Read chopi Mika 1 Bible Online

Mika 1 - chopi bible

Mika 1

¹Dipswi da MKOMA di tile ka Mika, wa Morasiti, ka masiku a Jothamu, Akazi, ni Ezekhiya, vafumeli va Judha, a di ene a ngadi wona, ngu Samariya ni Jerusalema.

²Engisani motshenu anu vathu, riya nzeve awe mafu, MKOMA Txizimu a nave fakazi ya ku mi wukela, ene MKOMA wu a ku dithepeleni kwakwe ko sawuleka.

³Nguko, wonani taku MKOMA wa khukha ka wukhalo wakwe, e txhika, se a na tsimbila-tsimbila txitimwi ka mafu.

⁴Se mimango yi na nyivilika hahatshi ka mikondo yakwe, ni mikova yi na tuleka, ku nga phula mndiloni, kufana ni mati o khiringela kuhokomani.

⁵Totshe eto ngu mhaka ya ku ti lambisa ka Jakobe, ni sionho sa nyumba ya ka Israyeli; ngu kuhi ku ti lambisa ka Jakobe kani? Ina hi nga ka Samariya kani? Ngu ahi makhalo o guleka a Judha kani? Hi nga Jerusalema kani?

⁶Ngu toneto, ni na maha ngu Samariya mmumbu wa marigwi a thembweni, i ku mafu o phaya ka ona mivhinya, se ni na rindilitela marigwi a kona mkovani, ni na tumbula makhato a kona.

⁷Se sotshe sithombe sakwe so vatwa si na tshatulelwa, ni yotshe miholo yakwe yi na hiswa ngu mndilo, ni na fuvisa sotshe sithombe sakwe, nguko asi mani ngu mtengo wa wugelegele wakwe, se si na maha hakhelo ya digelegele.

⁸Ngu kumaha keto, ni na dila, ni xomuleka, se ni handwa ni tsimbila ni sa ambala txilo; ni na dilisa ku nga vamwamilambo, ni xomuleka nga timbuwu.

⁹Nguko txilonda txako kha txi holiswi, nguko txi hokile kala ka Judha; txi endelekile kala ha txikeni ka vathu vangu, kona Jerusalema.

¹⁰Mi nga va geleni txilo aniya Gati, kambe mi nga dileni ngutu, pulukutelani ha ka lithulu, kona Bheti-Leyafra.

¹¹Pinda awe u hanyako Safiri, ni tingana tako ta kwa mbi ambala txilo; awule a zumbako Zahana kha huma; huwa ya Bheti-Ezeli yi na mi tutumisa mi huma ditikoni kwanu.

¹²Nguko awu a zumbako Maroti, a pfite kupanda ngu kulava wunene; nguko dikhombo di txikile ngu ka MKOMA, kala ha txikeni ka Jerusalema.

¹³Sunga sihari sa sidotho aha ka txikotxikani, awe u zumbako Lakisi (aawa ngu ona makhato a txionho txa mwanana wa dihorana wa Siyoni), nguko kuta ngu kwako, kuhambunyeta ka Israyeli.

¹⁴Ngu toneto, u na siya siningo ka Moreseti-Gati; tinyumba ta Akizibhe ti nave i di ta makuhu ka vafumeli va Israyeli.

¹⁵Kambe ni na kutisela txidya-thomba, awe u zumbako Maresi; wudhundo wa Israyeli wu na hoka kala Adhulami.

¹⁶Ti mahele lipala, u yola misisi, ngu mhaka ya vanana vako vo tsakisa; kulisa lipala lako kufana ni digama, nguko va tekilwe kwako ve yiswa wukhumbini.