Read chopi Mitengo 29 Bible Online

Mitengo 29 - chopi bible

Mitengo 29

¹Ngu kufana nito, mi na va ni kusengeletana ko sawuleka, ka mtxima wa wutxhanu ni yimbidi, ngu ditshiku do khata ka mtxima; mi nga maheni mthumo wo nemela ni wawumwewo; di na va ditshiku da kutsaka ka hombe kwanu.

²Sekoko mi na ningela ka MKOMA mphaxo wa kuhiswa, wo bhumula, dirole, hamba, ni mtxhanu wa sinvutana ni simbidi, sa dilembe dimwedo, sa kwa mbi na sibawa.

³Ni mningelo wa kona wa sakudya sa mpupu wo tshura, wo kanyangelwa ni mtona, mpimo wa wuraru ka wugumi, ka dirole, ni mpimo wa wumbidi ka wugumi ngu hamba,

⁴ni mpimo wumwewo wa wugumi ka txinvutana, ka sotshe sinvutana sa mtxhanu ni simbidi.

⁵Ni mabhongwe wa mphaxo wo thavisa txionho, kasi kuthavisa sionho sanu.

⁶ Hahanze ka mphaxo wa kuhiswa wa mtxima, ni mningelo wa kona wa sakudya, ni mphaxo wa kuhiswa wa yotshe mbimo, ni mningelo wa kona wa sakudya, ni sa kusela sa kona, madingano ni sileleto sa kona, mphaxo wo bhumula, mningelo wo hiswa, ka MKOMA.

⁷Se ngu ditshiku da digumi, ka mtxima wuwa wa wutxhanu ni yimbidi, mi na va ni msengeletano wo sawuleka, ni kukarateka timbiluni kwanu, mi nga maheni mthumo ni wawumwewo.

⁸Kambe mi na ningela mphaxo wa kuhiswa, wo bhumula, ka MKOMA, i ku dirole, ni hamba, ni mtxhanu wa sinvutana ni simbidi, sa dilembe dimwedo; si singako ni sibawa.

⁹Se ngu mningelo wanu wa sakudya sa mpupu wo tshura, wo kanyangelwa ni mtona, mpimo wa wuraru wa wugumi ka dirole, mpimo wa wumbidi ka wugumi, ngu hamba.

¹⁰Ni mpimo wumwewo ka wugumi, ka txinvuta tximwani ni tximwani, ka mtxhanu wa sinvutana ni simbidi.

¹¹ Mabhongwe mmweyo, kasi kuthaviswa txionho, ngu kusawulekiswa, ni mphaxo wa kuhiswa, wa yotshe mbimo, ni mningelo wa sakudya, ni sa kusela sa kona.

¹²Ngu kufana nito, ngu ditshiku da digumi ni mtxhanu, ka mtxima wa wutxhanu ni yimbidi, mi na va ni msengeletano wo sawuleka; mi nga maheni mthumo ni wawumewo wo nemela, aniko mi na mahela m'buso MKOMA, amu ka mtxhanu wa masiku ni mambidi.

¹³Se ngu mphaxo wa kuhiswa, wo bhumula, ka MKOMA, mi na ningela digumi da marole ni mararu, tihamba timbidi, ni digumi da sinvutana ni mune, sa dilembe dimwedo; sa kwa mbi na sibawa.

¹⁴Se mi na ningela mningelo wa sakudya, sa mpupu wo tshura, wo kanyangelwa ni mtona, mpimo wa wuraru ka wugumi, ngu dirole, ka dirole ni dimwani, mndani ka digumi da ona ni mararu, mpimo wa wumbidi ka wugumi, ngu hamba, amu ka tihamba timbidi.

¹⁵Mi na ningela kambe mpimo wumwewo ka wugumi, ngu txinvutana tximwetxo, ka digumi da sinvutana ni mune.

¹⁶Ni mabhongwe, kasi kuthavisa sionho sanu, hahanze ka mphaxo wa kuhiswa wa yotshe mbimo, mningelo wa kona wa sakudya, ni sa kusela sa kona.

¹⁷Ngu ditshiku da wumbidi, mi na nigela digumi da marole ni mambidi, ni tihamba timbidi, ni digumi da sinvutana ni mune, sa dilembe dimwedo, sa kwa mbi na sibawa.

¹⁸Amu ka miningelo yanu ya sakudya, ni ka miphaxo yanu ya marole, ni tihamba, ni sinvutana, madingano ni sileleto sa kona.

¹⁹Ni mabhongwe, kasi kumaha mhamba ya kuthavisa sionho, hahanze ka mphaxo wa kuhiswa, wa yotshe mbimo, ni mningelo wa sakudya, ni sa kusela sa kona.

²⁰Se ngu ditshiku da wuraru, mi na ningela digumi da marole ni dimwedo, ni tihamba timbidi, ni digumi da sinvutana ni mune, sa dilembe, sa kwa mbi na sibawa.

²¹Mi na ningela kambe mningelo sa sakudya, ni sa kusela sa kona, ngu marole, ni tihamba, ni sinvutana, madingano ni mtengo wa sona, ni madingano ni sileleto sa kona;

²²Ni mabhongwe, kasi kuthavisa sionho, hahanze ka mphaxo wa kuhiswa, wa yotshe mbimo, ni mningelo wa kona wa sakudya, ni sa kusela sa kona.

²³Se ngu ditshiku da wumune mi na nigela digumi da marole, ni tihamba timbidi, ni digumi da sinvutana ni mune, sa dilelmbe dimwedo, sa kwa mbi na sibawa.

²⁴Sotshe sihari si, marole, ni tihamba, ni sinvutana, mi na si ningela ni mningelo wa sakudya, ni sa kusela sa kona, madingano ni mtengo wa kona, ni madingano ni sileleto sa kona;

²⁵ni mabhongwe, kasi kuthavisa txionho, hahanze ka mphaxo wa kuhiswa, wa yotshe mbimo, ni miningelo wa sakudya, ni sa kusela sa kona.

²⁶Ngu ditshiku da wutxhanu, mi na ningela mtxhanu wa marole ni mune, ni tihamba timbidi, ni digumi da sinvutana ni mune, sa dilembe dimwedo, sa kwa mbi na sibawa.

²⁷Mi na ningela ni miningelo wa kona wa sakudya, ni sa kusela sa kona, ngu marole, ni tihamba, ni sinvutana, madingano ni mtengo wa kona, ni txileleto txa kona.

²⁸Mi na ningela mabhongwe wa mphaxo wa kuthavisa txionho, hahanze ka mphaxo wa kuhiswa, wa yotshe mbimo, ni miningelo wa kona wa sakudya, ni mningelo wa sa kusela kona.

²⁹Se ngu ditshiku da wutxhanu ni dimwedo, mi na ningela mtxhanu wa marole ni mararu, ni tihamba timbidi, ni digumi da sinvutana ni mune, sa dilembe dimwedo, sa kwa mbi na sibawa.

³⁰Mningo wa kona wa sakudya, ni sa kusela sa kona, ngu marole, ni tihamba, ni sinvutana, madingano ni mtengo wa kona, ni madingano ni txileleto txa kona;

³¹ni mabhongwe, kasi kutxhavisa txionho, hahanze ka mphaxo wa kuhiswa, wa yotshe mbimo, ni mningelo wa sakudya, ni sa kusela sa kona.

³²Ngu ditshiku da wutxhanu ni mambidi, mi na ningela mtxhanu wa marole ni mambidi, ni tihamba timbidi, ni digumi da sinvutana ni mune, sa dilembe dimwedo, sa kwa mbi na sibawa.

³³Mningelo wa kona wa sakudya, ni sa kusela sa kona, ngu marole, ni tihamba, ni sinvutana, madingano ni mtengo wa kona, ni madingano ni txileleto txa kona.

³⁴Mi na ningela mabhongwe, kasi kuthavisa txionho, hahanze ka mphaxo wa kuhiswa, ni mningelo wa sakudya, ni sa kusela sa kona.

³⁵Se ngu ditshiku da wutxhanu ni mararu, mi na va msengeletano wa mpipi wa hombe, mi nga maheni mthumo ni wa wumweyo:

³⁶Ni mphaxo wa mningelo wa kuhiswa, wo bhumula, ka MKOMA, ni dirole, ni hamba, ni mtxhanu wa sinvutana ni simbidi, sa dilembe dimwedo, sa kwa mbi na sibawa.

³⁷Dirole, ni hamba, ni sinvutana, u na si ningela kumweko ni mningelo wa sakudya, ni sa kusela sa kona, madingano ni mtengo wa kona, ni madingano ni txileleto txa kona.

³⁸ Ni mabhongwe wa kuthavisa txionho, hahanze ka mphaxo wa yotshe mbimo, mningelo wa sakudya, ni sa kusela sa kona.

³⁹Awu mthumo, mi na wu mahela MKOMA, ka mipipi yanu ya hombe, hahanze ka kuxambanya kwanu, ni miningelo ya kuranda kwanu, miphaxo yanu yo hiswa, ni miningelo yanu ya sakudya, ni sa kusela sa kona, ni miningelo yanu ya kudikha.

⁴⁰Se Mosi a to womba-womba ka vanana va ka Israyeli, madingano ni totshe tile MKOMA a nga leleta ka Mosi.