ya Vamidhiyani.

¹⁶MKOMA a to womba kambe ka Mosi a txi khene:

¹⁷Xuphani Vamidhiyani, mi va dayela,

¹⁸nguko nanu va mi xanisile, va mi xengetete ngu wurindi wawe, nga ha va nga mi kanganyisa ngu mahungu a Peyori, ni mhaka ya Kozibhi, i ku mwanana wa wahombe wa mmidhiyani, ndiya ya wu a nga dawa ditshikudo da mtungu wu wu nga humelela ngu mhaka ya Peyori.