Read chopi Nahume 1 Bible Online

Nahume 1 - chopi bible

Nahume 1

¹Kulamulwa ka Ninivha. Dibhuku da txiwoniso txa Nahume, Muelikoxi.

²MKOMA i Txizimu txa txiluse ni kuphota; MKOMA wa ti photela ni kutala ngu kuhenya; MKOMA wa ti photela ka vale va m'wukelako, txiviti txakwe a txi vekela valala vakwe.

³MKOMA wa swela kuhenya, aniko mbwa hombe amu ka mtamo wakwe, se ka muonhi, kha mmahi wo mbi na mnandu; Nzila ya MKOMA yi mu ka txingulu ni txihuhuri; se marefu lithulu la mikondo yakwe.

⁴MKOMA wa tolovela kukawuka linene, a txi li omisa, kambe wa phwisa yotshe minambo; wa tsivata Bhasani ni Karmeli, se txiluva txa Libhanoni wa txi wunisa.

⁵Mimango ya zinginika masoni kwakwe, ni simangwana sa nyeka; se mafu ma guleka masoni kwakwe, ina, ditiko ni votshe va va hanyako ka dona.

⁶I mani a no ema masoni ka txiviti txa MKOMA kani? I mani a no timisela masoni ka kutura ka kuhenya kwakwe kani? Txiviti txakwe txi thekete ku nga mndilo, se marigwi ma hoxotilwe ngu ngene.

⁷MKOMA mnene, dikhokhola ka ditshiku da xomulo, kambe wa va ziva ava va thembako kwakwe.

⁸Se ngu ndambi yo khulunga, a na lovisa wukhalo wawe do gwita, se txidema txi na tutumisa valala vakwe.

⁹Maalakanyo muni mi ku nawo o wukela MKOMA kani? Ene apune a na mi heta motshenu; xomulo kha yi na mbi wuka kumbidi.

¹⁰Nguko, hambi i di ku vo tshunganela ku nga mipa, va txi kolwa ngu vhinya ku nga madevi, va na hetwa votshe kufana ni mwasi wa kuoma.

¹¹Ngu kwako awe Ninivha, kuhumile mmweyo wo alakanya wubihi ngu MKOMA, didhota do timeta.[1]

¹²MKOMA a womba tiya: Hambi mi txo tsana ka kutxani, hambi mi di vangi ko txani, hambi keto, mi na fuviswa, se ene a na pinda; awe Judha ni kuxanisile, aniko na mbi ngadi ni kuxanisa kambe.

¹³Aniko, konkuwa na funya dikange da Asiriya, di ku txitimwi kwako; ni na wilela milawu yako.

¹⁴MKOMA a vekile mlayo wa ku kuwukela, waku ku si maneki ni wammweyo wo dhanwa ngu ditina dako; kukhukhela nyumbani ka txizimu txako, ni na fuvisa sithombe so vatwa ni sa kunyekiswa; koneho ni na maha kona dithitha dako, nguko u txhipile.

¹⁵ Wonani mikondo txitimwi ka mimango ya wu a tisako mahungu a maphya, ya wu a huwelelako kudikha! Maha mibuso yako, awe Judha, hetisa sixambanyo sako, nguko m'bihi kha na mbi ngadi kambe a txi pinda ngu kwako; ene a na loviswa do gwita.