Read chopi Habhakuki 3 Bible Online

Habhakuki 3 - chopi bible

Habhakuki 3

¹Mkombelo wa mprofeti Habhakuki ngu mamahelo a kuembelela.

²Ni pfite dispwi dako MKOMA ni thava; wusa awe MKOMA mthumo wako hagari ka malembe, hagari ka malembe wuzivekise; Kuhenyani kwako alakanya wumbilu.

³Txizimu txi tile ngu Temani, se Msawuleki a tile ngu mmangoni ka Parani. Wudhumo wakwe wu fenengetile nzuma, se mafu ma tate ngu kudhumiswa kwakwe.

⁴Kuphatima ka txona kufana ni ka ditambo, miseve yo phatima yi na hume ngu manzani ka Txizimu, se eho ku ti ti ni wusisalelo wa mtamo wa txona.

⁵Masoni ka txona ku ti ti thangela mtungu, ni miseve ya mndilo hahatshi ka mikondo ya txona.

⁶Txi to ema txi pima mafu; txi to wona txi hambanisa mifumo, se mimango yo pindukela yi to bhandekela, simangwana sa kwa mba na magwito si to khizama; kutsimbila ka kwa mba gwita nga Txizimu.

⁷Ni wona matenda ya Kusani ma di kupandisekani; matenda a ditiko da Midhiyani ma txi dhudhumela.

⁸Ina MKOMA u ngava u txi henyela minambo kani? Ina mwendo u henyete sinambwana, ni ku mwendo u henyete linene, ka kuza u tsimbila u di gadhile mahantxhi ako, u kwela sikotxikani sako so hulukisa kani?

⁹Wulaho wako wu ti tumbulisile wu va ha kubasani; si xambanyo sile si nga mahwa ka tihunzu si manekile i di dipswi do tsana. (Selahi) awe u bhandile mafu ngu minambo.

¹⁰Mimango yi kuwonile yi dhudhumela; ni kutalelwa ngu mati kupindile; dipswi dakwe a di ningete ka kuhokoma, manza akwe a ma guletile txitimwi.

¹¹Ditambo ni mtxima si emile makhaloni ka sona; Si nyamalaliswa ngu kuwoninga ka miseve yakwe, ni kuphatima ka kukeluka ka ditxhari dakwe.

¹²Ngu kupandiseka u tsimbilatsimbite ha mafuni, ngu txiviti u kandetete matiko.

¹³Awe u humile kuya hulukisa vathu vako, kuya hulukisa msawuleki wako; awe u gangile msungo wa nyumba ya wo biha, u fumbula makhato a nyumba kala magwito. (Selahi)

¹⁴Awe u tute msungo wa mthangeli wa yimbi ngu mitxheketelo yako; vona va ni wukete nga txihuhuri ku ta ni hangalasa; va ti ti giyela ku nga va txo lava kumita txisiwana ku sisakalani.

¹⁵Awe ni mahantxhi ako mi tsimbite ngu linene, ngu ka mavimbi a hombe.

¹⁶Ni di ti engisile ani, mndani kwangu kudhuka, ngu dipswi dakwe txisofu txangu txi dhudhumete; kuwulete kusina marambuni kwangu, se ni dhudhumela mndani kwangu; na humula ani ka ditshiku do pandiseka, ngako ni txi nata lwa ni vathu vale va nota hi hoxota.

¹⁷Hambi keto, hambi mkuwu wu si nzi kuhuma siluva, hambi ku si maneki mihando amu ka mu uvha, mihando ya muolivha yi nga woneke, ni tithembwe ti nga humise sakudya, txi bala txa tinvuta txi na fuviswe, ni sibalani ku nga maneke tihomu ta mikati.

¹⁸Hambi keto, ani na tsaka ka MKOMA; ni na guleta Txizimu txa kuhanyiswa kwangu.

¹⁹MKOMA Txizimu ngene mtamo wangu, se a na maha ti to mikondo yangu yi txi nga ya mhunti, a na ni maha ni tsimbila ka makhalo o guleka. (Ka muembeleli ni ka sivetaveta sangu sa tindando.)