Read chopi Mika 4 Bible Online

Mika 4 - chopi bible

Mika 4

¹Se ka masiku o gwitisa, ku na maheka to mmango wa Nyumba ya MKOMA, wu na vekwa txitimwi ka mmango, se wu na guleka txitimwi ka simangwana, kambe vathu va na tutumela ka wona.

²Se matiko amangi ma na ya ma txi ya kha ona: Ngonani, a hi kweleni mmangoni ka MKOMA, ni Nyumbani ka Txizimu txa Jakobe, kasi ku txi ya hi gondisa tinzila ta txona, se athu hi na tsimbila ngu tinzila ta txona; nguko ku na huma mlayo ngu Siyoni, ni dipswi da MKOMA ngu Jerusalema.

³ Se txi na lamula vathu vavangi, kambe txi na tsayisa matiko a mtamo, kala ni ale a kule, txi na hundulusa matxhari awe me maha misuka, ni tingove tawe ti maha masikela; ditiko dimwedo kha di na mbi guleta ditxhari do lwisa dimwani ditiko; se kha va na mbi gonda kambe kulwa yimbi.

⁴ Se dimwani ni dimwani di na khalahatsha hahatshi ka m'vhinya wa dona, ni hahatshi ka mkuwu wa dona, se kha ku na mbi va ni wo va dhukisa, nguko txisofu txa MKOMA wa Mabutho a Tiyimbi, txi wombile.

⁵Nguko votshe vathu va na tsimbila, mmwani ni mmwani ngu ditina da txizimu txakwe, aniko athu hi na tsimbila ditinani ka MKOMA, Txizimu txathu, yotshe mbimo ngu ha ku si gwitiko.

⁶Ka dona ditshiku dile, kuwomba MKOMA: Ni na sengeleta vale va nga ti ti khwita, kambe ni na wuyisela vale ni nga ti ti va tovete, ni vale ani ni nga ti ti va xanisile.

⁷Se avale va nga ti ti khwita ni na va maha miboti, se avale va nga ti ti tsulisilwe kule, va na va ditiko da mtamo; se MKOMA a na fuma txitimwi kwawe mmangoni ka Siyoni, kukhukhela konkuwa kala kupinduka.

⁸Awe txitezi txa mtxhambi, mmango wa dihorana da Siyoni, ku nata kwako, ina, ku nata kwako kuxula ko khata, wukoma wa dihorana da Jerusalema.

⁹Se ngu kutxani u dilako ngutu kani? Ina kha nga ho mfumeli kwako kani? Ina di to fa didhota dako kani? Mwendo u to manwa ngu kupanda ko nga ka wamsikati wu a lumwako kani?

¹⁰Pfana kupanda ni kuthuma, awe mwanana wa dihorana wa Siyoni, ku nga wule a ku kuvelekani, nguko konkuwa u na huma ngu didhoropani, se u ya zumba thembweni, kambe u na tsimbila kala Bhabhilona, koneyo koko u na ya txhatxhiswa; MKOMA a na kutirula manzani ka valala vako.

¹¹Konkuwa ma sengeletanile matiko amangi me kuwukela, ma txi kha ona: A na nyenyeziswe, se maso athu ma na wona kunavela kwakwe txitimwi ka Siyoni.

¹²Aniko kha va ma zivi mapimiselo a MKOMA, kambe kha va pfisisi kukawuka kwakwe, nguko a va sengeletile ku nga mafaka a mu txizendani.

¹³Khukha u hula, awe dihorana da Siyoni, nguko ani ni na ku mahela tshoka yako ngu simbi, ni syala sako ngu kopora, u na balisela matiko amangi, se kuxula kwako ku na pfaliswa ka MKOMA, ni thomba yako, ka Nyamne wa mafu otshe.