Read chopi Zefaniya 3 Bible Online

Zefaniya 3 - chopi bible

Zefaniya 3

¹Dikhombo ka wule wa ku ti lambisa ni kutinyenyezisa, didhoropa da kutsindaveta!

²Kha di engisi dipswi, kha di tumeli kukawukwa, kha di thembi MKOMA, hambi kutshuketa ka Txizimu txa dona.

³Vathangeli va dona ndingonyamo ti bhongako hagari ka dona; valamuli va dona maxolwa a mbimo ya minova, ma si siyiko marambu a kutadya mangwana.

⁴Vaprofeti va dona mba kutikulisa, kambe kha va nga ni txithavo; vaphaxeli va dona va txhipisile wukhalo wo sawuleka, va txi ndaka mlayo.

⁵MKOMA a lulamile hagari ka dona; ene kha mahi to biha; mixo ni mixo a wuyisa wululamo wakwe hakubasani; kha dhuki a txi pwateka; hambi keto, wa kubiha kha nga ni tingana.

⁶Ni fuvisile matiko, sitezi sa kona si mahile marumbi, ni mahile siwula tinzila ta kona, aha koza ku si pindi m'thu ka tona; madhoropa a kona ma hoxotilwe, aha koza ku si sali ni wammweyo, kupwateka ni wo zumba ka ona.

⁷Ani ni ti ti khani: Kha ditshuri u na ni thava, kambe u na tumela kukawukwa; se ngu kumaha keto, wukhalo wako wa kuzumba ka wona, kha wu na mbi hoxotwa, madingano ni ti ni nga ti ti pimisile; aniko vona va phindute va txi onhetela yotshe mithumo yawe.

⁸Ngu toneto, ni vereleni, kuwomba MKOMA: Ka ditshiku di ani ni no khukha ni txi ya handa; nguko maalakanyo angu ngu kusengeleta matiko, ni kutshanganisa mifumo, kuva ni txi na tshakunuta kuhenya kwangu, ni kotshe kupandiseka ka txiviti txangu; nguko otshe mafu awa, ma loviswa ngu mndilo wa txiluse txangu.

⁹Sekoko ni na sawulekisa sisofu sa vathu, kasiku votshe va txi khongela ditina da MKOMA, ve mthumela ngu moya wumwewo.

¹⁰Ngu mtxhatuko ka minambo ya Etiyopiya, vakhongeli vangu vo ti ningela, dihorana da kuhangalaka kwangu, va na ni wuyisela mphaxo.

¹¹Ka ditshiku dile, khu na mbi wa tingana ngu mthumo wako ni wawumwewo, awu u nga ni lwisa ngu wona; sekoko ni na thavisa hagari kwako, ava va giyako ngu kutikulisa, se awe khu na mbi ngadi u txi ti kukumukisa kambe, mmangoni kwangu ko sawuleka.

¹²Aniko hagari kwako ni na siya vathu vo ti veka hahatshi, va sisiwana, se vona va na themba ditina da MKOMA.

¹³Miboti ya Israyeli kha yi na mbi maha wubihi, hambi kuwombawomba makuhu, ni mkanani kwawe kha ku na mbi huma mapswi o kanganyisa, nguko va na dyiswa, va na otela, kambe kha ku na mbi va ni wo va dhukisa.

¹⁴Embelela ngu kutsaka awe dihorana da Siyoni; Tsaka kambe awe Israyeli; ti tsakele u txi peka mikulungwani ngu mbilu yako yotshe, awe dihorana da Jerusalema.

¹⁵MKOMA a thavisile kulamulwa kwako, a lovisile valala vako; MKOMA, Mfumeli wa Israyeli a hagari kwako; awe khu na mbiswa u txi wona kambe wubihi ni wawumwewo.

¹⁶Ka ditshiku dileya, ku na wombwa ka Jerusalema ti taku: U nga thave awe Siyoni, mawoko ako ma nga gume mtamo.

¹⁷MKOMA, Txizimu txako, aho hagari kwako, ana ni mtamo ngutu kasi ku kuhanyisa; ene a na tala ngu ku kutsakela; a na malala ngu lirando lakwe, a na kutsakela ngu kuembelela.

¹⁸Ava va nga pandiseka ngu ngawe, ngu mhaka ya ditshiku dile da m'buso, ani ni na va sengeleta; evo ka vona kunemela ku va xanisile.

¹⁹Wona ti taku, ka yona yile mbimo, ni na wukela votshe vale va kuxanisako, ni hanyisa vale va khwitako, se ni wuyisela avale va nga tutumiswa; kambe ni na va ninga kudhundeka ni wudhumo, ka otshe matiko ale va nga thelwa tingana ka ona.

²⁰Ka mbimo yoneyo ni na mi wuyisa, ka mbimo yoneyo ni na mi sengeleta; ngu ditshuri ni na mi ninga kudhundeka ni wudhumo, hagari ka votshe vathu va ha mafuni, mbimo yi ni no wuyisa tikhumbi tanu na mi txi ti wona, kuwomba MKOMA.