Read chopi Hagayi 1 Bible Online

Hagayi 1 - chopi bible

Hagayi 1

¹Ka dilembe da wumbidi da mfumeli Dhariyo, ka mtxima wa wutxhanu ni wumwewo, ka ditshiku do khata da mtxima, kutile dipswi da MKOMA ngu ka mprofeti Hagayi, ka Zorobhabheli, mwana Salatiyeli, mthangeli wa Judha, ni ka Joxuwa, mwana Jozadhake, mphaxeli wa hombe, di txi kha dona:

²A wombisa tiya MKOMA wa Mabutho a Tiyimbi, a khene: Vathu vava va kha vona: Kha yi se hoka mbimo, mbimo yi Nyumba ya MKOMA yi dinganako kuakwa ngu yona.

³Sekoko dipswi da MKOMA, di tile ngu ka mprofeti Hagayi, di txi ta kha dona:

⁴Ina ngu yona mbimo yo anu mi zumba ka tinyumba tanu to thsuriselwa, se ayiya nyumba yi maha ditshatsha kani?

⁵Se konkuwa, MKOMA wa Mabutho a Tiyimbi a khene: Vekani timbilu tanu amu ka tinzila tanu.

⁶Mi phayile ngutu, kambe mi funyela ka kudotho; ma dya, aniko kha mi khuri; ma sela, aniko kha mi kolwi; ma ambala, aniko kha mi futumeli; ni wule a holako, a hola ka txikwamana txo doleka.

⁷MKOMA wa Mabutho a Tiyimbi a khene: Vekani timbilu tanu amu ka tinzila tanu.

⁸Kwelani mmangoni mi txi ya teka mapulango, mi ta aka nyumba; se ni na tsaka ngu yona, kambe ni na dhumiswa, kuwomba MKOMA.

⁹Mi rinzete sasingi, aniko mi mani sa sidotho, ni soneso sa sidotho, mbimo yi mi nga si wuyisa m'tini, ani ni si futetile. Ngu kutxani kani? Kuwombile MKOMA wa Mabutho a Tiyimbi. Ngu mhaka ya nyumba yangu i ku ditshatsha, se mmweyo ni mmweyo wanu a tutumela nyumbani kakwe.

¹⁰Ngu konaho, nzuma yi zumbile ni mwando wa yona, se ni mafu ma zumbile ni mihando ya ona.

¹¹Se ni tisile kuoma txitimwi ka mafu, ni txitimwi ka mimango, ni txitimwi ka fulaho, ni txitimwi ka mivhinya, ni txitimwi ka mafura, ni txitimwi ka sotshe asi mafu ma si humisako, kumweko ni txitimwi ka vathu, ni txitimwi ka sihari, ni txitimwi ka yotshe mithumo ya manza.

¹²Sekoko Zorobhabheli, mwana Salatiyeli, a to engisa, kumweko ni Joxuwa, mwana Jozadhake, mphaxeli wa hombe, ni votshe vathu vale va nga huluka, dipswi da MKOMA Txizimu txawe, ni mapswi a mprofeti Hagayi, nga tile MKOMA Txizimu txawe, a nga ti mrumisile tona; se vathu va to thava masoni ka MKOMA.

¹³Sekoko Hagayi txirumwa txa MKOMA, a to womba-womba ka vathu, mandingano ni mhaka ya MKOMA, a txi khene: Ani ni na ni nanu, kuwomba MKOMA.

¹⁴Se MKOMA a to wusa moya wa Zorobhabheli, mwana Salatiyeli, mthangeli wa Judha, ni moya wa Joxuwa, mwana Jozadhake, mphaxeli wa hombe, ni moya wa votshe vathu vale va nga huluka, se va to ta thuma Nyumbani ka MKOMA wa Mabutho a Tiyimbi, Txizimu txawe,

¹⁵ka ditshiku da magumi mambidi ni mune, ka mtxima wa wutxhanu ni wumwewo, ka dilembe da wumbidi da mfumeli Dhariyo.