Read chopi Mitengo 3 Bible Online

Mitengo 3 - chopi bible

Mitengo 3

¹Ngu tiya tiveleko ta Aroni ni ta Mosi, mbimo yi MKOMA a nga womba-womba ka Mosi, mmangoni ka Sinayi.

²Matina a vanana va Aroni ngu awa: Nadhabhi, matiwula ngu msana ka Abhiyu, Eleyazari ni Itamari.

³Eyo matina a vanana va Aroni, vaphaxeli va nga totwa, ava va nga emiselwa kuthuma mthumo wa wuphaxeli.

⁴ Nadhabhi ni Abhiyu va fite masoni ka MKOMA, txiwulani ka Sinayi, mbimo yi va nga ningela mphaxo masoni ka MKOMA, ngu mndilo i singako wona. Vona va si nga ni vanana, ngu mhaka yeto, Eleyazari ni Itamari, ngu vona va nga teka mthumo wa wuphaxeli masoni ka Tate wawe Aroni.

⁵Se MKOMA a to womba ka Mosi a txi khene:

⁶“Tshuketisa lihunzu la ka Levhi, u li veka hawa ko vhunetela Aroni, mphaxeli: Vona va na thuma nayo;

⁷se va na va ni mthumo wa wuwoneleli, ni kuwonelela wotshe msengeletano, amu ka ditenda da msengeletano, ngako va txi huma mu nyumbani.

⁸Va na xayisa sotshe siya sa mu ditendani ka msengeletano, ni kuxayisa asi si lumbako vanana va ka Israyeli, asi va fanelako ku si xayisa amu ka Dithepele.

⁹Ti di ngeto, u nga ningela Valevhi ka Aroni ni ka vanana vakwe, ti to veva txiningo txawe; mthumo wa kona wu na thumela vanana va ka Israyeli.

¹⁰Aniko Aroni ni vanana vakwe, ngu vona va no thuma mthumo wa wuphaxeli. Kasike, awule i ku wa matiko, ku nga ti a txi tshuketa, a na puluwundiswa ngu lifo.”

¹¹Se MKOMA a to engeta e womba ka Mosi a txi khene:

¹² “Ngani nipune ni nga sawula Valevhi hagari ka vanana va ka Israyeli, wukhaloni ka otshe matiwula, a hagari ka vanana va ka Israyeli, avale va ngava situla-masembe ka vamame vawe, ngu mhaka yeto Valevhi mbangu.

¹³ Nguko otshe matiwula ma ni lumba; kukhukhela ka ditshiku dile ni nga heta matiwula a vanana va Vaegipta, ni ti sawulete otshe matiwula a va ka Israyeli kukhukhela ka vathu, ni sihari, ma lumba ani! Ani ngani MKOMA!”

¹⁴Se MKOMA a to womba-womba ka Mosi txiwulani ka Sinayi, a txi khene:

¹⁵Bala vanana va Valevhi, ngu mimwaya ya vatate vawe, ni tihunzu tawe, u na bala vavamna votshe kukhukhela ka wu wa mtxima wumwewo ni kuya masoni.

¹⁶Se Mosi a to bala mtengo madingano ni kuleleta ka MKOMA.

¹⁷Ava, ngu vona vanana va Levhi ngu matina awe, Gerxoni ni Kohate ni Merari.

¹⁸Matina a vanana va Gerxoni ngu mimwaya yawe ngu awa: Libhini ni Simeyi.

¹⁹Vanana va Kohate ngu mimwaya yawe: Amramu, Izari, Hebroni, ni Uziyeli.

²⁰Vanana va Merari ngu mimwaya yawe: Mahili ni Muxi. Asiya ngu sona sike sa Valevhi ni tinyumba ta vatate vawe.

²¹Liveleko la Gerxoni wa txike txa ka Libhini, ni txike txa va ka Simeyi: Asiya, ngu sona sike sa va ka Gerxoni.

²²Kubala votshe vavamna kukhukhela ka va va ku ni tanga ya mtxima, kala ka va va ku masoni i ti ti 7.500 wa vathu.

²³Tiveleko ta va ka Gerxoni ti txi zumba ngu msana ka txiluvelo ngu didhawa da mswa-ditambo.

²⁴Se mthangeli wa nyumba ya ka Gerxoni i ti ti Eliyasafe, mwana Layeli.

²⁵Vanana va Gerxoni amu ka ditenda da msengeletano, va ti ningilwe mthumo wo xayisa txiluvelo, ni kutshulela, ni nguwo ya ha txikeni ka ditenda da msengeletano.

²⁶Va ti ningilwe kambe kuxayisa tinguwo ta mtendela ni nguwo ya ha txidingeni ka mtendela wu wu nga ranganyeta dithepele ni txiluvelo, ni tingoti ti ti lavekako ka wotshe mthumo wa kona.

²⁷Liveleko la Kohate wa Amiramu, ni la Izari, ni Hebroni, ni Uziyeli; atiya ngu tona tiveleko ta va ka Kohate.

²⁸Mtengo wotshe wa vanana va nga balwa, va tanga ya mtxima wumwewo ni kuya masoni, mbwa 8.600.

²⁹Mimwaya ya ka Kohate yi to gova ka didhawa da wulambwe ka ditenda.

³⁰Se mthangeli wa nyumba ya mimwaya ya ka Kohate, i ti ti Elisafani, mwana Uziyeli.

³¹Mthumo wawe i ti wo xayisa dibhokiso, ni meza, ni phande ya malambu, ni siluvelo, se ni siya sa wukhalo wo sawuleka so thuma ngu sona, ni m'jiyo, ni sotshe si lumbako mthumo.

³²Se mthangeli wa vathangeli va ka Levhi, i ti ti Eleyazari, mwana Aroni, mphaxeli. Ene a ti ti ni mthumo wo thangela votshe vale va nga txi xayisa wukhalo wo sawuleka.

³³Liveleko la ka Merari, wa ka Mahili, ni la ka Muxi; atiya, ngu tona tiveleko ta va ka Merari.

³⁴Se avale va nga balwa hagari kwawe, ngu mtengo wa votshe vavamna va tanga ya mtxima ni kuya msoni, i ti ti 6.200.

³⁵Mthangeli wa nyumbani ka vatate va mimwaya ya ka Merari, i ti Suriyeli, mwana Abhigayeli. Vona va ti ya gova ngu didhawa da wuphemba ka ditenda.

³⁶Se mthumo wa vanana va ka Merari wu na va wa kuxayisa mapulango a nyumba, ni timbalelo ta kona, ni tiphande, ni siparako, ni sotshe si si nga txi laveka, ni sotshe siya sa kona.

³⁷Kumweko ni mthumo wa kuxayisa tiphande ti ti nga txi ranganyeta diguma, siparako sa kona, sipande sa kona, ni tingoti ta kona.

³⁸Didhawa da wutxani, masoni ka ditenda da msengeletano, ngu didhawa da wutxani, Mosi, ni Aroni, ni vanana vawe, va na gwimba matenda awe masoni ka ditenda do sawuleka, va txi xayisa wukhalo wo sawuleka, kasi ku va vawoneleti va vanana va ka Israyeli; ngako m'thu wa walo a txo tshuketa, a fanete a txi fa.

³⁹Votshe vanana vavafana va Valevhi, ava va nga balwa ngu Mosi, ni Aroni, ngu kuruma ka MKOMA, madingano ni liveleko lawe, i ti ti 22.000.

⁴⁰Se MKOMA a to khene ka Mosi: Bala votshe vanana va matiwula a vafana va va ka Israyeli, va tanga ya mtxima wumwewo ni kupinda, u bhala mtengo wa matina awe.

⁴¹Ni sawulele Valevhi, (ani ngani Mkoma) ka wukhalo wa otshe matiwula a vanana va ka Israyeli, ni sihari sa Valevhi ka wukhalo wa sihari sa vanana va ka Vaisrayeli.

⁴²Se Mosi a to bala otshe matiwula a vanana va ka Israyeli, nga ti MKOMA a nga wombisa tona.

⁴³Matina otshe a matiwula a vafana va tanga ya mtxima wumwewo ni kuya masoni, i ti mtengo wa 22.273 wa vathu.

⁴⁴Se MKOMA a to womba ka Mosi, a txi khene:

⁴⁵Teka Valevhi ka wukhalo wa otshe matiwula a vanana va ka Israyeli, se sihari sa Valevhi ka wukhalo wa sihari sa Vaisrayeli. Valevhi va na va vangu. Ani ngani MKOMA!

⁴⁶Matiwula a vanana va ka Israyeli ma na pinda a Valevhi ngu mtengo wa 273 vale va no tirulwa.

⁴⁷U na teka mtxhanu wa maxekele ka m'thu mmwani ni mmwani; ngu kuya ngu maxekele a wukhalo wo sawuleka, u teka magumi mambidi a magera ngu dixekele .

⁴⁸Se Male ya kutirulwa ka vale va nga sala hagari kwawe, u na yi ningela ka Aroni ni vanana vakwe.

⁴⁹Sekoko Mosi a to teka male yo tirulisa, ya vale va nga sala kuhulukiswa ngu Valevhi.

⁵⁰Ka matiwula a vanana va ka Israyeli a to teka male, ya 1.365 wa maxekele, madingano ni maxekele a wukhalo wo sawuleka.

⁵¹Se Mosi e ninga Aroni ni vanana vakwe, male yo tirulisa ngu yona, madingano ni kuruma ka MKOMA, nga ti MKOMA a nga wombisa tona ka Mosi.