Read chopi Zakariya 10 Bible Online

Zakariya 10 - chopi bible

Zakariya 10

¹Kombelani mati a nzuma ka MKOMA, ngu mbimo ya nzuma ya mbimo ya kudima; MKOMA ngene a nga va nga kukeluka, a na va ninga mati a nzuma, ni similwa ka thembwe ya mmwani ni mmwani.

²Nguko sithombe sa sizimu si womba-womba ta walo, se vahuteteli va tolovela kuwona makuhu ni kutxhamusela miloro ya walo, va thavelelana ngu ta kwa mbi nyawula; ngu toneto, va tsimbilisa ku nga tinvuta, va txi xaniseka, nguko kha ku nga ni m'dyisi.

³Kuhenya kwangu ka tura kuwukela vadyisi, se ni na tsayisa vamabhongwe; kambe MKOMA wa Mabutho a Tiyimbi a na endela mtxhambi wakwe, i ku nyumba ya ka Judha, se a na va maha ku nga dihantxhi dakwe do thaviseka yimbini.

⁴Ku na huma ngu ka Judha dirigwi da magwito, phande, wulaho wa yimbi, kumweko ni otshe masotxhwa.

⁵Se va na nga tindena ti ganyatako valala va tona, amu ka madhaka a tinzilani, kulwani, va wulelako kulwani ngu madhakani ka tinzila, ve tshinda valala, nguko MKOMA a na va navo, se vona va na thela tingana vale va tsimbilako va di gadhile mahantxhi.

⁶Se ni na tsanisa nyumba ya ka Judha, ni hanyisa nyumba ya Josefa, ni na tshumela ni va phaya, nguko ni va pfete wusiwana; se va na nga kha ni khali ku va lamba; nguko ani ngani MKOMA, Txizimu txawe, kambe ni na va engisa.

⁷Se va ka Efrayime va na nga tindena, mbilu yawe yi na tsaka nga va to sela vhinya, se vanana vawe va na wona ve tsaka, timbilu tawe ti na tsakela MKOMA.

⁸Ani ni na va dhana ngu mloti, ni va sengeleta, nguko ni va tirute, se va na talelana, nga tile va nga ti talisile tona.

⁹Se ani ni na va phaya hagari ka vathu, va na ni alakanya ka makhalo a kule; va na zumba kona ni vanana vawe, kambe va na wuya.

¹⁰Nguko ni na va wuyisa ngu ditikoni ka Egipta, ni va sengeleta ngu Asiriya; ni va tisa ka ditiko da Gileyadhi ni da Libhanoni, kambe kha ku na mbi maneka wukhalo wo va lumba.

¹¹Ene a na txhatuka linene ngu kukarateka, se a na peka mavimbi a linene, kambe kotshe kutshima ka minambo ku na oma, sekoko kutikulisa ka Asiriya ku na wiswa, ni ndonga ya Egipta yi na khukha.

¹²Se ani ni na va tsanisa ka MKOMA, kambe va na tsimbila ditinani kwakwe, kuwomba MKOMA.