Read chopi Mika 5 Bible Online

Mika 5 - chopi bible

Mika 5

¹Konkuwa zumba ngu mabutho, awe dihorana da mabutho; nguko hi na randelwa; va na balisa txiletu txa mlamuli wa Israyeli ngu ndonga.

²Awe Bhetlehema wa Efrata, awe u ku wam'dotho hagari ka Judha, ku na huma ngu kwako awu a no va Mfumeli wa Israyeli, eyo makhato akwe i ku a kukhukhela kale, kukhukhela ka masiku a kaleko.

³Ngu konaho, a na va ningela kala mbimo yile, awu a lumwako, a no veleka ngu yona; sekoko vamwani vanawe va na wuya ni vanana va ka Israyeli.

⁴Se ene a na zumba ni kudyisa vathu ngu mtamo wa MKOMA, ka ditina do tshura da MKOMA, Txizimu txakwe; se vona va na zumba, nguko konkuwa ngene a no kuliswa, kala magwito ka mafu.

⁵Se awuwa a na va kudikha kwathu. Mbimo yile Asiriya a nota ditikoni kwathu, ni mbimo yile a no pinda ngu txitimwi ka tinyumba tathu ta wukoma, hi na emisa mtxhanu wa vadyisi, ni mtxhanu wa vakoma ni vararu hagari ka vavamna, kasi kulwa nayo.

⁶Evo va na heta ditiko da Asiriya ngu ditxhari, ni ditiko da Nimirodhi, amu ka tinzila tawe ta hombe. Ngu kumaha keto a na hi hulukisa ka Asiriya, mbimo yile va nota ditikoni kwathu, ni mbimo yi va no ndaka mihingano yathu.

⁷Se miboti ya ka Jakobe, yi na va hagari ka vathu vavangi, ku nga mwando wa MKOMA, ku nga matshutshelo txitimwi ka mwasi, wu si emeliko m'thu, mwendo kuverela vanana va vathu.

⁸Se miboti ya ka Jakobe yi na va hagari ka matiko, hagari ka vathu vavangi, kufana ni ngonyamo hagari ka sihari sa txitinga, ku nga txingonyamoana hagari ka mitxhambi ya tinvuta, ngako txi txi pinda, txi na ti ganyatela ni ku ti phatulela, ku si maneki ni wo ti lwela.

⁹Dianza dako di na guleka txitimwi ka valala vako, se votshe valala vako va na loviswa.

¹⁰Se ku na maheka ka dile ditshiku, kuwomba MKOMA ku khene: Ni na fuvisa hagari kwako mahantxhi ako, kambe ni na khundumusela sikotxikani sako;

¹¹ni na khundumusela madhoropa a ditiko dako, ni ku wisetela yotshe mikhokhola yako;

¹²se ni na thavisa wuloyi manzani kwako, kambe khu na mbi va ni vanyawuthi;

¹³ni na thavisela hagari kwako sithombe sako so vatwa ni so wubwa; se awe khu na mbi ngadi u khizama kambe masoni ka mithumo ya manza ako.

¹⁴Kambe ni na thavisela sithombe sako hagari kwako; ni hoxota madhoropa ako.

¹⁵Se ni na tisa kuhenya ni txiviti txitimwi ka matiko ale ma si engisiko.