Read chopi Zefaniya 2 Bible Online

Zefaniya 2 - chopi bible

Zefaniya 2

¹Sengeletanani, ina, sengeletanani anu va ditiko da kwa mbi na tingana,

²kusanzi kuhuma txileleto, aha ditshiku di no pindisa ku nga mwasi; kusanzi kuta txitimwi kwanu kuhenya ka MKOMA; ina, di sanzi kuta txitimwi kwanu ditshiku da kuhenya ka MKOMA.

³Lavani MKOMA, anu motshenu vo thutha va ha mafuni, anu mi thumisako kulamula ngu sileleto sakwe; lavani kululama, lavani kutiveka hahatshi; mwendo mi nata siswa ka ditshiku da kuhenya ka MKOMA.

⁴Nguko Gaza a na lekwa, se Axikaloni a na maha dirumbi; Asidhodhi a na tutumiswa hagari ka mitshikari, se Ekroni a na ruriswa.

⁵Dikhombo ka vale va zumbako mabambe ka linene, vathu va Kereti! Dipswi da MKOMA di na mi wukela, awe Kanana, ditiko da Vafilista, se ani ni na mi maha mi hoxoka, kala kuza ku si maneki vazumbi.

⁶Se mabambe ka linene ku na maha ko dyisela kona sifuyo, ni sidhutyana so lumba vadyisi, ni sibala sa sifuyo.

⁷Mabambe mule ku na lumba miboti ya nyumba ya ka Judha, kuva va txi dyisela kona sifuyo; ni minova va na ya otela tinyumbani ka va ka Axikaloni, nguko MKOMA, Txizimu txawe, a na va endela, kambe a na va tshumetela tikhumbi tawe.

⁸Ani ni pfite kuruketela ka Mowabhi ni mapswi a nzambwa a vanana va ka Amoni, aale va nga ruketela ngu ona vathu vangu, ve ti bhuma ngu mihingano yawe.

⁹ Ngu toneto, ni xambanya ngu kuhanya kwangu, kuwomba MKOMA wa Mabutho a Tiyimbi, Txizimu txa Israyeli, ngu ditshuri Mowabhi a na nga Sodhoma, se vanana va Amoni va na nga Gomora, kumaha ditiko da mindonga ya mipa, ni sisima sa mnyu, di na fuviselwa magwito, miboti ya vathu vangu yi na va handa, se miboti ya vathu vangu yi na va khozisa.

¹⁰Eto ti nava hakhelo ya kutikulisa kwawe, nguko va ruketete ni kutikulisa txitimwi ka vathu va MKOMA wa Mabutho a Tiyimbi.

¹¹MKOMA a na va karata ngutu, nguko a na hoxota sotshe sizimu sa mafu; se votshe va nata mkhozela, mmwani ni mmwani a txi khukhela ka wukhalo wakwe, ka sotshe sitondolo sa matiko.

¹² Se nanu va Etiyopiya, mi na dayelwa ngu ditxhari dangu.

¹³A na nawuluta dianza dakwe Wuphemba, e fuvisa Asiriya; se a na maha ti to Ninivha e va dirumbi, ditiko do oma nga txiwula.

¹⁴Se hagari ka dona ku na zumba mitxhambi, sotshe sifuyo sa vathu; disekwa ni nungu si na zumba tiphandeni kwawe; mapswi a kuemba ka sona ma na pfala ngu mu ka mafasitela, kuxasela ku nava mitshunzutini ka dona, nguko tiphande ta mikedhari ti sate hakubasani.

¹⁵Adiya ngu dona didhoropa do tsakisa, di nga ti ti zumba ngu kwa mbi ti wonela, di nga ti ti womba mbiluni ka dona: Ani ngani, kambe kha ku na dimwani hahanze kwangu; eto di nga mahisa tona marumbi, ni ku va nyumba ya sihari! Ni wuhi wu a no pinda ngu ka dona a na veta mloti, se e zinginisa dianza dakwe.