Read chopi Mitengo 36 Bible Online

Mitengo 36 - chopi bible

Mitengo 36

¹Se vathangeli va vatate va liveleko la vanana va ka Gileyadhi, mwana Makiri, mwana Manasi, va mimwaya ya vanana va ka Josefa, va to ta ka Mosi, ni masoni ka vahombe, va i ku vathangeli va vatate va vanana va ka Israyeli.

² Se va to kha vona: MKOMA a rumile nyamne wangu kuningela ditiko diya, kuva thomba ya vanana va ka Israyeli; niku nyamne wangu a rumilwe ngu MKOMA taku, thomba ya mwanathu Zelofeyadhi, yi ningelwa ka vanana vakwe vamahorana.

³Se ngako va txi tekana ni vokari i ku vanana va timwani tihunzu ta vanana va ka Israyeli, thomba yawe yi na hungulwa ka thomba ya vatate vathu, yi engetelwa ka thomba ya lihunzu lile va no tekana nalo; ngu mamahelo awa, ku na hunguleka thomba yathu.

⁴Kambe ku txi hoka Dilembe da M'buso wa Hombe wa vanana va ka Israyeli, thomba yawe yi engetelwa ka thomba ya lihunzu la vale va no tekana navo; ngu mamahelo awa thomba yawe yi na thaviswa ka thomba ya vatate vathu.

⁵Sekoko Mosi a to ruma vanana va ka Israyeli, madingano ni kuruma ka MKOMA, a txi khene: Lihunzu la vanana va ka Josefa, li womba-womba to pfala.

⁶Dipswi di MKOMA a nga ruma ngu mhaka ya vanana vamahorana a Zelofeyadhi, a txi khene: Va nave vasikati va ni wihi wu a no va wona a txi va navela, va txi tekwa ka mwaya wa lihunzu la tate vawe.

⁷Ngu toneto, thomba ya vanana va ka Israyeli, kha yi na mbi pinda yiya ka lihunzu ni lihunzu; nguko vanana va ka Israyeli va na mana thomba ya lihunzu la vatate vawe.

⁸Se ni wihi mwanana wa dihorana a no mana thomba yokari ya lihunzu la vanana va ka Israyeli, a na tekana ni wokari wa liveleko la lihunzu la tate wakwe; kasi ku vanana va ka Israyeli, ve lumbwa ngu tithomba ta vatate vawe.

⁹Ngu mamahelo eyo, thomba kha yi na mbi pinda ka lihunzu limwelo yiya ka limwani; nguko tihunzu ta vanana va ka Israyeli, ti na mana tithomba ta tona.

¹⁰Vanana vamahorana va Zelofeyadhi, va mahisile tona ti MKOMA a nga rumisa tona ka Mosi.

¹¹Makila, ni Tiriza, ni Hogila, ni Milika, ni Nowa, i ku vanana vamahorana va Zelofeyadhi, va tekani ni vanana va vatatanyani vawe.

¹²Va vile vasikati va va ka Manasi, mwana Josefa; ngu kumaha keto, thomba yawe yi zumbile ka lihunzu la mwaya wa tate wawe.

¹³Ayi ngu yona milayo ni sileleto si MKOMA a nga ruma ngu dianza da Mosi ka vanana va ka Israyeli, libalani ka va ka Mowabhi, hafuhi ni Jordhani, ka Jeriko.