Read chopi Mitengo 6 Bible Online

Mitengo 6 - chopi bible

Mitengo 6

¹Se MKOMA a to womba ka Mosi, a txi khene:

²“Gela vanana va ka Israyeli u txi khawe: Ngako wamwamna mwendo wamsikati wokari, a txi maha txixambanyo txa hombe txo lava kuva Mnazira, a txi ti sawulekisa ngu txona ka MKOMA.”

³ Kha na mbi sela vhinya ni simwani so tshumbelwa; kha na mbi sela vhinagre mwendo ni sihi sa kusela, so tshumbelwa, kambe kha na mbi dya mauvha o nakana mwendo a kuoma.

⁴Ka yotshe mbimo ya kuxambanya kwakwe, kha na mbi dya sotshe si si humako mu ka muuvha, kukhukhela ka timbewu ta kona, hambi ni ka makamba a kona.

⁵Ka yotshe mbimo ya wunazira kha kulaveki kuyolwa msungo, kala ku txi tatiseka mbimo yi a nga xambaya ngu yona, e thumela MKOMA; se a na leka misisi yi kula.

⁶Ka otshe masiku ya a nga ti sawulela kuva munazira wo thumela MKOMA, a nga tshukete hafuhi ka m'thu wa kufa.

⁷Hambi i di tate wakwe mwendo mwamwakwe, mwendo ndiyakwe, a nga thuke a txi ti nzambwisa, nguko txixambanyo txakwe ni Txizimu txi ha msungo kwakwe.

⁸Ka masiku akwe ni wunazira wakwe a ti ningete ka Txizimu.

⁹Se ku nga ti m'thu wokari a txifa hafuhi kwakwe ngu txidhukisa, ku txi bihiswa misisi yakwe yo sawuleka, se ngu ka ditshiku da kubasiswa kwakwe, a na yolwa msisi ka ditshiku da wutxhanu ni mambidi a na yolwa msungo.

¹⁰Ka ditshiku da wutxhanu ni mararu, a na yisa ka mphaxeli matuva mambidi, mwendo mavhondo mambidi a situvani, ha txikeni ka ditenda da msengeletano.

¹¹Se mphaxeli a na ningela dituva dimwedo ngu mphaxo wa txionho; dimwani di na maha do hiswa, ngu kule a nga bihiswa ngu kugwesa m'thu wa kufa; m'thu wule a na va a txi basisa msungo ka donedo ditshiku.

¹²Sekoko a na va a txi xambanya kambe ka MKOMA, ka yotshe mbimo yakwe ya wunazira, a na teka hambana ya nvuta ya tanga ya dilembe, e maha mphaxo wa m'diho, mbimo yi yi nga pinda kha yi na mbi balwa, ngako wunazira wakwe wa kale wu di nzambwisilwe.

¹³ Awuwa mlayo mbwa wunazira wakwe; a na tiswa ha txikeni ka ditenda da msengeletano;

¹⁴se ene a na ningela hamba ka Txizimu, ya dilembe dimwedo ayi yi singako ni txibawa; yi na va mningelo wo hiswa, ni txinvutana txa dilembe dimwedo, txa mkati, na txi si nga ni txibawa, yi na va mphaxo wa kuonha, ni hamba yo mbi na txibawa, ayi yi nova mphaxo wa kubonga.

¹⁵A na neha txirundu txa kutala ngu mapawu o mbi tshumbelwa, ni mpupu wo tshura wo kanyangwa ngu mtona, ni mapawu, sa kwa mbi tshumbelwa, so totwa ngu mtona, ngu txitimwi ka eso, a na tisa mningelo wa sakudya, ni sa kusela.

¹⁶Se mphaxeli a na si tisa masoni ka MKOMA, e ningela mphaxo wakwe wa txionho, ni mningelo wa kuhiswa.

¹⁷Kambe a na ningela hamba ya mphaxo wa kuthutha, masoni ka MKOMA, ni txirundu txa mapawu o mbi tshumbelwa, mphaxeli a na ningela mningelo wakwe wa sakudya, ni sa kusela.

¹⁸Ngu msana Mnazira a na kuyula misisi yakwe, ayi yi ku ni txixambanyo txa wunazira ha txikeni ka ditenda da msengeletano, kambe a na teka misisi ya msungo wakwe ya txixambanyo, e yi veka ha mndiloni, ka mphaxo wa kuthutha.

¹⁹Mphaxeli a na teka diwoko da hamba do bhikwa, ni dipawu do mbi tshumbelwa, sotshe a na si veka amu ka txirundu ni dipawu dimwedo da kwa mbi tshumbelwa, manzani ka Mnazira, ngako a di darutwe misisi ya wunazira wakwe.

²⁰ Se mphaxeli a na si maha mningelo wa lisima masoni ka MKOMA. Sona mningelo wo sawuleka wa mphaxeli, kumweko ni khana yi yi nga ningelwa, ni mningelo wu wu nga siyetwa. Msana keto, Mnazira a nga sikota kusela vhinya.

²¹Awuwa mlayo wa Mnazira, wu a no va a di mahile txixambanyo txa ku ti ningela ka wunazira ka MKOMA, hahanze ka si a no si mana ngu dianza dakwe; madingano ni txixambanyo txi a nga txi maha, a na mahisa tona eto, madingano ni mlayo wa wunazira wakwe.

²²Se MKOMA a to womba ka Mosi, a txi khene:

²³Womba ka Aroni ni ka vanana vakwe u txi khawe: Katekisani vanana va ka Israyeli, mi txi khanu kwawe:

²⁴MKOMA a na ku katekise, a txi kuxayisa,

²⁵MKOMA a na ku woningele e ku mahela wunene,

²⁶MKOMA a na gulete khohe yakwe, e kuninga kuthutha,

²⁷Ngu kumaha keto, ditina dangu, di na va txitimwi ka vanana va ka Israyeli, se ani ni na va katekisa.