Read chopi Habhakuki 2 Bible Online

Habhakuki 2 - chopi bible

Habhakuki 2

¹Ni na va wukhaloni kwangu ko wonelela, kambe ni na ti kombekisa txitimwi ka mkhokhola, se ni txi rumarumela kulava kuwona awule a wombawombako ni nani, ni ti ni no xamula, mbimo si ni no thethiswa.

²Sekoko, MKOMA a to ni xamula a txi khene: Bhala txiwoniso, u wonekisa kha kwati aha ka mbila ya dirigwi, kasiku ni wuhi a gondako e ti pima ngu kukuluveta.

³Nguko txiwoniso njo dingana mbimo yokari, se kala magwito txi na womba-womba, kha txi na mbi hemba; ngako txiwoniso txi txi swela, txi verele, nguko kha ditshuri txi nata, kha txi na mbi swela.

⁴ Wona taku, muhefemulo wakwe wa kukumuka, kha wu thuthi mndani kwakwe; aniko mlulami a na hanya ngu likholo lakwe.

⁵Kambe ngu ditshuri, ngu kutiningetetela ka vhinya, wa leka mlayo; m'thu wo tikulisa, asi ti vekisiko, a anamisako minavelo yakwe kufana ni dithitha, wa kwa mbi khura kufana ni lifo, wa tshanganisa kwakwe otshe matiko, ni kusengeleta kwakwe votshe vathu.

⁶Ina koko kha va na mbi mu wukela votshe vava, ngu likaringani ni wombelo yo mnemetisela, va txi kha vona: Dikhombo ka wule a andisako asi i singako sakwe (kala yihi mbimo!) Ni wule a ti rwekako sikweneti apune.

⁷Ina kha va na mbi tekela kukhukha avale va no kuluma kani? Ina kha va na mbi vhumuka avale va no kudhudhumelisa kani? Ni ku mwendo awe kha va na mbi kumaha thomba yawe kani?

⁸Ngako u nga hoxota matiko amangi, votshe vathu va na kuhoxota nawe, ngu mhaka ya mnoha wa vathu ni kulwa ngu mhaka ya mafu, didhoropa, ni votshe vale va zumbako ka dona.

⁹Dikhombo ka wule a sengeletako tithomba to ti mana ngu mamahelo awalo, kasi kuveka txisaka txakwe txitimwi, a txi mahela ku ti txhatxhisa ka dianza do biha.

¹⁰U thete tingana mwaya wako, ngu kuheta vathu vavangi, u onhete moya wako.

¹¹Nguko dirigwi di na kwangula di ti disetani, se ni wona mnaneko wa dipulango wu na mxamula.

¹²Dikhombo ka wule a akako didhoropa ngu mnoha, kambe a tsanisako didhoropa ngu wubihi.

¹³Wonani taku, kha ti ti ngu ka MKOMA wa Mabutho a Tiyimbi taku, matiko me thumela kuhiswa ngu mndilo, ni ti to vathu ve karala ngu ta kwa mbi nyawula.

¹⁴ Nguko mafu ma na tala ngu kuziva kudhumisa MKOMA, ku nga tile mati ma fenengetisako tona linene.

¹⁵Dikhombo ka wule a ningako vhinya mngana wakwe! Awe u mtshuketiselako msava wako u mlevisa, kasi kuwona wumbwiri wakwe.

¹⁶U na kolwa ngu tingana u pwata kudhundeka; sela nawe u kombisa taku khwa yiswa wukwerani: Digombe da diwoko da txinene da MKOMA, di na wuya txitimwi kwako, ni makosa ma na nyenyezisa wudhumo wako.

¹⁷Nguko kulwa ko wukela Libhanoni ku na kufenengeta, ni kuloviswa ka sihari sa tshofu ku na kuvangela kuthava, ngu mhaka ya mnoha wa vathu, ni kulwa ngu mhaka ya mafu, didhoropa ni votshe va zumbako ka dona.

¹⁸Ngu txihi txivhuno txa txithombe txo vatwa txi nga vatwa ngu m'vati wa txona kani? Se txithombe txo wumbwa txi gondisako makuhu, a txi themba ngu txani muwumbi wa txona, na kuve njifananiso txa txizimu txa txiduma kani?

¹⁹Dikhombo ka wule a gelako ndonga a txi khene: Wuka! Se ni ka dirigwi da txiduma a txi khene: Vhumuka! Ina toneto ti nga gondisa kani? Wona ti to txi tshuletwe ngu nzalama ni silivhela, aniko hagari ka txona kuwalo moya ni wa wudotho.

²⁰Kambe MKOMA amu ka dithepele dakwe do sawuleka; ma na malale masoni kwakwe otshe mafu.