Read chopi Mitengo 8 Bible Online

Mitengo 8 - chopi bible

Mitengo 8

¹Se MKOMA a to womba ka Mosi, a txi khene:

²Gela Aroni u txi khawe: Mbimo yi u vekako malambu ha phandeni, veka mtxhanu wa malambu ni mambidi, kasi kuwoningeta ka didhawa da masoni ka phande ya malambu.

³Se Aroni a to maha toneto, e folisela malambu ngu masoni ka phande ya malambu, madingano ni kuleleta ka MKOMA, ka Mosi.

⁴ Se phande ya malambu yi ti ti mahilwe ngu nzalama yo tshulwa kala ha ka txikazelo, ni ka siluva sa kona; ni sona i ti sa nzalama yo tshulwa, madingano ni kuleleta ka MKOMA ka Mosi; phande ya malambu yi mahisilwe toneto.

⁵Se MKOMA a to womba ka Mosi a txi khene:

⁶Teka Valevhi hagari ka vanana va ka Israyeli, u txi va sawulekiswa.

⁷Ati u no mahisa tona kasi ku va basisa ngu tiya: U na xwayela txitimwi kwawe mati o thavisa sionho, msana keto va na ti yola wotshe mmidi wawe ngu limo, ve kuwula syambalo sawe.

⁸Sekoko ngu msana keto va na teka dirole da matune, kumweko ni mphaxo wa sakudya, i ku mpupu wo basa, awu wu nga kanyangelwa ngu mtona, ni dirole dimwani da mphaxo wa txionho.

⁹U na gela Valevhi ti to ve tshuketa masoni ka ditenda da msengeletano, se u na tshanganisa votshe vanana va ka Israyeli.

¹⁰Ku nga ti u txi tshuketisa Valevhi masoni ka MKOMA, vanana va ka Israyeli va na sanzeka manza awe txitimwi ka misungo yawe.

¹¹Se Aroni a to ningela Valevhi kasi kuve mningelo wa kundiwitela masoni ka MKOMA, awu wu humako ngu ka vanana va ka Israyeli. Vona Valevhi wu na va mthumo wawe ka MKOMA.

¹²Valevhi ngu msana, va na sanzeka manza ha misungo ka marole; se u na teka didhuna dimwedo u txi maha mphaxo ngu dona, mphaxo wa txionho; se dimwani didhuna u na maha mphaxo wa kuhiswa ka MKOMA, kasi ti to Valevhi ve mahelwa mphaxo wa txionho.

¹³Ngu msana ka kuva u di kombisile Valevhi masoni ka Aroni, ni masoni ka vanana vakwe, u na va ningeta ti to ve maha mningelo wo ndiwitela wa MKOMA.

¹⁴Ngu toneto, u na sawulisa toneto Valevhi hagari ka vanana va ka Israyeli; ti to Valevhi va na va vathumeli vangu.

¹⁵Valevhi va na wulela mthumoni ko xayisa ditenda da msengeletano, ku nga ti u txi va basisa, ni ku va ningela ka mningelo wa kundiwitela.

¹⁶Nguko hagari ka vanana va ka Israyeli, vona va ningetwe kwangu; se nanani ni va sawute, ka wukhalo wa matiwula ka votshe va ka Israyeli.

¹⁷ Nguko otshe matiwula; a vanana va ka Israyeli njangu, kumweko ni matiwula ya m'thu, ni a sifuyo; kukhukhela ka ditshiku dile ni nga daya matiwula a Vaegipta, se vona va basisetwe ani.

¹⁸Ni sawute Valevhi ka wukhalo wa matiwula otshe a vanana va ka Israyeli.

¹⁹Kha ditshuri ni ningete Valevhi ka Aroni ni ka vanana vakwe, ti to ve maha mthumo wa vanana va ka Israyeli, amu ka ditenda da msengeletano, ni ti to ve maha mphaxo wa midiho ya vanana va ka Israyeli, kasi ku si dhuki kuhuma phango hagari ka vanana va ka Israyeli, mbimo yi va tshuketako hafuhi ka wukhalo wo sawuleka.

²⁰Se Mosi ni Aroni, ni wotshe msengeletano wa vanana va ka Israyeli, ni Valevhi, madingano ni ti Mosi a nga leletwa ngu MKOMA.

²¹Valevhi va to ti basisa, ve kuwula tinguwo tawe; Aroni a to va ningela kasi kumaha mningelo wa kundiwitela, masoni ka MKOMA, se a to va mahela mphaxo wa txionho kasi kubasiswa.

²²Msana keto, Valevhi va to ta ve ta maha mthumo wawe, amu ka ditenda da msengeletano, masoni ka Aroni ni masoni ka vanana vakwe, madingano ni ti MKOMA a nga leleta ka Mosi, ngu didhawa da Valevhi, ngu toneto va nga mahelwa tona.

²³Se MKOMA a to womba ka Mosi a txi khene:

²⁴Sekoko, milayo ya Valevhi ngu yiya: Ava va magumi mambidi ni mtxhanu wa malembe ni kuya masoni, va na wulela mthumoni ka ditenda da msengeletano;

²⁵se kukhukhela ka mtxhanu wa magumi a malembe a tanga, a na huma[5] mthumoni wa wuphaxeli, kha na mbiswa e wu thuma kambe.

²⁶Kambe wa sikota kuthuma ni vakwawe ditendani ka msengeletano, kasi kuxayisa siya; aniko kha na mbi maha wumwani mthumo; u na maha toneto ka Valevhi, ngu didhawa da mthumo wawe.