Read chopi Mitengo 35 Bible Online

Mitengo 35 - chopi bible

Mitengo 35

¹Se MKOMA a to womba ka Mosi, libalani ka Vamowabhi, hafuhi ni Jordhani ka Jeriko, a txi khene:

² Ruma vanana va ka Israyeli taku, ka makhalo awa ma no va thomba yawe, ningani Valevhi madhoropa awa va no zumba ka ona; mi va wilela ni ko dyisa kona sifuyo sawe, hafuhi kwawe.

³Madhoropa awa, va na zumba ka ona, se madhawani ka kona, ma na maha a sifuyo sawe, ni ka thomba yawe, ni sihari sawe sotshe.

⁴Se madhawa a madhoropa awa mi no ma ningela ka va ka Levhi, kukhukhela ka diguma da didhoropa kuya hahanze, ngo dingana 1.000 wa mikono.

⁵Se ngu hahanze ka didhoropa, ngu didhawa da wutxani, mi na pima 2.000 wa mikono, se ka didhawa da wulambwe 2.000 wa mikono, ka didhawa da mswa ditambo, 2.000 wa mikono, ka didhawa da wuphemba 2.000 wa mikono, ni didhoropa hagari.

⁶Ka madhoropa ale koko mi no ma ningela ka Valevhi, ku nava ni mtxhanu wa madhoropa ni dimwedo a wuthavelo, aawa mi no ningela, kasi ku awu a dayako e zumba ka ona; mi na va ninga kambe mune wa magumi ni mambidi a madhoropa.

⁷Otshe madhoropa awa mi no ninga Valevhi, ma nava mune wa magumi ni mtxhanu ni mararu a madhoropa, kupata ni wudyiselo wa kona.

⁸Se madhoropa awa mi no ningela ngu ka thomba ya vanana va ka Israyeli, ka va va ku ni sasingi ku na tekwa sasingi, se ka vale va ku ni sa sidotho, ku na tekwa sa sidotho; mmwani ni mmwani a na ningela madhoropa akwe, ka va ka Levhi, madingano ni thomba yakwe, yi a ku nayo.

⁹MKOMA a to womba kambe ka Mosi, a txi khene:

¹⁰Gela vanana va ka Israyeli u txi khawe: Ngako mi txi txhatuka Jordhani, mi wulela ka ditiko da Kanana,

¹¹ mahani ti to madhoropa meva manzani kwanu, madhoropa a wuthavelo, kasi kuamukelwa ka ona, wule a no daya wokari ngu kuphazama.

¹²Madhoropa awa, awu a no daya m'thu ngu phango a na ya sisala ka ona, a txi thava vaphoteli, kasi ku asi fi, eza e lamulwa, masoni ka msengeletano.

¹³Se ka madhoropa ale mi no ma ningela, ku nava ni mtxhanu wa madhoropa ni dimwedo, aawa anu mi no thavela ka ona.

¹⁴Mi na ningela madhoropa mararu a mtxhatuko ka Jordhani, ni madhoropa mararu a ditiko da Kanana; kasi ku ma txi maha madhoropa a wuthavelo.

¹⁵Madhoropa awa a mtxhanu ni dimwedo, va na thavela ka ona vanana va ka Israyeli, ni mluveli, ni va va hanyako hagari kwawe, kasi ku mmwani ni mmwani wawe, wu a no daya m'thu ngu phango, eya sisala kona.

¹⁶Ngako a txi dayisa m'thu ngu simbi, a txi fa, m'dayi ngu ditshuri; m'dayi a nafa.

¹⁷Mwendo a txi dayisa m'thu ngu dirigwi, do dingana ku a txifa, se a txifa, m'dayi, ngu ditshuri; m'dayi a nafa.

¹⁸Mwendo a txi dayisa m'thu ngu donga, yi a nova a di nayo manzani kwakwe, e m'dayisa a txifa, ngu ditshuri m'dayi; a fanete kudawa nene, a txifa.

¹⁹Mphoteli wa mnoha a na daya apune m'dayi, ngu ditshiku di a mmanako.

²⁰Se m'thu a txi retha m'thu ngu mhaka ya ku mnyenya, mwendo kurinza txo maha txi m'daya,

²¹mwendo a txi peka mlala wakwe ngu txibhakela, se a txifa, ngu ditshuri m'dayi a nafa, nguko m'dayi, se mphoteli wa mnoha, a na daya m'dayi, ditshiku di a no mmana.

²²Aniko ngako a txi retha m'thu ngu phazamo, awu i singako mlala wakwe, mwendo ku mrinza txo maha ngu phazamo;

²³mwendo a txi rinza dirigwi na asi muwoni, do dingana ku m'daya, se atxi fa, na i si nga mlala wakwe, mwendo kulava ku m'daya,

²⁴sekoko msengeletano wu na lamula hagari ka wule a nga dayiswa ni ka mphoteli, madingano ni milayo yiya.

²⁵Se msengeletano wu na hulukisa m'dayi manzani a mphoteli wa mnoha, kambe msengeletano wu na mtshumeta eya ka didhoropa da wuthavelo, amu a nga ti tutumete kona; eya zumba kona an'ze a txifa mphaxeli wa hombe, awu va nga mtota mafura o sawuleka.

²⁶Kambe ngako m'dayi a txi thuka e huma ka mihingano ya didhoropa da wuthavelo wakwe, emo a nga ti tutumete kona,

²⁷se e manwa ngu mphoteli wa mnoha mihinganoni ka didhoropa da wuthavelo wakwe, ngako mphoteli wa mnoha a txi daya m'dayi, kha na mbi mana mnandu.

²⁸Nguko m'dayi a fanela kuzumba didhoropani ka wuthavelo wakwe, an'ze kuza a txifa mphaxeli wa hombe; aniko msana ka kufa ka mphaxeli wa hombe, m'dayi a nga tshumela e tsula ditikoni kwakwe.

²⁹Timhaka tiya ti nava i di mthetho wo dingana tiveleko tanu, kotshe amu mi no ya zumba kona.

³⁰ Ni wihi wu a no daya m'thu, madingano ni kuwomba ka tifakazi, va na daya m'dayi; aniko fakazi yimweyo dwe kha yi na kufakaza eza e dawa m'thu,

³¹kambe kha mi na mbi amukela mhamba yo tsiveta[11] wutomi wa m'dayi, wu a ku ni mnandu wo dingana kudawa; ngu ditshuri a na dawa.

³²Kambe mi nga amukeleni mhamba ya m'thu wule a nga zumba didhoropani ka wuthavelo, kasi kutshumela eya hanya ditikoni kwakwe, an'ze a txifa mphaxeli wa hombe.

³³Ngu maha yeto, kha mi na mbi nyenyezisa ditiko di mi ku ka dona; nguko mnoha wa maha ditiko di nyenyeza; kambe ni wawumwewo mphaxo wa kuthavisa txionho, kha wu na mbi mahwa ngu mhaka ya ditiko, ngu mhaka ya mnoha wu wu no thekela ka dona, hahanze ka mnoha wa wule a nga theketa mnoha wa mmwani m'thu.

³⁴Mi nga nyenyeziseni koko, ditiko di mi zumbako ka dona, adi ni no zumba ka dona; nguko ani MKOMA, ni zumba hagari ka vanana va ka Israyeli.