Read chopi Mitengo 34 Bible Online

Mitengo 34 - chopi bible

Mitengo 34

¹MKOMA a to womba kambe ka Mosi, a txi khene:

²Gela vanana va ka Israyeli u txi khawe: Ngako mi di wulete ditikoni ka Kanana, ditiko diya di na va thomba yanu: Ditiko da Kanana, madingano ni mihingano ya dona.

³Didhawa da wulambwe, di na khukhela ka txiwula txa Zini, kala ka mihingano ya Edhomi; se m'hingano wa wulambwe wu na khukhela magwito ka Linene la Mnyu, kala ka didhawa da wutxani.

⁴Muhingano wuwa, wu na horoloka kukhukhela wulambwe, mimangoni ka Akrabhime, kala Zini; wu na khukhela wulambwe ka Kadhesi-Bharineya; wu na khukhela Hasari-Adhara wu pinda ngu Azimoni;

⁵muhingano wuwa wu na horoloka kambe ngu Azimoni kala ka mnambo wa Egipta; wu txi ya gwitela ka didhawa da linene.

⁶Ngu didhawa da mswa-ditambo, mi na maha muhingano ngu Linene la Hombe; linene ngu wona muhingano wanu wa mswa-ditambo.

⁷Se muhingano wa ditiko danu, ngu didhawa da wuphemba ngu wuwa: Kukhukhela ka Linene la Hombe, kala ka mmango wa Hori.

⁸Kukhukhela mmangoni ka Hori, mi na veka muhingano wo wulela Hamati; wu txi gwitela Sedhadhi.

⁹Se muhingano wuwa wu na tsimbila kala Sifironi, wu txi ya gwitela Hasari-Enana; se awuwa wu na va muhingano wa wuphemba.

¹⁰Se muhingano wa didhawa da wutxani, mi na wu veka kukhukhela Hasari-Enana, kala Xefamu.

¹¹Se muhingano wuwa, wu na khukhela Xefamu, kala Ribhila, didhawa da wutxani ka Ayini, wu ngirimela lidhongani ka Linene la Kinereta, ngu didhawa da wutxani.

¹²Kambe muhingano wuwa wu na kwitima wo londetela mnambo wa Jordhani, wu txi ya gwitela ka Linene la Mnyu; adiya i nava ditiko danu, madingano ni mihingano yi yi di ranganyetako.

¹³ Se Mosi a to gela vanana va ka Israyeli, a txi khene: Adiya ngu dona ditiko di mi no di teka, diva thomba yanu, adi MKOMA a nga ruma ti to di ningelwa ka mtxhanu wa tihunzu ni mune, ni ka hafu ya lihunzu.

¹⁴Nguko lihunzu la vanana va Rubheni, ni lihunzu la vanana va Gadhi ti amukete; ni hafu ya lihunzu la vanana va Manasi di amukete thomba ya dona.

¹⁵Tihunzu timbidi ni hafu ya lihunzu, ti amukete thomba ya tona, mtxhatuko ka Jordhani, wa Jeriko, ngu didhawa da wutxani, ka wutxani.

¹⁶MKOMA a wombile kambe ka Mosi, a txi khene:

¹⁷Aawa ngu ona matina a vathu va va no phakela ditiko: Mphaxeli Eleyazari, ni Joxuwa, mwana Nuni.

¹⁸Ka lihunzu limwani ni limwani, mi na teka mthangeli mmweyo, awu a no vhuneta ka mthumo wo phakela ditiko, di maha thomba.

¹⁹Se matina a vathu va kona ngu awa: Ka lihunzu la ka Judha, i Kalebhi, mwana Jefoni.

²⁰Ka lihunzu la vanana va Simiyoni, i Samiyela, mwana Amihudhi;

²¹ka lihunzu la ka Bhenjamini i Elidhadhe, mwana Kisiloni;

²²ka lihunzu la vanana va Dhani, mthangeli i Bhuki, mwana Jogili;

²³ka lihunzu la vanana va Manasi, vanana va ka Josefa, mthangeli i Haniyela, mwana Efodhi;

²⁴ka lihunzu la vanana va Efrayime, mthangeli i Kemuweli, mwana Xifitana;

²⁵ka lihunzu la vanana va Zebhuloni, mthangeli i Elisafani, mwana Parinaka;

²⁶ka lihunzu la vanana va Isakara, mthangeli i Palatiyeli, mwana Azani;

²⁷ka lihunzu la vanana va Azera, mthangeli i Ayihudhi, mwana Zelome;

²⁸ka lihunzu la vanana va Nafitali; mthangeli i Pedhayeli, mwana Amiyudi.

²⁹Avava ngu vona va MKOMA a nga va ruma tito, ve phakela thomba, ka vanana va ka Israyeli, ditikoni da Kanana.